KUMHLUI LEH KUMTHAR Hun leh kum a liam zel a ni tih hriatna hian mihring damlai kan ni tih a entir a, nunhlui ngaia lungleng thei dinhmuna kan la din chhung hi chuan hmabak beiseina nei turin hun kan la nei tihna a ni. Kumhlui kan han thlah kumtin thei mai hi vanneihnaa chhiar duh leh a nachang hre tan chuan a man a va sang em! 'Nunhlui ngaih a sawt lo, kan hmalam i thlir ang' titu thlirna rilru leh, ' Kan ngai em a ni nunhlui zawngte kha, kir rel lo i liampui ta maw' titu lunglenna ram hi chu inhlat hmel viau mahse, a tu zawk mah hi an demawm hran love. Kum liamta chhunga kan nuna thil thleng zawng zawngte a inan loh piah lamah, kan hriatreng dan tur hi patla khata khai rual ngawt chi a ni hauh lovang. Hmangaih lungduh te nena hlim leh lawm taka hun kan hman lai ni te, chhungkim a hun kha zawng kan hman liam tak te khan lung a tileng vawng vawng mai. He hun, kum sul tawp ber ni kan hman lai mek hian khua a har vung vung a, khawvel hi a reh tlawk tlawk ni te hian a hriat theih nia..Thian hlui mualliam ta te leh damchhung khawsak tulna avanga lam hlaa awm te mitthlaah an rawn inlar zut zut a, kan seilenna chhuahtlang leh a chhunga cheng, kumtam liam ta a lung kan rualpuite zawng zawng pawh...Nunhlui leh kum hlui hi zawng, a thlah liam hnem apiang tan ngaih tur a tam ting mai. Kum tawp ni hnuhnung ber lo herchhuah ruala calendar hlui ka nuai hlawm tawp tawp lai chuan he thil hi ka rilruah a lo lang a.. Engtikniah emaw chuan he calendar ang chiah hian hun hian kan nun hi mathei lovin a la nuai hlawm ve ang a, tuai thar leh tik a awm tawh ngai lovang. Hun vawngtu calendar kan thlak thar tam poh leh thlan lam kan hnaih sauh a ni mai dawn si a..! Kawng lehlamah chuan vawiin hun ang hmu hman ve lo hian mi tam takin mual an liam a, thenkhat taksa phei chu leilungah a luangral tawh. Kum 2016 paltlang theia kan awm hi kan va vannei em! Kan chan hlutzia hi i ngaihtuah ngai em? Mithiamte chuan a tlangpuiin minute khatah kan lungphu hi vawi 80-100 vel a phu a, chuti a nih chuan ni khatah vawi 57600 vel a tlem berah a phu dawn a ni. Kum khatah vawi 21024000 aia tlem lo a ni ang. Heti zatah hian vawi khat lek pawh a nih dan tur lo deuhin kal se, thih phahna tham a ni ang. Puitling hian nunphung pangngaiah nitin Oxygen 11000 litre vel mamawh ang kan ni a, 2.75 litre portable oxygen cylinder hi Rs.6500 man niin an sawi a. Chuti a nih chuan kum khata kan oxygen hip luh man hi Rs.1,465,475,000/- vel a ni ang. Dam man hi a va sang em! Tin, kum liamta chhung khan ram tam takah khuarel chhiatna rapthlak tak tak a thleng bawk a, lirnghing bik chauh thlir ila...Equador-a 7.8 mag. a naa lirnghingah khan mi 676 an thi a, Italy-a 6.3 a naa nghing ah khan mi 299 leh Taiwan-a 6.4 a nghing ah khan mi 117 an thi bawk. Hei hi a rapthlak zual tlem chauh a ni. Keini chuan heng zawng zawng hi kan pumpelh bik. Kan taksa peng hrang hrang te dam leh hrisel taka kumhlui kan thlahpui thei hi a man a sang asin... International Black Market rate ah chuan mihring mit (eye) khinghnih hi Rs.1,03,631 man a ni, lung (heart) hi Rs.8,086,633 man a ni a, kal (kidney) hi Rs.17,804,183 man vel leh vun (skin) inchi khat bial hi Rs.679 man vel niin an chhut bawk. Heng hi a then a zar chauh a ni. Mithiam, mifing, Pathian tana inhmang leh mi tha tak tak ten mual an liam a, indo leh hrileng avangin ram tam takah mihring an thi puk puk reng a. Hetiang khawvel buai tak leh nun derthawng tak nei chunga kumsul kan han vei leh thei mai thin hi thil narana ruat ngawt chi chu a ni hauh lovang le...! Engpawhnise kumhlui hian lungleng tak te, hlim tak leh phur taka thlah a phu khawp mai. Chutihrual chuan beiseina thar nen kumthar thlirin, hetiang hun kan chan bik vanneihzia hi chhut ila, kan neih loh lam aiin kan neihsa hlutzia chhiar thiam turin inbuatsaih ang u... Kumthar chibai vek u le.... Aibawk : Dt.31.12.2016