INKAWMSERH

    Tun hnaia India leh Pakistan boruak kan hre theuh a. India in surgical Strike a neih hnuah a thu (idelogy) lamin an la inbei zui zel a. India hian a tum em em pakhat chu Pakistan hi firfiak thlawp ram  (Terrorism sponsor state) a ni tih khawvel hmaa pholan hi a ni. Chumi hmang chuan khawvel ram hrang hrangte hawisantir a, kawmserhtir (Global Isolation) hi a duh a ni. Hetiang tur hian US a Indian awmhote pawhin hmanni lawk khan White House Petition an neih hial kha.. He inenhranna hi tunlai khawvelah chuan Nuclear ralthuam tluka hlauhawm a ni.
    Ram tenau leh economy-a hniam zawkte dinchhuah ve theihna te, hmanraw nei tha ve lo leh ram him lo, security lama hniam zawkte inhumhim ve theihna chu thawhhona/tanhona siam (Alliance Building) hi a ni. Hetianga ram hrang hrang inhlawmkhawm pawl pawh hi a tam nangiang reng a ni e.g. EU, ASEAN, SAARC, NATO, BRICS..etc. Ramdang tana hnawksak emaw a ram mipuite nekchep thin te chu hrek/kawmserh an ni ta thin a, hetianga kawmserh ram tan chuan kawng engkimah himna a derthawng thin a, manganthlak tak a ni thin. Burma ram dinhmun te pawh kan hriat kha..Tunlai khawvelah chuan ram ei leh bar leh himna hi thawhhona, insumdawntawnna leh thlavang inhauhtawnnaah a innghat thui takzet a ni.
    Hetiang a nih avang hian ramin thian tha neih  mamawh a, lungrualpui tur a neih a tul thin. Ram mal tlat leh inthlunghrang tan hmasawnna a kal thui thei tawh lo. Intelkhawm hi chakna a ni a, inthendarh erawh tlukchhiatna a ni thung. Ram inkuahkhawm thiam apiang an dingchang a, foeign policy neih that leh that loh in ram dinhmun a kengtel tlat tawh.
   
    Kan Zoramah pawh hian, tu kan sawiselna ni lovin, hnam bing leh chi bil zawnga inlakhranna a awm ang tih a hlauhawm hle. Kan ram zimte hi inpumkhat aia inthendarh zawnga a kal chuan kan chhe dawn a ni. A dik tak chuan tun dinhmuna ADC pathum lai mai kan nei te pawh hi a pawi takzet. Mahse tunah siamthat theih a ni tawh lo. Hei bak hi chu thleng tawh lo rawh se. Ram hrang hrang ten thurualpui tur leh lamtang tur an dap reng laia, a awmsa pawh kan inthendarh chuan kan nasa lo mai ang.
    Khawtlangah pawh hei hi a pawimawh tho mai. Inlungrualna leh intelruh that hi kan hmasawnna tur tho a ni. Inkawmserh a, inseh tawn lova kan inkuahkhawm thiam a, kan lungrual poh leh kan chak dawn a ni. Kan thawhhona a that a, kawi kawm thin ang thapa, thil thaah chuan kan rual a tul tial tial ang. Kawng hrang hrangah kan inthawhpui  tlan theih a tul a, thil thaah pawh inthawhpui hleithei lo kan tam poh leh kan hniam ang. Lungrualna nen khawtlang nuam siam ila, inkawmserh leh inthendarh  hi chhiatna bul leh hmasawnna daltu a ni tih i theihnghilh lovang u...
   
    Tuk chhuah nuam vek ule...

Aibawk : October 2016