LUNGMUANGTE'N

Lungmuangte'n, thlunglu kaikun lova lenna hmunah,
Hriatna, finna thlawn pek dawnna hmunah,
Bik leh bing thil avanga inthendarhna awm lohna khawvelah,
 Thudik chauh auchhuahpui a nihna hmunah,
Duhaisam ram thleng tura thi leh thau pawlha beihna hmunah,
Chhia leh tha hriatna tuifimin atna thlaler ramro a chiah hnawnna hmunah,
I hruaina enga ngaihtuahna zau leh thil ropui tihna hmunah
Chu zalenna pialral ah ngei chuan, Ka Pa, ka ram hi thanharhtir teh la aw.


*Mind Without Fear*

Where the mind is without fear and the head is held high;
Where knowledge is free;
Where the world has not been broken up
into fragments by narrow domestic walls;
Where words come out from the depth of truth;
Where tireless striving stretches its arms towards perfection;
Where the clear stream of reason
has not lost its way into the dreary desert sand of dead habit;
Where the mind is led forward by thee into ever-widening thought and action-
Into that heaven of freedom, my Father, let my country awake.

- Rabindranath Tagore's - Gitanjali

Dated Aibawk
The 30th July, 2018

LUNGRUALNA TLANG

    Kan thlahtute khan thei ei loh tur kha lo ei lovin, an siamtu thu kha lo pawi sa ni se tun ang hian buaina chhum hi a zing lovang a, hriamhrei leh mihring tichhe thei thil hlauhawm pui pui te hi rawih fo a ngai lo tur. Heti ni lose chuan lei hi hmun nuam leh lungrualna tlangah kan siam mai tur hi a nia leh..!!!

Innghirnghona khawvel...

   Indona mualah thisen a luang ngiai nguai a, mithi ruang a let rem rum a, in lian leh sang pui pui a bal hiam huam a, bomb chak takin a tihchhiat, motor sawi chhe bei bui a mut khu vung vung bawk a. Hawina lam apiang a filh thuau a, che zeuh hmuh tur awm hauh lova a han reh vung vung vung mai te, lemchan mai mai pawh a han hmuh chang hian ngaihtuah a thui thin!!

   Kohhran leh khawtlanga rawngbawlpuite archuk tui lo khawpin, chil per chuai chuai in kan han rel a, Party awmna thuhmun loh avang maiin patling thankin zet, inseh ngam a tuang kan han din ur ur mai te, sum leh pai kan hmuh theihna tur a ni dawn phawt chuan midangte chu bet rawk rawk mahse pawi kan han ti miah lo mai te, tlai thlak tur pawh nei mumallo, hausak awmzia pawh la mangphan chhin miah lo khawpa reithei bakberhte chan tur sum, kan neih chuangliam atana kan han ruksak duh mai te han hmuh hian rilru hi a mit sulh thei nia..!! Heng zawng zawng hi tuna damlaite thiamloh a ni hran lo, thlahtute atanga hringnun kalphung pangngai a ni zawk.

  Khawvelah hian sakhaw humhim tumna leh inlakbing tumna avang hian thisen engzatnge luang tawh ang le? Ram zimte inchuh avang hian sipai ruang engzat nge ral ramah tawih ral tawh ang? Hlawkna um avangin mihringin a mihringpui engzatnge a hraihlum tawh ang le? Mihring duhamna avang hian eng chen chiahin nge leilung hi tihchhiat a nih tawh ang a, nungcha leh thing leh mau te hian an tawrhna nasa tak avang hian eng angin nge hringfate hi min ngaih ang le? Heti ringawt tur hi chu a ni thei dawn em ni le..?

Leilungin mi au e...
 
  Bawhchhe hmasatute avangin anchhedawng khawvelah  dahin kan awm a, thil chhe lam zawng zawng pawh hi thil tha ang thova kan chan turin, siamtu hian kan nunah a lo tah pawlh chiat a lo ni. Khawvel chhe tawh chu khawvel tha zawk leh muanawm zawka din turin leilung leh a chhunga nungcha leh thilnung tin te hmang hian min au asin !

  Thal laia romei zam paw chik chek kara vau leh fartuah vul chhing chheng te, kham pang rualremlo zeta khaukhim lo par sen ve tik tek te hian hringnun hi hlim taka chen za turin min duh ni hian a hriat theih nia..! To khawdur, thim khup maia chhum ruaitui pai inlet but but te, thli thawin hnahthlel a chhem len ur ur te, ruah hmahruai fang lian puipui lo tla phuar phuar thin te hian hringfate tan hian lungrualna thuchah keng tel tlat hian a hriat theih asin.. ! Nipui lo thawt a, hnah nem tinreng a chawrno hliam hliam te, fur khawthiang eng iu iau te hian chhan an nei ang a...Favang hun nuama tlai ni tla eng mawi takin ralkhata ruah bing sur paw chiai, a chhun tlet ser ser te hmang hian siamtu hian min hrih tum a nei ngei ang... Pangpar zu thlum tlana phengphehlep leh khawivah..a...fanghmir te chen a, intibuai hauh lova pangpar zu an inluh chhawk zak zak han hmuh te, rahtlan savaten intivui hauh lova thing rah pakhat tlana an han chiar hiai hiai mai te hmang hian, siamtu hian engemaw min zirtir a tum a, khawvel nuam zawk din turin  leilung hmang hian min au asin..!!! Hla siamtu chuan:

  Phengphe nunnem leh zaidam,    vahkhuai,tho leh hmiri pa’n
 Par zu dawn za thlir changin,
 hringnun hi ka tahpui thin !

a lo ti. Thian duhtak, lungrualna tlangah lengin, inseh tawn leh intai tawn lovin khawvel nuam zawk hi kan din thei angem le....?

Dt.6.7.2015
Aibawk  

YMA HLUTNA

   Khawvela hnam anga damkhawchhuah duh, midangte rahbeh nih bik hlauhna leh hnam tenau nih inhriatna avanga tangrual lo thei lova inngaihna rilru, kan thlahtuten an lo neih thin chuan  Lal leh khawnbawlte thlazar hnuaiah mizo tlangval rualte khawtlang chhantu sipaiah a chherchhuak a. Sapui leh ral a taka beih tur awm loh hnu fe ah pawh he rilru hi Mizo thinlungah a la reh chuan loh avangin he pawl ropui hmang hian kan chhunzawm zui ta zel a nih hi....

Huapzo pawl ropui...  
  Pawl tam berah hian pawnga taka tel ngawt theih a ni lova, a tel tur bik leh a huam chin mihring thliar kan ni thin. A pawl dinchhan leh chumi atanga hlawkna leh hamthatna pawh a pawl mi leh sa tan bik zela vohbik a ni a, mamber fee pek ruala Mizo hnam kan tel kim theihna ber chu YMA hi a ni. Kohhran thurinah kan lungrual zo lova, Political Party-ah phei chuan kan lungrual lo satliah mai ni lovin, mizo leh mizo kan invawhlum lo chauh zel a nih hi.
   Chhungkhat laina hnai belh tur leh chhawmdawltu nei loten an thlir fo chu he pawl hi a ni a, lusun chhungte thlamuanna thlen fo tu, tawhsual tawk palhte chhawmdawla, khawtlanga tanpui ngaite dawmkangtu leh eng ang mi nge an nih, tih lam aia Mizo an nih avanga kuangkuahtu pawl a ni. Hnam pumpui anga chet lakna tur thil awm thulah pawh he pawl baka Mizo min kuakhawm thei tur hi pawl dang kan la nei rih lo.

Tlawmngai pawl...
   Ram changkang zelin a hrinchhuah, pawl hrang hrang, sawrkar zem zena hmanraw tha tak tak nena an inbun thluah tawh hnuah pawh, he pawl hmanraw pui ber, tlawmngaihna khum thei hi a la awm rih lo. Khuarel chhiatna thlen chang pawhin a thlenna hmun atanga hnai ber, he pawl member te hi chet la hmasa ber an ni fo zel. Zualko tlan leh khaw kar kawng thui tak tak a ruang zawn hun pel tawh mah ila, a hunlai mil zela Mizote min tuamhlawmtu chu he pawl hi a la ni fan.

Hnamchhantu pawl...
  Kan hnam hi he pawl tello hian a him zo chiah angem, tih hi chhut tham fe a awm. Hnam khawih thil engah pawh a inrawlh a remchang a, Zofate himna atana daitheuva, ralven buka ding tlat thin chu he pawl hi a ni. Sawrkar kal diklo tur veng a, hnamdang min chimbuaina tur leh kan hnam tiderthawngthei thil ngaihven ber tu chu he pawl hi a ni fo. A member huam a zauh avang leh a pawl kalphung avangin zah a hlawh a, a thiltih avangin fak a phu takzet. A hlutna hi kan la hre dawn chauh ni pawhin a lang.

  Khawvel hi changkang er tawh teh mahse, hringnunin a kentel harsatna, manganna leh chhiatna te hi engtikah mah kan thlawhbosan dawn lo, khuarel chhiatna chi hrang hrang leh hnam anga dinchhuah ve duhna rilru hi a nasa deuh deuh dawn, heng zawng zawng hian he pawl ropuina leh hlutna hi a hailang zel fovang. Mihringte hi nunphung pangngaiah inmamawh lo leh inngaihsak lo viauin lang thin mahila, a bik takin Mizo rilruah chuan kan inmamawhna hi a la sang zel dawn a, min phuarkhawmtu pawl hi kan mamawh zelin a rinawm. Mimal hi chuan hmalak zau a har a, hna a sawt lova, tha leh tui a tlem thin. Ropui tak leh chak taka kan lan ve theihna pawl ropui, YMA hi a va hlu em!!!


- Dt.8.6.2014
Aibawk

INBIHCHIAN KAN NGAI EM?

  Kan sawi thin a, Mizo hnam hi hnam rinawm, tlawmngai, thilphal, midangte tana inpe thin leh nun ze mawi tak nei, kan ni, kan ti thin. Kan pi leh pute hunlai thlir chuan heng hi thil dik tak, hnam ang pawha min phuarkhawmtu a ni thin.

  Kristianna a lo lut a, a hnam pum deuhthaw chu reiloteah ‘Kristian ram’ a chhal ngam khawpin kristianna in min hneh zui nghal mai a.Thil lawmawm tak pawh a ni. Hetihrual hian hnam pum anga kan awm dan leh khawsaknaah hian kan sakhaw inzirtirna leh kan hnam nun ze mawi kha kan palzut ta deuh em, tih hi ngaihtuah tham tak a ni.

  U.T kan nih hnu lama kan politics kal dan leh ram sukthlek dan thlir hian kan rinawmna kan hloh tial tial niin a lang thei. Chu chu kan politics hmelhriat dan leh kan kalpui duhdan atang hian a hriat theih. Ram hmangaihna rilru leh hmasawnna tak tak buaipui aiin chhungkhat invulhna hmanrua, eizawnna hlawk leh lal hrawtna atan kan hmang ta deuh ni pawhin a lang.

  Hei chen State puitling kan nih hnua power plant mumal nei lo leh duhkhawp kan la nei thei miah lo te, ram ro tling khawp sulhnu hmuh tur la tlem em em te, ram danga thawnchhuah tur engmah nei thei lova kan la awm te, keimahni puala sum lakluhna mumal pawh nei lova Central sawrkar ringa kan la nung che che te hian ram inrelbawlna a kan thlen chin chu a tilang chiang ngawt mai.

   Kan hlawkna tur a nih phawt chuan uchuak taka zangnadawmna (Compensation) lak kan hreh miah lo te leh dik leh thianghlim zan lo pawha hamthatna chan kan duhna rilru te hi zo zia leh kan sakhaw inzirtir dan hi chu a ni lo chiang mai. Heng kawngah hian inbihchian kan va ngai em!

  Sawrkar hruaituten mipuite tana thatna tur leh kan hmakhaw ngaia a ruahman, Scheme chi hrang hrang leh programme tha tak tak, kan hman dik loh leh rinawm taka kan tih loh avanga hlamzuih ta hi a va tam em! Rethei leh chanhaite tana sum leh pai leh ruahmanna tam tak, tute emaw duhamna avanga a thlen tur thleng zo lo hi engzat tak awm ang maw?

  Mahni chan ai leh ei ai, thiante pawh pe phal thin hnam kha, tunah chuan a chuh chak chak leh zaktheilote hamthatna ram leh hnamah kan chantir mek niin a lang. Tunlai dan, tia chhuanlam siamin kalphung tha zawk, tihdan tha lo zawkin kan thlak fova, hlemhletna leh eirukna ten kan ram leh hnam min run mek a ni.

  Zir thiamna leh thlantui fara thawktute hnathawh a thlawn fova, mi huamhap leh tlatlum zawk ten nuam an tawl ta zawk mai em ni, a tih theih hial ta mai.

  Hetihrual hian kan ramah hian mi tha leh rinawm, sual kawng zawh duh hauh lo leh ram hmangaihtu, mi tam tak an la awm. Thil sual leh tha lo hi a langsar hma a,insiamthat nan khua a la tlai love. Kan ram hruaituten rinawm leh dik takin ro rel sela, mipuiten kan tih tur hlenin, an hnung zui ila, thil diklo leh tha lo chu hnawl ngam zel ila, kan ram hian hma a va sawn dawn em!

  Kan sawi thin a, thalai rilru a zau tawlh tawlh a, mipui kan fing tial tial bawk a, kan ram hruaitute pawh a fimkhurin an dik ve hret hret zel ni pawhin a lang thei. Kan ram hian hmangaihtu dik tak a mamawh a, kan hnam nun mawi leh kan Kristianna hmanga kan khaichhuah a hun ta hle mai.

  Ngaihtuahna dik leh fim zawka kan kal loh chuan kan hmabak hi a thim hle thei a ni. Kristian ramah hian rinawmna leh dikna tungding tur hian kan vai hian mawh kan phur a ni. Nun depde leh belhchiandawllo kalsanin, ram hmangaihna tak tak nen kan ram leh hnam dinthar turin tan i la thar ang u.
 


Dt.16.11.2014
Aibawk

I VA HLU EM !

   Khawvelah hian tihpalh thil thua piang i ni lo, Siamtu duh dan leh remruatna fel tak hnuaiah khaweng i rawn hmu a ni zawk. Midangte tan thatna leh mawina danglam bik neiin inhre lo mahla, I Siamtu Pathian leh thifahnukchata hringtu che tan chauh tal chuan i buk tawk rangkachak aiin a let sang tam takin i hlu zawk asin!

  Nangmaha theihna awm en khuma, midang chakna leh ropuina i thlir fo avangin i nihna dik tak hmuchhuak turin hun i nei ngai lo a ni mai zawk. Hringnun tlangsang ber leh thlaler ramro paltlang tura hmanraw tul zawng zawng chu Siamtu hian nangmahah a dah kim biai a, nangmah thlak zo tur tumah khawvelah hian midang a siam lo. Nangmah hmang hian ropuina chan tumin Siamtu chuan nitin a thlir ngawih ngawih che a, A tan chuan mi danglam chungchuang bik i ni.

  I rilrua i suangtuahna ang apiang kha midang nihna emaw i tih avangin i khawhar fova. I duhthusam rama in sang i sak a chim rualin beidawn tur emaw i tlat thin. I bul hnai maiah khan i thian rinawm tak nih inpeih reng mi tam tak an awm a nia.

  Dinhmun inchenlohna khawvela chona hmachhawn tir  che hi Siamtu duan dan che a ni tih pawm ngam la. Retheih hi sual a ni lova, a zahthlak ngawt hek lo. Dam khawchhuak tura tumna neih loh erawh Siamtu min siam dan do letna sual a ni zawk. Retheihna phurrit avanga i beidawn hmain chu chona chu hmachhawn phawt la, hringnun zirlai chu zir zawk rawh.

  Mi rinawm lo pakhat i tawn avangin khawvel hi rinawmlohna khawvel a ni lo a nia. I ding leh veiah khan mi rintlak, nangmah ngei pawh ring ngamtu tur che an la awm e. Nangmah i inrin ngam phawt chuan mi rinawm lo zawng zawng chu i hneh let zawk ang a, rinawmna khawvel tha zawk chu i din thei reng asin!

  I thil lo tih tawh te avanga thinhrik i hlawh avangin i beidawng maw? Engmah ni ve lo leh hlutna nei lo ang hialin i inhria maw? Chutiang i ni lo, kun tlat lovin han dakchhuak teh, van dumpawl thiang kuk leh zana arsi eng sep sep te khian insiamthatna hun i la nei tih an lo hrilh ang che. I mihringpuite hian chu hun chu nghakhlel takin an lo thlirpui che a, i rilru i siam fel rualin an lo pawm nghal ang che. I inlamlet rualin lawmpuina chibai buk che an chak asin!

  Utawk hmelchhe ber pawhin lunghlu a hmuam thei ang hian, hringnun bumboh ber leh hrehawmna tinrengah hian zirlai rangkachak a inphum tel thei. Fim takin thlir la, hrehawmna reilote chhawk thei siamchawp thilah inhnangfak tum duh suh. Beidawnna belhchhah tu zawk a ni.

  Thian duh tak, khawvel hi han thlir teh, a mawi asin! I dinhmun leh nihna chu engpawh ni rawh se, i hringnun chu i thil thlir danah a innghat tlat tih hria la, a eng lam zel thlir tum teh. Engkimah BEISEINA sang tak nei tlat la, hun lo taka Siamtu min pek, mahni NUNNA tihtawp hi a pamhmai lutuk lo maw? I DAM hian i hriat phak bakin i hlu a nia !



- Dt.5.7.2015
  Aibawk

HMATIANG KAN SAWN NAN

   Han ti ve khanglang ila, kan naupanlai te kha chuan builukham kakah chawtlang kan chhuang a, uniform kawrkilh tla bang awmchhun kilh sawi nuaihin, tel tak kan in thih mawm ang hlep hlawp a, dar rik hmaa sikul thlen loh hlauin hmanhmawh phelengin kan tlan fua fua thin kha a nia.. Kan khuaa motor lam rawngkai kan hmuh phak chin chu, vang thing tuk bial, ke pathum nei, tawlailir te kha a ni mai a. Chocollate leh ice cream hming pawh hre hauh lo ten aieng hel leh chi chawhpawlh tui ti taka kan liah duai duai thin lai khan kan pum a nat awm ka hre chuang hauh lo. Tunah zawng kan heti zo ta. Khawvel changkanna chuan changkang thei ve awm hmel pawh pu lo thlengin min nuai thle ta lawl lawl mai. Kan umphak ve lo a chha chu a ni e..!

   Tunah chuan khawl ropui leh changkang tak takin hna kan thawk a, kan nunphung leh chetvel dan pawh a dang zo ta. Tunhma chuan chhungkuain tui kan neih loh chuan hmeichhia an mualpho a, buh khamkhawp a awm loh chuan mipa. Tunah chuan tui a harsat chuan PHE kan dem a, buhfai a awm loh chuan Sorkar kan au luai luai mai. Inang tawh lo tak a ni. Hetihruala ka’n sawi tum zawk tak chu, hmasawn zelna atana hmanraw hlui thei ngai lo, hmasang atanga an lo hman thin, tun thlenga hman la tul reng te han sawi kan duh mai a nia.

Taihmakna.....  Ram chang tu darh a, kangvar nisa paldai a, thifa hnukchata buh lu chuh hunlai khan he taihmakna hmang hian hawpkhawp an lo thar a. Khawtlangah mualpho lovin chhungkua an awm ve theih phah thin a nih kha. Thlam chu sawiloh, khiang thing takngial pawh hre mumal tawh lo thalai rual, ruahtui  tlak that leh that loh aia internet speed in an nuna kawngro a sut tawh zawkna te hian hmasawn turin thildang aiin hmasawn nan Taihmakna kan la mamawh zawk cheu. A la hlui lo.

Hmathlir thiamna....  Hmasang, thing leh mau innawh hunlai te kha chuan, kumtirah chhungkaw pa berin a thlawhma lak zawh tawk a hrechiang a, an chhungkaw kham khawp tharchhuahna tur ram a thlang a, kumtluana a hna tur a mithtla lawk thiam a, a hna ah a chiang thin. Chumi tihhlawhtlin nan chuan a tul chuan ramhnuaiah a riak a, khawfingchah rualin sadai ek a hampherh a, nghawngkawl hnum hlarhin chhungkaw ei tur a thawkchhuak thin. Zirlai tum mumal nei lo, zir hun lai taka zirna changkansan tum, lehkhabu aia incheina ngaina, hun lo kal tur aia hun kal tawh thlir thiam zawk thalai rualte hian hmathlir thiamna nen hma kan sawn a ngai.

   Chutihrual chuan thalai, hnathawh kawr nena nitla vanvuaia hna an thawk hmel hmuh chang hian ZORAM hian hmabak beisei tur a la nei a ni, tih min ngaihtuahtir thin. Zirlaiin, hmel pawr chap khawpa a zirlai a chinglet lai vel hmuh chang hian hma kan la sawn dawn chauh ni a hriatna ka nei fo thin. Inhlawhfaa mahni thawmhnaw leh zirna fee te thlenga thawkchhuak thin thalaite zarah hian Zoram hi a dingchhuak ang.Khawvel a changkang zel, kan khua hian hmatiang kan sawn zel theih nan taihmakna, chhelna, hmathlir thiamna te leh rinawmna te nen, puanven sawichhignin hma ila ang u hmiang....


Dt.10.8.2014
Aibawk

HMASAWN NAN ZIRNA

 

   Zirmite chuan, ‘Kan duh emaw, duh lo emaw, khawtlanga kan chenhona ah hian dinhmun  inthliarna (Class system) hi a awm hrim hrim a ni’ an lo ti a. Hei hi a dik thui viau niin a lang. Khawtlangah pawh hian class sang deuh, a laihawl leh class hniam deuh hi kan rilru hian a thliar deuh fo niin a lang. Kan siamchawp leh thliar hran pawh ni lovin pawm tlan dan hi kan nei tlat thin. Chutihrualin mithiam te chuan, ‘ Inthlahchhawnna chi leh kuang (Caste) chu a thlak theih lova, kan dinhmun (Class) erawh chu thiamna hmangin a thlak theih’ an lo ti mek bawk.

  Hemi atanga thil pawimawh tak kan hriat theih chu, mi rethei, khawtlang ah pawh mi hmuh hniam ni mahila, lehkhathiamna hmangin mi pangngai leh class sang zawkah kan invawrh thei tihna a ni. Hetiang mi hi India rama kan mi hmasa leh mithiamte zingah sawi tur tam tak an awm. Khawi hmun leh khawi ramah mah lehkhathiam hi hmuhsit theih an ni ngai lova, an nunin zir vak lemlo mahse a hranpain class an nei tlat tho thin. Zirna hi mihring min tihmasawntu leh khawtlang leh ram siamtu a ni reng dawn a ni. Hetiang a nih avang hian tunlaiah zirnaa inelna a sang tawh em em a, a thiam ber leh thei ber nih tumin nu leh paten an fate zirna lamah an tanpui a, khawtlang leh ram an inel mup mup tawh a ni tih kan hriat a tha khawp mai.

   Kan khua bikah inen chiang ta ila, zirna lama kan dinhmun hi enge ni chiah? Kan tha em? A dik tak chuan harsatna leh thildang engemaw bik avang ni lova, sikul chawl (dropout) an tam viau na khua hi khaw chankang tak a ni lo tlangpui. Kan khuaah pawh zirna lamah thahnem kan ngai a, H/S mai duhtawk lovin rualawhna avangin HSS te kan han din chhova, hei hi thil lawmawm leh khawdangte kan elna thil tha tak a ni. Chutihrual chuan zirna boruak tha kan din a tul. Tuna kan dinhmunah chuan nu leh paten kan fate kan enkawl dan leh zirna lama thahnem kan ngaihpuina hi chu a tawk lo deuh niin a hriat theih. Lehkhazir aia a behbawm vela intlakral kan tam tan ang tih a hlauhawm khawp mai. Zirna ina zirtirtute hmalakna tawiawm tur kan nih laia naupang rilru tichhe thei lek lek a tawngkam kan hmang leh zauh thin te, Sikul inenkawlna palzuta kan fate an awm changa, zirtirtute hmalakna vui pui lek leka kan awm thin te hian, kan hriat phak bakin naupang nun leh rilru sukthlek kan tichhe thei a ni tih kan hriat a tul khawp mai. Kan chhungkuaah zirna boruak kan siam thiam pawh a tul khawp ang. Engpawhnise, zirna lama kan hlawhtlin theih nan a hunlai hian tan kan lak zel a tul hle mai. Thil dang zawng aiin kan fate zirlai leh an dinhmun hi kan ngaihven a hun ta hle a ni.

   Kan tarlang tawh thin a, lehkha zir hi sorkar hnathawhna tur ringawt a ni lem lo, mihring nuna mi puitling kan nih theina tura min chhertu a ni mah mah zawk. Khawtlang leh ram tana mi chhenfakawm kan nih theihna tur te, tangkai zawka midangte tana kan inpek theihna tur te, ram leh khawtlang kalphung diklo te siamtha a, khawvel tha zawk din zel tura min siam puitling tu tur a ni. Khawvel a changkan zel rual hian mithiam mamawhna a sang chho telh telh dawn a, chu mamawhna phuhru hnem thei khua leh ram apiangin hma an sawn nasa ang. Kut hnathawk tur te, sumdawng tur te, infiamna lama kal tur te leh hnathawh kawng tinrengah lehkhathiam hlutzia a lang thin. Pathian rawngbawl tur pawhin, inpekna inang rau rau ah lehkhathiam an tangkai nge nge zel.

  Kan khua hian hma kan sawn lehzual theih nan zirna lamah rualel lehzual ila, mithiam tam zawk chherchhuak turin intlansiak ila, zirna boruak tha siam deuh deuh ila hun kal zelah khaw hmasawn leh ropui tak kan la ni thei ngei ang. 

    

Dt.23.11.2014

Aibawk

ENG SULHNU NGE I HNUTCHHIAH DAWN..?

   Thal laia romei zam chiai thin te leh chhimbal mawi taka zam kual reih te, boruaka an zamral thin ang hian, hringnun pawh hi engtikah emaw chuan a a la zam ral ang an ti.. Chutiang hunin min nanchin hunah chuan tu’n nge min rawn hre zui tawh ang le..?


Hlun lo tur Hringnun...
    Khawvela lehkhabu rintlak ber, Bible meuhin mihring nun hi chhum reilote lo lang a, ral leh ta ang lek hian a tehkhin miau si a. Ni e, hringnun hi a tlo lova, a kumhlun lo a ni tih hrechiang bertute chu tuna damlai mek te hi kan ni. Silai mu sur tuar tuar leh chemsen nena indona muala damchhuak thei khawpa tlo hringnun hi, lehlamah chuan zankhat chil lem sual avang maia chatthla mai thei khawpa tlo lovin siamtu hian a lo duang lawi si a. Engpawhnise, reilote atan khawvelah hian dahin kan awm a ni chauh zawk si.


Thi hnu minung...
     Dam hlutna chu kan dampui mihringten min ngaihsaka, kan thiltih min hriatpui a ni, tih hriatna hi a ni. Thihna erawh chuan chu chu a hmet mit thin a, khuareiah chuan kan chanchin hian sawizui a hlawh tawh lovang a, khawvelah hian hun engemaw lai chuan kan lo awm ve a ni tih pawh  hi an la rawn theihnghilh zui mai angem?

  Mahatma Gandhi chu a thih hnuah pawh ‘Hnam Pa’ tih khawpin kan la chawimawi a, a hmalakna ropui leh a thiltih chhuanawm tak avangin India ram a awm chhung chuan kan  theihnghilh tawh lovang. Mother Teresa chuan a thih hnuah pawh mi tamtak thinlungah thu a la sawi reng mai. Mi hang annih mai avanga hmuhsit leh cheksawlh tuarte tan chuan Nelson Mandela tluka ropui an awm thei ngai lovang a, a taksa chu tawih ral tawh mahse an thlah kal zelte hnenah a hming hi an sawi bang thei ngai lovang. Kum sanghnih chuang liamta a, Kalvari tlanga Rom sipaiten an khenbeh taka pawh khan tun thleng hian khawvelah ram lak a la thulh thei lo chu a nih hi..!

 Enge i hnutchhiah ve ang le..?
     Nunna nei zawng zawng dam hlen an awm ngai lohna khawvel hi, damin kan paltlang bik a rinawm loh. Engtikni ah emaw chuan kan pualin thlahna hun hnuhnung hi hman a la ni ang a, tawih ral tura phum kan nihna hmunah chhinchiah nan chauh thlan lung phun a la ni ang. Chutih hunah chuan engtinnge ka chanchin hi miten min la sawi ve ang? Khawtlang, ram leh ka mihringpuite tan eng thil entawntlak nge hnutchhiah ka neih ve ang le? Ka hming an sawichhuah chang apiangin engtinnge min sawi zui ve ang? Ka mihringpui damlaite tan eng ang hriatrengna nge ka hnutchhiah ang?

  Hringnun khawvela arsi eng tak tak lo lang thin te zar zovin ram ropui tam tak chuan nun nuam zawk an hmang mek a, ram hruaitu ropui tak tak te sulhnu avangin an thlah ten malsawmna rah an tlan mek asin. Khawtlang tana thahnemngai leh pawl tana mi inpe tak tak, mual liam tawhte avangin tunlai chhuante hian nihlawhna tam tak kan chang bawk a nih hi.

  Kan Pathian hian awmze nei lo leh sulhnu tha hnutchhiah lova liam leh mai tur hian khawvelah hian min dah a rinawm loh. Midangte tana malsawmna ni a, chhungkua, khawtlang, ram leh hnam tana kan phak tawk zel a mi tangkai ni tur hian min siam a nih hmel zawk. Chutiang ngaihtuah nachang hre lova, hringnun hi awmze neo lova hmang liam apiangin hriatzui an hlawh lo mai dawn niin a lang.




Dt. 24.8.2014
Aibawk

🎂HAPPY 35th BIRTHDAY TO NGENTIANG BRANCH YMA🎂

Ngentiang Branch YMA kum 35-na champha kan thleng thei hi a va lawmawm em!

Khawvel hi changkang er tawh teh mah sela kan kiangah hian tanpui ngai tanpui tur an awm reng ang a, kan la thi zel dawn tih hi thudik awm sa a ni. YMA hian sel, rel, er leh hek tawk thin mahse,lusunte hnema, hmeithai thlamuan a, thlankhur luhchilh a, vantlang thatna tura kawmkar hrut chhuak tur pawl dang kan la nei rih lo.

Mizo min thuikhawm a, ram leh hnam humhalh turin he pawl aia inhmeh leh chuang tur a la piang rih lo bawk.

 Ngentiang Branch YMA hi hman ata tawh, khawtlang muantu, tlawmngaihna chhawm nunga thangtharte kawng sialtu a lo ni tawh thin a, chu chu a taka hmu tu te kan ni. Kum 35 nung taka pawl hruai tur hian hruaitu hmasaten awmze neiin thangthar an chher chho zel tih a lantir a, thangthar chhuan lo la awm zel turte tana vawiin hun kan la pe zel thei hian tuna hruaitute ropuina pawh a tarlang.

'Kohhranah a thu-in Kristian nun dan tur kan inzirtir a, YMA ah a takin kan thawkchhuak thin' an lo ti. Vawiin hi Ngentiang khawtlang tihmasawna, thian thianghlima, thangthar lo awm zel turte tana Zo nun ze mawi chawm seilian tura ke chheh kan siamrem thar ni lo ni teh se.

Kan hmabak tih tur awmah hruaitute kawi kawm thin ang thapa lungrual a, hmai hnih nei lova thudik tan tlang rap ngam a, YMA zahawmna humhim tura sawi tur chin, tih tur awm tak leh mahni zahawmna tibawrhbang lova kal kan siam tanna ni lo ni bawk teh se.

He pawl ropui hi kan tihminghliau phal tur a ni lovang a, ngaihnep turin kan siam tur a ni hek lovang. Ngentiang Branch YMA hian a kalphung neih sa, midangte thlamuan thin tu, tlawmngaihna leh taimakna vawng nung a, khawtlang nu leh pa nih tling, a lo nih thinna chu tipar vul zual zel teh se...

Hlim takin hun hmang ang che u....YMA vul zel rawh se....

Dated Aibawk
The 12th July 2018