KA TAWNGTAINA

Khawngaihtu,
Chatuanin i ta ka ni, Kalvaria kross thisen avang khan,
Mana lei ka ni min tuarsaktu avangin, Lawmthu ka hrilh che, Hmangaihtu,
Kemah vanga thlaphanna rapthlak tuartu chuan,
“Ka hmangaih che, ka ta i ni” min ti, Min hmangaihna a va hlu em!
LALPA, lawmthu ka hrilh che.

Hringnun kawng chhuk chho ka zawh mek lai leh,
Sual avanga hliam na tak ka tawrh mek lai te,
Thlaphanna thlipuiin min nuai lai hian Isu,
Ka tana kross chunga i thlaphanna rum ri chu min hriattir leh rawh!!
Sualna avanga mualphona leh zahna nasa tak ka khum lai hian,
I hling lukhum khum chu min hriattir leh ang che.
Ka sualna avanga khawhar leh mal taka ka auh lai che hian,
Kross chunga khawhara kalsan i nih lai kha min hriatchhuahtir ang che.

Ka neih zawng zawng leh keimah pawh hi i ta a ni,
Malsawmna ka dawn zawng zawng pawh hi i hnena mi a ni. Ka lawm e.
Boruak thianghlim, hriselna, chhungkua, then leh rual min hmangaihtu, Kohhran ropui leh
Khawngaih rawngbawl hna min pekte hi ka phuloh malsawmna min pek a ni.
Lawmthu ka hrilh a che.

I kawng min ruatsak, hriatthiam rualloh, i remruat dan hriatthiam theihna thuruk
Min pek te hi malsawmna ropui danglam bik a ni, Ka lawm e.

Ka tana i hnathawh ropui takte, i malsawmna zawng zawngte avang hian :-
I tan enge thawh ka neih ve?
I tan enge chan ka neih ve?
Enge ka hlan let ve che?
I tan eng tawrhna nge ka hmachhawn ve?
I thatna chhirsen rualloh tem ve tur hian tutenge i hnenah ka rawn hruai ve?
I hmangaihna aw hi vawi engzatnge ka hnar?
Ka nun hian vawi engzatnge a hel san tawh che?
Ka sualna leh thathnemlohna zawng zawng avang hian min ngaidam ang che.

Vawiinni atang hian i tana thih huama nung tawh turin min pui la,
Nangmah avanga tawrhna a tam apiangin,
Ka nun hi lawmna in a luangliam thin dawn a ni tih min hrilh fo la,
Nangmah avanga tuar ngamloten hmelmapa avangin an tuar dawn tho a ni tih min hrilh fo ang che.
Boralna khawvelah hian nun tuihal rehna i dah lo a ni tih min hriattirin,
Khawvel hi a chaknate chawpa boral mek a ni tih min hriattir zawk ang che.
LALPA, nangmah avanga chan hnem apiangin i hausakna thuruk an hmufiah thin
Tih theihnghilh lo turin min pui ang che.
Chapona sual avanga ka theihnghilh dawn ai che chuan,
Khawvel ngaiha dinhmun chhe berah pawh min dah zawk ang che.
Eng dinhmun hnuaiah pawh lawmthu sawi theihna thuruk
Ka zirchhuah theih nan ka nunah harsatna min pe fo ang che.
I fa ka nihna ka hriatreng theih nan tul i tih ang zelin min thunun thin la’
Nangmah rinna a ka lo thanlen theih nan hun harsa ah min hruai lut fo la,
I hnenah lo chuan kalna tur dang ka nei lo tih hi
Englai pawhin min hriattir fo ang che.
Nang chu ka nunna, ka damchhan leh ka chatuan chanvo i ni si a!

                                -Rintea (Dt.29.1.2009)