Kum 102 kalta vawiin angah khan Tirhkoh Patlaia leh Kuaichika te nen, Kaishi panin Zosapthara te chu ramhnuai kawngah an kal a. A lo kal fâl deuh a, kawng peng ṭhuam dik lo zawhin a bo ta a. Chul thlâmah Maite ringin, ruah sur hnuaiah zankhuain thosi chawah a ṭang a ni awm e. Tichuan, he hla hi a lo piang ta a ni;

Thlalera vak ka lo nih hi,

Ding leh vei bo tawnin,

Ka pa in a lo hnai a ni.

Tiin ka ngaihtuah ṭhin.

     Kan Missionary te zinga Mizote min ngaina fâl nalhtu, kan ram ngeia lu nghah tum ngat, Mizo ngei nupuia nei, mahse mualpho taka a hna aṭanga bân tak lawi si Zosapthara'n, kan hnam tana rohlu min hnutchhiah zozai avang hian kan la lawm tawlh tawlh dawn a ni!

Pathianni nilen nuam u le..🤝

Aibawk, 20th July, 2025

     Indopui 1-naa France ram kal tur Mizo tlangval rual 2000 vel zet, Sipai lammuala intlar pût mai chu pa pakhat chuan a thlir vung vung a; "Khuti zat pa te chu tu pain nge maw do zo ang le? German paho chu an rethei dawn nak nak teh e", a ti e, an tia lawm. Ama thlirna aṭang chuan a demawm hauh lo. Mahse, Mizoram lo hi ram ropui leh sipai ngah an tam tih erawh a hre pha lo mai zawk a ni.

     Mahni rilru mil leh chim chin aṭang zel hian thil hi kan thlir a; kei aia fing, ngaihtuah zau, hre ril leh tawn hriat ngah an tam tih te; ka thlirna ang ni lo thlirna tlang dang hi a awm ve a ni tih te; englai pawhin a lai takah ka awm reng thei bik lo, tih te hi ka hriat reng loh chuan ka lo inngaihlu leh mai ṭhin!

Mahse, he zirlai hi a har ngawt mai! 

Nilen nuam u le..👌

Aibawk, 19, July, 2025

 

   RK Lianzuala khan, "Chapo hi chu mahni leh Isua hriat chian loh vang a ni tlangpui" a tia lawm. 

   Petera khan Isua ke bula amah a'n inen meuh kha chuan, "Misual ka nih hi, min kalsan rawh" a ti ruai mai a.

   Isaac Watts pawhin;

'Isua Kraws mak tak chungah khan,

Ropuina Lal thi ka hmuhin,

Ka hlawkna ber ka ngainep a,

Chapo, uanna ka ngaitlawm a',  a ti láwm láwm mai bawk a! 

   Isua hnaih leh hre chiang apiang hi an tlawm raih raih zel zawng a nih hi! 

   Mahse, he zirlai hi a har ngawt mai!

Pathianni hman nuam u le..🤔

Aibawk, 13 July, 2025

     China chuan an ram mihring pung zel thununna tur ruahmanna a siam a; an hlawhtling khawp mai. Kum 2023 khan mihring tam lamah India-in a lehpel der a; pung turin ṭan an la leh mek lawi a. Japan ram pawh hi tun hnai kum 14 chhung a hniam zawngin an kal char char a, an piang pung lova, tar an tam hle bawk. Nakin lawkah chuan an la thawl hawk maithei. An zirna in sangah te inngaihzawnna lam hawi programme te an buatsaih ni awm tak a ni!☺️ An mangang ve leh ṭan a ni maithei bawk.

   Khawvel mihring tluklehdingawn 8 chuangah Mizote hi nuai 10 kan chuang tam  lo; kan tlem a nia aw! Kan ram kan luah zo lova, kan piang pung lo hle bawk. Nupui pasal neih kan peih lo tial tial a; naupang pawh kan tlem telh telh. Ṭhalaiten inneih harhna chan kan mamawh a; fa neih tam lamah ṭan lak a ṭul hle bawk.😁

World Population Day chibai u le..🤝

Aibawk, 11th July, 2025