YMA inkhawmpuilian rorêlah, Mizoramah chi bil hmalakna a awm tawh loh nana hmalak, an rel a. Kumpuan atan 'Ruihhlo do' thlan a ni.

Kan ramah chi bil pathum an invalh hrang tawh a, tih theih kan nei tawh lo; 'a pawi' tih bak chu! Hmar hnam unaute lungawilohna rei tak kan tuar leh a, kan intuam dam a. Tun ṭuma, 'Chengkawlawn Rûn' chhung aṭang ngeia hnam bila hmalak tawh loh chungchang rel a ni hi a inhmeh a, awmhmunah kan lo lawm ve hle phawt e. 

Kan ram leh hnam humhim tur hian luankawr khata kan luanza a ngai a, chu luankawr awm chhun chu YMA hi a ni. A bak eng pâwlahmah Mizote hi kan inlungrual lo. Kan ram dam nan YMA hi a vul zel phawt a ngai a ni..🇾🇪

'Unau kan indovin tunge ding chhuak thei ang?

Suihlung rualin, insuihkhawm ila;

Chuti'n khuavel kan chhing ngei ang'

Nilen nuam u le..🫶

Aibawk

24.10.2025

Kumin 'World Book Day' khan, Hungarian ho khu lehkhabu chhiar nasa, Library pawh ngah; an ram mipui tlem aia Nobel Prize dawng tam an nih thu Status lamah kan tarlang kha a nia. Kumina Nobel Prize for Literature dawngtu chu Hungarian, László Krasznahorkai a ni leh tlat! Hungary ramin Nobel Prize an dawn 16-na a ni awm e.

Kan YMA Library te chu lehkhabu chhiar peih leh ngaihventu an awm loh avangin kan khar ṭhiap ṭhuap a; a hawn hun mumal taka ruahman pawhin awmzia a nei ta lo! Hawhtu an awm tlat lo; manganthlak tak a ni!

Hnam tlem, inchhiar zau si lo, a nâwlpui ngaihsan zawng ningnêl bawk si; Industry aia Picnic Spot ngah, he ram hmabak hi a ngaihtuahawm hian ka hre mange..🤔

Nilen nuam leh phawt mai u le..👌

14th Oct.2025

Aibawk

 

Buh seng a hun a, boruak nawm leh mawi hun lai ber a inher chhuak leh ta! 

Ṭhiana @ Francis Renthei, thlalak ka hmuh rual hian Wordsworth-a poem, 'Solitary Reaper' kha rilruah a lo lang viai viai a..😌

Behold her, single in the field,

Yon solitary Highland Lass!

Reaping and singing by herself;

Stop here, or gently pass!

Alone she cuts and binds the grain,

And sings a melancholy strain;

O listen! for the Vale profound

Is overflowing with the sound.

Pu Wordsworth-a sawi ang khian, nakin lawkah, buh seng pahin tleitiri lungleng a la rawn zai riai riai angem? 

Nge 'Buh seng hun a liam a, chhandamin kan la awm lo' kan ti zawk dawn..? Lalngaihzual 😢😃

Dated Aibawk

The 8th Oct. 2025

 

'If I were damned of body and soul,

I know whose prayers would make me whole,

Mother o' mine, Mother o' mine'

-Rudyard Kipling

An mamawh tinreng chhanna ni turin an kiangah a awm reng ṭhin a; zawhna chhan sen loh a chhan a ngai fova, an hmaa dawhkana eitur a chhawpsak theih nan rim takin a thawk ṭhin. An hlimna tur a nih phawt chuan tawrh tur zawng zawng a tuar mai zel a, a fate hlim hmel chuan a nâtnate a theihnghilhtir ṭhin si a ! Fate mangan leh natna avanga ṭawngṭai nasa ber chu amah tho hi a ni fovang! Nu leh pa nihna rau rauah dinhmun inthleng tur nise, a mawhphurhna hi ni khat pawh ka tlin ka ring ngût love...

Nu ber Birthday lawmna kal zel...🤔

Aibawk, 16th Sept.2025

 

'Caught in Providence' aṭanga ka hmelhriat, American jugde, Frank Caprio chu nimin khan a lo boral reng a, tunah ka hre ve chiah mai.😢 Khawvela ka mi ngaihsan te zinga tlar hma lam luah reng tawh tur a ni!

A court room che vel inringtawk tak te, midang a hriatthiamna thuk tak te, midang pheikhawk buna an dinhmun a thlir thiamna te, rethei ber mit aṭanga thil thlir tlat mi a nihna te, a mihringpui tupawh, a hmaa dan bawchhia ding te ngei pawh a zah thiamzia te, mi inngaitlawm tak mai a nihna te, mi inchhiar zau tak a ni tih hriat taka thil a sawi chhuak ṭhin te leh, fiamthu zangkhai hmanga midang a fiam ṭhin te hian min hneh ṭhin a. A video ṭhenkhat phei chu mittui tla deuh roha ka en ṭhin thu te ka'n inpuang pah teh ang! Amahah hian zir tur a tam a, ka idol pakhat a ni ve takmeuh asin le...!😢

Ka ui hle mai che, ka pu..

Muangten chawl ang che..🙏

Dated Aibawk

21.8.2025

 

     Kum 102 kalta vawiin angah khan Tirhkoh Patlaia leh Kuaichika te nen, Kaishi panin Zosapthara te chu ramhnuai kawngah an kal a. A lo kal fâl deuh a, kawng peng ṭhuam dik lo zawhin a bo ta a. Chul thlâmah Maite ringin, ruah sur hnuaiah zankhuain thosi chawah a ṭang a ni awm e. Tichuan, he hla hi a lo piang ta a ni;

Thlalera vak ka lo nih hi,

Ding leh vei bo tawnin,

Ka pa in a lo hnai a ni.

Tiin ka ngaihtuah ṭhin.

     Kan Missionary te zinga Mizote min ngaina fâl nalhtu, kan ram ngeia lu nghah tum ngat, Mizo ngei nupuia nei, mahse mualpho taka a hna aṭanga bân tak lawi si Zosapthara'n, kan hnam tana rohlu min hnutchhiah zozai avang hian kan la lawm tawlh tawlh dawn a ni!

Pathianni nilen nuam u le..🤝

Aibawk, 20th July, 2025

     Indopui 1-naa France ram kal tur Mizo tlangval rual 2000 vel zet, Sipai lammuala intlar pût mai chu pa pakhat chuan a thlir vung vung a; "Khuti zat pa te chu tu pain nge maw do zo ang le? German paho chu an rethei dawn nak nak teh e", a ti e, an tia lawm. Ama thlirna aṭang chuan a demawm hauh lo. Mahse, Mizoram lo hi ram ropui leh sipai ngah an tam tih erawh a hre pha lo mai zawk a ni.

     Mahni rilru mil leh chim chin aṭang zel hian thil hi kan thlir a; kei aia fing, ngaihtuah zau, hre ril leh tawn hriat ngah an tam tih te; ka thlirna ang ni lo thlirna tlang dang hi a awm ve a ni tih te; englai pawhin a lai takah ka awm reng thei bik lo, tih te hi ka hriat reng loh chuan ka lo inngaihlu leh mai ṭhin!

Mahse, he zirlai hi a har ngawt mai! 

Nilen nuam u le..👌

Aibawk, 19, July, 2025

 

   RK Lianzuala khan, "Chapo hi chu mahni leh Isua hriat chian loh vang a ni tlangpui" a tia lawm. 

   Petera khan Isua ke bula amah a'n inen meuh kha chuan, "Misual ka nih hi, min kalsan rawh" a ti ruai mai a.

   Isaac Watts pawhin;

'Isua Kraws mak tak chungah khan,

Ropuina Lal thi ka hmuhin,

Ka hlawkna ber ka ngainep a,

Chapo, uanna ka ngaitlawm a',  a ti láwm láwm mai bawk a! 

   Isua hnaih leh hre chiang apiang hi an tlawm raih raih zel zawng a nih hi! 

   Mahse, he zirlai hi a har ngawt mai!

Pathianni hman nuam u le..🤔

Aibawk, 13 July, 2025

     China chuan an ram mihring pung zel thununna tur ruahmanna a siam a; an hlawhtling khawp mai. Kum 2023 khan mihring tam lamah India-in a lehpel der a; pung turin ṭan an la leh mek lawi a. Japan ram pawh hi tun hnai kum 14 chhung a hniam zawngin an kal char char a, an piang pung lova, tar an tam hle bawk. Nakin lawkah chuan an la thawl hawk maithei. An zirna in sangah te inngaihzawnna lam hawi programme te an buatsaih ni awm tak a ni!☺️ An mangang ve leh ṭan a ni maithei bawk.

   Khawvel mihring tluklehdingawn 8 chuangah Mizote hi nuai 10 kan chuang tam  lo; kan tlem a nia aw! Kan ram kan luah zo lova, kan piang pung lo hle bawk. Nupui pasal neih kan peih lo tial tial a; naupang pawh kan tlem telh telh. Ṭhalaiten inneih harhna chan kan mamawh a; fa neih tam lamah ṭan lak a ṭul hle bawk.😁

World Population Day chibai u le..🤝

Aibawk, 11th July, 2025

 

    Facebook-ah, Aizawl Tennis Court leh a chhehvela Inrinni chawhmeh zuar nuho leh dan kengkawhtute innawr vel lai kan lo hmu a. Chawhmeh zuar ṭhenkhat mittui tla te; police, an hna a nih avanga duty, anmahni khawngaih ve hmel tak tak tho te; an vai mai khan an khawngaihthlak a ni ber mai!

   Kan ramah chuan thil hi a nih dan tur lo zawk, a nih dan tur emaw tih kan ngah tawh lutuk a; dan anga hma han lak dawn a, a dan bawhchhetute zawkin khawngaih thla an lak tawh zawk mah châng a awm fo mai. Kalphung fello, ngaia kan neih tawh si nghawng hi kan tuar tlâng fo a nih pawhin a mak lem lovang, mumal loh hi kan mumal dan ber emaw tih mai tur a nihna kawng hi a tam mai. Chinfel ngai hi a va tam tak! 

   Engpawhnise, 'Remna Ni' nilen nuam phawt mai u le..👌👌

Aibawk, 30.6.2025

    Kum 50 kalta vawiin ni angah khan, khatih laia India PM, Indira Gandhi khan National Emergency a puang rup mai a nih kha! India danpui châng 352 hnuaiah Emergency hi puan theih a ni a, puan a nih tawh chuan dan pui hnuaia dikna chanvo, thuneihna insemna dan, zalênna hlu tak tak leh mipui sorkar kalphung dang te chu hlih nghal vek a ni ṭhin. Ram nuam tak kha ram hrehawm takah a inlet thut tihna a ni ber ang. Indian Political History-ah a vawi khat thlenna a ni a, a thleng zui ta rih lo.

   Ram tam tak hi chu India rama Emergency puan lai ang reng kha an ni mai a; an tawrhna hi rapthlak tak a ni. A bikin naupang leh hmeichhiate an khawngaihthlak zual ṭhin! Vawiin hian ngaia kan neih leh kan chan thil tam tak hlutzia hi kan chhut ngai em?

Nilen nuam u le..🤔

Aibawk, 25th, June, 2025

 ISRAEL Vrs IRAN

Vawiin hi Israel leh Iran indo ni 7-na a lo ni ta reng mai! Ni 13.6.2025 (Zirtawp) zingkar khan Israel chuan Iran Nuclear siamna hmun te a bei thut mai a nih kha!

US President, Obama hunlai, kum 2015 chho khan Iran Nuclear Deal hi an buaipui nasa a, Iran ram leh China, France, Russia, UK, USA (P5) + Germany & EU ram ṭangrual chuan July ni 14, 2015 khan he inremna hi an khawr pum a; hmalak dan tur, Joint Comprehensive Plan of Action (JCPOA) an  duang bawk a. Iran-in Nuclear bomb a siam  loh nana vil dan tur te an siam a, a vil hna pawh International Atomic Energy Agency (IAEA) bawhzui turin an dah a. Anni hian Iran Nuclear Plant chu mumal takin leh zing takin a endik ṭhin ang a, Iran Sorkar chuan engmah zep nei lovin engkim a hrilh zel bawk ang a, IAEA lamin mumal takin report te pawh an siam zel tur a ni a. Tin, Uranium Enrich zat tur pawh a tam berah 3.67% turin an sawi fel vek a ni. 

Hun engemaw chen an han kal a, Iran chu a inhawng lo tial tial a, a rukin Nuclear bomb neih dan tur a dap chho ta ngar ngar thova; tin, an inremna anga IAEA hnena puanzar duh loh tam tak a nei, niin US chuan a ngai a ni.  Hei hi Iran hmelma hlun, Israel tan chuan mit timimtu kumhlun a ni chho ta a, Nuclear ralthuam an peih fel hma ngeia Iran tihtlawlh tumin a phi sek lo thei ta lo a ni.

Donald Trump-a hun a lo thleng a, Iran lah chuan Nuclear inremna chu a palzût zui ta zel si a; US chuan inremna awmze nei lo kalpui reng ai chuan tiin, kum 2018 khan a inhnukdawk ta hial a. Iran Nuclear inremnaa a thusa ber, US a inhnuhdawh takah chuan, a thu lama inchinfel an tumna chu awmze nei lo a lo ni chho ta a ni. Chutihlaiin US President an inthlak a; Joe Biden, mi nêm chi a lo lang a, ani hunlai hian Iran hian thui tak Nuclear ralthuam sawngbawl hna hi a kalpui ang, tih hi a rinawm a, chu chuan Israel mawng a tiza zual a, Iran Nuclear sawngbawlna hmun tihchhiat theihna hun remchang zawngin a phi ta ruai mai a ni.

Joe Biden thlakin Donald Trump chu 2024 kumtawp inthlana a lo chak leh a, President a rawn nih leh hnuah pawh, Iran Nuclear Deal thar thawh leh ai chuan tuna a kawng harsa lam hi zawh turin Israel mawng a hiat a ni ang, tih hi a rin theih hle. A chhan chu USA hi Israel ang thova Iran-in Nuclear ralthuam a nei ang tih hlau ber te zinga mi a ni bawk a; Israel kuta rul kaw zen a tum ang te pawhin a sawi theih ang. Tichuan, Iran-in Nuclear ralthuam a neih lohna tura kawng awm chhun Israel hian a thlang ta a, a chhu ta nghek mai a ni, tiin a tawi zawngin a sawi theih awm e. 

Kawng lehlamah chuan, mahni'n nei fel tètè-a, midang nei ve tur dan tlat hi a zia lo, ti zawng pawhin a ngaihtuah ve theih tho bawk ang. Mahse, hmanraw inang reng hi a kawltu a zirin a hlauhawm hlei hle bawk si a nih awm hi! Iran te ang, Muslim ram, rik phut nei leh firfiak tamna ramin Nuclear hmanrua a kawl chu khawvel tan leh, a bik takin Israel tan chuan a thiang lo a ni tawp mai ni! Tuna Israel-in a bei ta pawh hi thil chhut thiamte chuan mak an ti lem lovang, a chhan chu thil a inmung rei tawh a, Israel pawh hian puitu a neih ṭhat ber lai, Israel ṭan rumrut mai, Donald Trump-a thlazar hnuaia rusum thlak hi hun remchang ṭha berah a ngai a ni ber mai awm e. Tarlan tawh angin tun ṭum buainaah hian US hian a tawp thlengin Israel hi a pui ang tih chu thil chiang sa a ni, a chhan chu, Nuclear ralthuam Iran-in a puitlin vaih chuan a pawi ti ber turte zinga mi chu US hi a ni tlat a ni. Vawiin hian US chuan Israel ram dep, Jordan lamah an jet fighter neih ṭhat, F16, F22,F35 te a chhawp ṭan ta bawk.

He indona hian eng chen nge a awh ang a, engtianga lianin nge vùng a chhuah zui zel dawn tih erawh hunin a la hril ang chu! Engpawhnise, tawng ataka insawiṭhaih chiam chiam lovin, thil nihna te hi zirchian a, chik zui ve zel hi a ṭha awm e.

Khawvel buai tak karah hian nilen nuam leh phawt u..🤔

Dated Aibawk

The 19th June, 2025

    Kumin YMA Day chu Pathianni a nih avangin, vawiin (Inrinni) hi YMA Day lawmna hun atan kan hmang fur awm e. Keini, Aibawk Branch YMA pawhin vantlang hna ṭul hrang hrang thawh nan chhun lam hun kan hmang a; zan lamah programme kan la hmang leh ang.

     Mizoram Governor pawh lo ni tawh, AR Kohli khan, "YMA hi hming namên a ni lo, hming zahawm tak a ni" a lo ti ve hial a. Ani hi YMA ziarang hrechiang tak tur pawh a ni ang. Engpawhnise, Hindu-pa, mi zahawm tling phakin heti taka YMA a hmu zahawm mai hi a lawmawm mange.

    YMA hnathawh 80% vel hi chu midang tan, nunau thlamuan nan, khawtlang thianghlim nan, harsa ṭanpui nan, ram leh hnam tan, tih lam hawi deuh vek a ni hial ang. Hlimhlawp leh inchhekarbawmna lam a awm mang lo. Pawl tihphuisuina tur leh insawhnghehna lam atana tha leh sum sên te chu tam tak a awm ve bawk ang; chu pawh chu vantlang mipui tana malsawmna an nih theihna tur hmanrua a la ni tlangpui zel.  Mahni hrehawmna leh harsatna ngaihthah a, mihringpuite tana inpêkna hi Pathian malsawm duhzawng tak a ni reng. Mizoram tan YMA hi a vul zel a ngai a ni!

YMA vul zel rawh se..

Nilen nuam u le..

Aibawk, 14th, June, 2025

    Hman deuh khan Syria buainaa bomb puakin a per, naupang hliam na tak chuan, damdawiina an bawihsawm mek laiin, "Vanram ka thlen hunah Pathian ka hrilh vek ang" tiin a thi zui a, lung a tichhe ngawt mai! Tun hnaia UN Assembly-a thu a sawinaah, Palestinian palai, Riyad Mansour chuan, Israel-in kumin March thlaa inkahhai hnuhnung ber a tihtawp hnu khan naupang 1300 an thi tawh a, 4000 velin hliam an tawrh thu a sawi a; a hnuk a ulh ṭeuh mai!

   Puitling hi chu engpawh a nia, naupang pawisawi lo tawrhna hi en liam a har ṭhin a ni! Naupang hlim hmel hmuh tluka nuam a awm lo ang hian, naupang lungngai leh hrehawm tuar hmel tluka rilru tihrehawm thei thil a awm chuang lovang!

    Hléilenna tuar naupang pawi sawi lo te ni (International day of Innocent Children Victims of Aggression) ah hian, nilen nuam ule..👦

Aibawk, 4.6.2025

 

    Tun ni 3/4 (Ningani - Pathianni) chhunga ruah sur chu a va tam tehlul em! A hân thei tawh dawn lo emaw tih mai tur alawm mawle! IMD in a tarlan danin Inrinni thlenga ruah sur kha, tun ang huna ruahtui tlak dan pangngai aia a tlak tam zawng tehnaah, India hmar chhak State zingah Mizoram a sang ber. A pangngaiah 9.8 mm vel tla turah 117.8 mm vel a tla a ni awm e. A punna hi a turu hle!

    Ruahtui tlak dan pangngai aia heti taka sanga a tlak chuan, keini ang, tlang ram leh leilung nghet bawk si lo te hi chuan ni rei kan dawl lo tawp tih a lang nghal mai bawk a. Ni 2/3 sur belh zui leh se a manganthlak zual ngawt ang. Tun ṭuma ruah sur dan hi kan kawng, leilung, in sak dan leh economy nen hian a inmil hlawl lo a ni ber. Mahse hei, vawiin lam aṭang chuan a zia ve deuh tawh turah ngai phawt ang. 

Nilen nuam leh phawt ule..⛈️

Aibawk, 2.6.2025

      India PM, Indira Gandhi Principal Secy., PC Alexander, (IAS) khan a lehkhabu ziah, 'My Years with Indira Gandhi'-ah khan Pi Indira-i invawn felzia a sawi a. 'Ram dang tlawha kan zin dawn te hian, a hun leh hmun mila a saree kaih tur, a hmaa a ruahman fel sa chu suitcase-ah a indawtin a rem ṭhap a, a hunah inhái buai ngai miah lovin, a chung ber aṭangin a la thlap thlap zel; hei vang hian a hun paih tur tam tak a hum theih phah ṭhin a ni' a ti. A pa, Nehru-a'n, a nuapanlai aṭanga inthununna fel leh khauh taka a hrual seilen kha a nia, a mak lem  love!

     Mihring belhchian dawl, miropui, mawhphurhna hlen ṭha, hlawhtling leh entawntlak kan tih te nunah hian, chin ṭhan ṭha, nun mumal, mahni inthununa fel leh inbuatsaihna ṭha hi a awm châwk a nia. 

     Tukin chu mithiamte sawi angin varṭian aṭangin a sur duh tluk tluk ngei mai a. Engpawhnise, Ṭomir thla ruah sur karah hian nilen nuam leh phawt ule..⛈️⛈️🌧️🌧️

Aibawk, 30.5.2025

 

Mizo upa te khan, "Khawchin leh nau chin a hriat tak tak love" an lo ti a. A dik thui khawp mai. Mahse, khawvel a ṭhang zêl a, engkim mai hi khâwl ṭha tak tak hmanga a nihna leh a chin zirchian theih a lo ni ta. Khawchin leh nau chin pawh hi mithiamten an sawi sual duh mang ta hauh lo mai! A lawmawm lam a ni. Mizo Upate bawkin, " Hmel a siamṭhat theih lohva, nungchang erawh a siam theih" an lo ti bawk a. Hmel pawh hi bawlhlo leh khâwl hmang bawkin thui tak a sawngbawl danglam theih leh ta zel. 

     Chuti khawpa hmanraw changkang khawvelah chuan cheng tawh mahila, nungchang hi chu mahni inbuaipui tur a la ni reng a, eng software hmang maha tihṭhat theih a la ni ngawt lo. Mahni ngei insiamṭhat a la ngai reng!

Fur khaw hnâwmah hian nilen nuam leh phawt ule..⛈️

Aibawk, 29.5.2025

      Nikum, vawiin angah khan a hma zan aṭanga chawl hauh lova ruah sur chuan kan khaw chhungah chhiatna min thlen nasa hle. Chhim leh hmar aṭanga min pawhtu kawngpui a ping a, kawlphetha a chhe vek bawk. Hmun tinah lei a min a, ruang zawn hial a ṭul a, kan khaw paltlang tur damlo leh mithi zàwn a ngai bawk. Inbiakpawhna a chhe deuh vek a, tunhma hunah kan kir leh a ni deuh ber mai. Mangang leh buai takin kan inpel suau suau mai a, khawtlang hruaitute tan pawh a luhaithlak takzet a nih kha! Nikum lama kan thil paltlang aṭang khan ngaiawh leh hi a har viau mai.

     Engpawhnise, khaw ṭha leh ruah min petu hian ṭhâl hlang min pe ta se kan buaina hi manganthlak tham tak tho tur a ni! Chhiatna dang erawh thleng tawh lo se chu kan va ti em!

Nilen nuam leh phawt u le..⛈️

Aibawk, 28.5.2025

                             THINGPUI

India ramah chuan Assam khu thingpui thar chhuak tam an ni a, 'Tea Paradise' ti te pawhin hming lem an vuah hial a, an State economy innghahna pakhat a tling ang. Tin, West Bengal lam, Darjeeling thingpui te pawh a lar angreng viau.

Mizoram hian tualṭo thingpui chu thar ve bawk mahila, state economy chawikang tham thingpui kan la thar lo a ni awm e. Thawkkhat lai khan Biahte thingpui a rawn lar ve fu tak e. 

A thar chhuah lamah nasa vak lo mahila, in nasa tak hnam chu kan ni ang. Chhiatni/ṭhatni zawng zawngah kan in a, inlêngte thingpui intir hrâm tum, thingpui tellova thil tihkhawm chu, 'khuang lova chai ang' hlauha inngai hnam kan ni hial ang chu! Khasiho kuhva duh an sawi ang mai; pitar ha nei mumal tawh lo pawhin an deng sawm a, an la ei hram hram an tih ang maiin, hriselna lam chhuanlam avanga thingpui pangngai in hlei thei tawh lo te pawhin, green tea leh eng eng thingpui emaw kan la in hram hram a nih awm hi..! 

Keini School pawh hian office-ah nitin kan in tluk tluk a ni ber mai e..😁

International Tea Day, chawhnu lam chibai u le...☕

 Judaho khu lehkhabu chhiar nasa an ni a, an ni urhsûn, sabbath ni, dawr leh restaurant zawng zawng an khar ṭhuap ni pawhin lehkhabu dawr erawh an hawng ṭhin, an ti. Mahnia inrelbawl ram an nihna a la rei loh nen, Nobel Prize dawng an kat nuk tawh mai. Hungary pawh hi lehkhabu chhiar uar ram, library pawh sing chuang lai nei an ni a, mipui an tam bik lo chungin Nobel Prize dawng tam ram an ni bawk, an ti. Japanese te khi Asia-ah chuan lehkhabu chhiar nasa pawl tak an ni a, kum khatah mi pakhatin bu 40 vel chhiar zel ang an ni, an ti bawk.

Lehkhabu chhiar nasa chu belhchian an dawl ru tlat zel. Lehkhabu chhiar kan hlamchhiah chuan hnam pum angin kan thawrawng deuh deuh ang a; kan thil buaipui a ho tual tual maithei..📖

World Book Day, nilen nuam ule..📖

Aibawk, 23.4.2025

 EASTER SUNDAY

Veilam sir bera ṭhu hi Tv. Chungtea a nia; chawhma inkhawma kan ṭantu a ni. Ani hi Masihi lama tui mi a ni a, a ṭannaah hian Pathian thu Mizo ṭawnga a chhiar hnuah vai ṭawngin Bible thu tlem a chhiar tel nghe nghe..📖 A bula ṭhu, tarmit thim chi vuah hi Pu Zama a ni a, Pathian thu tuipui deuh mai a ni. A bula ka va ṭhut rualin, "Tunlai in dam maw?" a lo ti nghe nghe.☺️ 

Kawr chung pawl ha, chhang ei tuma âng mek hi Pu Dawnga, Aibawk VC member a ni. Ka hnung chiaha kamis var ha lo lang khi Pu Zaia, Kohhran Pavalai pawl chairman a nih khi. Cooler bul hnaih bera ṭhu, a hmel lang lo khi Pu Sepa a ni. Isua thawhleh lawmna chhang leh artui kan ei mek a nih hi.😋

Isua hi a tho leh lovang tih a hlauhawm ngawt mai, a beidawnthlak dawn em asin!!🙏

Aibawk, 20.4.2025

   Vawiin chu khaw lum tlansanin Tlawng luiah kan zu kal ve a. Mizo zinga MBBS zir hmasa ber leh pa lunglêng theihtawp ni-a an sawi, Pu Aiṭhulha'n Tlawng lui a lo chawina hla kha rilruah a lo lang a;

Far in a foreign land, memories recall to mind

Sweet remembrance of the past,

When my love and me met

At the Tlawng river.

I love the windy Tlawng river,

As it flaws thro' my native hills,

'Tis there where love meet in joy,

Oft' parts in tears again.

I love the weary Tlawng river,

Where I met you to part again,

And the birdies sang adieu,

Down the lonely Tlawng river.

    Tlawng lui luang tle sur mai leh a kam vela Tuipuisuthlah intlar thliai mai thliin a'n chhem ri sang sang te, a kûr hniam zualin lui a'n hrut delh delh mai te han hmuh chuan, Pu Aiṭhulha hla hian lung a tilêng ve reih reih thei nia..😢

Dated Aibawk

The 14th April, 2025

    Kan ramah hausakna phena dan phal loh inphum ru leh hausa thut chanchin hriat tur a tam ta hle. 

   "Hmanah Lee Kuan Yew-a'n Singapore din thar tuma hma a lak lai khan, a Minister pakhat chuan thamna pawisa a lo la a. Yew chuan a hre chhuak leh si a; engtinmah an tih hmain, a inthlahrung lutuk chu a inawkhlum a, a chhungte pawhin zah avangin Singapore an chhuahsan bawk" an ti.

   Mi dik, sual haw takzet awmkhawmna hmunah chuan sual bik nih hi a zahthlak a, mi dik nih hi nunphung pangngai a ni zawk. Misual an inthlahrun miah lova; chhan mumal hriat si lova hausa thutten zah nachhan tur an hmuh hauh lova; zaka kimki tur, mi zahawm ang maia cheibawl kan ching zawk ṭhin a nih chuan, kan sual huat dan hi ennawn a hun hle tawh a ni maithei ! 

Nilen nuam u..🤔

Aibawk, Dt.5.4.2025

Kum 2000 hnu lamah IT a ṭhang uak uak a, nu leh paten IT khawvelah fate kan lehkhalh zo lo tial tial a, tleirawl rualin inkaihhruaina mumal tel lovin AI khawvel kan hmachhawn ta bawrh bawrh mai. A sawp chu nasa tak a ni! 'Reel life' leh 'Real life' kan thliar hrang thiam ta mang bar lo! Thing lukham pu a, kangvara chà hal hluah hluah ṭhin tleirawlte ai khan, Screen hmaa seilian tleirawlte hi kan nawi (soft) mai bakah, nunkawng peng hrang hrang kan zawh thiam ta lo zawk tlat niin a lang....em?

Chhungkuaa kan inzirtirna mai bakah mithiamte nen kan ṭan tlan fe a lo ṭul ta, chutiang hun remchang chu heta hi le! 

Kan remchan phawt chuan inthlahrung lovin fate i tir ang u, tam hi a hlawhtlinna pakhat a ni nghal der a nia..💪

Aibawk

17.3.2025