Environment huat ber chiin kumtin ram ṭhiatin kan la hal dur dur a. Kan hnathawhna hmanrua leh kan hahpui dan lah Zawlbûk awm lai nen khan a la danglam tam lo ngawt ang. Tihchangkân emaw, a thlâkna emaw kan la zawng hmu fuh rih lo zel chu a nih hi. Kumtin khaw khat ram tihcherèu hi pui tham tak a la ni reng.

Kumin khaw lumzia leh nisat dan rapthlakzia aṭang khan, environment kan sawisak dan hi ennawn a ṭul takzet ta a nih hi a. Engpawhnise, a thlâkna a awm rih lo a nih pawhin, hlâwk zawk, kumhlun zâwk, hmanraw changkang zâwk, hahdam deuh zâwka kan lo neih dan hi kalpui theih ni tawh se a duhawm ngawt mai. 

Awlsam tê-a chinfel mai theih ni chuang si lo thil te hi Lalmánga nu lâwm rawih ni-ah hian rilruah a awm e..

(Pic : Francis Rosangliana)

Aibawk

21.6.2023

 

Anmahni State chhunga Zohnahthlakte lakah hleilenna an lo tilang a, buaina an siam pawh tih tawh nakalaia, MIZO inpui, Mizoram State min han vau leh zel hi chu a tlawmngaihthlakin rilru a va dam lo tak em! Min vauna lah, kan nêmna lai ber NH 54 Economic blockade bawk maw..Kawngpui an dan leh dan loh te chu thuhran ah dah ila; anni, Assam State-a Manipur Meitei tlêmte chuan a dan pawh an dang tak tak pawhin a rinawm lem love. Tin, min vautute tharuma rulh lêt te, inkhuainuai lam hawi te leh a hnam anga inbeih lêt lam rilruah a lang lo, kan tih dan tur pawh a ni lovang. 

Chung zawng zawng aia pawimawh ta chu, kan nêmna ngaia kan nêm rei tawh lutuk te, State anga zah kan hlawh ve har ta lutuk te, intodelh lam kan hawi hleithei si lo te, chuti chunga ram chhunga kan nunphung  changkan lawi si zia te hi thlir ngam tawh teh ang u khai...

RAM LEH HMAN HUMHALH tur hian sawi mâm lamah ni lovin, ram vei leh hmangaih kawngah kan harh a hun takzet e!

Nilen nuam ule...

Aibawk

19.6.2023

 

Fiamthu pakhat an sawi ṭhin chu, "Inkhelh laiin refree chuan hamrik a'n ham tuar mai a, 'tunge foul' an ti sap sap a, ani chuan, ' Aaa..in dik lo deuh ṭhûm' a ti e" an ti..

Hmanniah Officer fel tak pakhat nen kan titi a, kan rama hmasawnna hna lian kalpuina kawnga zângnadawmna tihfel khirhzia te, a ram neitu piahlama hlâwkna têl tum, official chi hrang hrang indawt zut zel avanga hna kal muan ṭhinzia te han hriat chuan manganthlak tak mai a lo ni! Kan titi khaikhawmna chu, 'kan ram hi kan lo hmangaih lo', tih hi a ni ta deuh mai..

Politician te hi kan han bûrbun deuh ṭhin tak naa, kan phak tawk teteah kan lo dik lo deuh ṭhùm thei dawn a nih awm hi maw...RAM LEH HNAM HUMHALH tur hian ram hmangaih aṭanga bul kan ṭan phawt a ṭul hmel a ni.

Nilen nuam ule ..

Aibawk

17.6.2023

 

Nimin YMA Day-a kan kumpuan thupui sawitu, Pu Lalrinmawia Sohnel thusawi a va ropui em! Ram leh hnam humhalh kawngah hian kan harh zo lo a nih chuan hnam vanduai ber te zinga mi kan la ni ngei dawn a ni.

A thusawi tir lamah Aibawk YMA kalkhawmin hun kan vawn dikzia leh a hun taka kan kalkhawm kim thei chu ropui a tih thu, hahipin a sawi a.. 

Hun vawn dik te, ṭan hun taka a kal tur kalkim te hi kan ramah chuan thil mak leh ropui, infak mawlh mawlhna tur chhan ṭha tak a lo la tling a ni awm asin! Kan ram hi siamṭhat tumin thil hi a nih dan tur hian her rem nghauh nghauh dawn ta ila, a ram pum nat hian kan na tawh mai ang a...Hmabak hi kan va ngah em!

Nilen nuam u le...

Aibawk

16.6.2023

 

Chanchin thar pakhatah chuan, Swiss Federal Institute-a mithiamte chuan Plastic bawlhhlawh eiral thei hrik an hmuchhuak a, zirchian mek rih a la ni awm e. He thil hi khawvel hmalam huna plastic lam chi bawlhhlawh sawngbawlna kawngah a ṭangkai hlein a rinawm.

Nizan khan, YMA Day, 'Lemchan Zan'-ah Plastic bawlhhlawh sawngbawlna chungchang kan ngaihthla a, rilruin a vei sa a ni bawk a, beng a verh thar hle mai.  Tunah chuan sa leh râl aiamaha kan ram rùn nasatu chu plastic chhia hi a ni ang. Kan lui kawi tinah a inchhèk nghèk nghûk a, leilung a tichhiat dan hi kan hrethiam pha ve lo zawk a ni. Ram changkang te pawhin an buaipui mek tho. Kan ram leilung tichhe mêktu hi kan thunun a ṭul ta takzet e..🤔

Nilen nuam u..

Aibawk

14.6.2023

Nizan, YMA Day 'Zo Zan'-ah Hermon Section ten 'Mi zàwn inchuh' an entir a; thil pakhat min hriatchhuahtir. 

Tu sawi ber nge ka hre ta lo. Hmanah Lungpho tlangvalhovin Sialhau khaw paltlang tur damlo an zawn a, Sialhau tlangvalte chuan an ram chinah lo chhâwk an tum a. An val upa chuan Lungpho tlangval tlawmngai, a nêl tak mai hnenah chuan, "Ṭhianga, kan lo chhâwk ve tawh ang che u" a'n ti a. Tv. Thangṭhianga (Ani pawh a chawl ve ta) chuan, "Vawiinah hi chuan a Ṭhiang thei lovang" a lo ti bul hmak a, hah zui zel tum leh hah ve duh an innuai zui ta hlawm a ni awm e. 

Hetiang hi kan ni ṭhin alawm! Mizo tlawmngaihna rilru hi a thianghlimin a lo va hrisel tak êm aw! 🤔

Nilen nuam ule...

Aibawk, 10.6.2023

 

Kan dam ang a....

Nakinah chuan in chhung hnawk niai nuai te hi a la fel duak ang a; naupang ṭap thawm rehin putling hlir kan la ṭawng charh charh ang. Banga inziak ràng nîn nían te hi a la fai kuar ang a; ṭawng zir paha JCB lem khalh thawm te pawh a reh vek tawh ang. 

Vahchhuah dawna min ngên lawm lawm a, in thlen ruala min lo kuah cheng chengtute hian ṭul dangah min la hmanhlelhsan ang a; zawhna min zawt rengtute hi anmahniin an la inawmtlei dawn. Chutih hunah chuan, min mamawh san ber hunlai leh kan ngaihdan min ṭawmpui diak diak lai hi thlirkir chang kan la nei ngei ang!

Happy Birthday, My Boy...🎂🎂

Lawmsangzela 

3rd Birthday

Aibawk ; 26.5.2023

Thih thut thu thang hriat tur tam ta êm êm mai hi engemaw chen kha chu rilruin Social Media hmanrua vangah a puh deuh ṭhin a, mahse, a mak zozai ta hle mai. A chhan leh ven dan te chu mithiamten an hria ang. Mahse, hei hi rilruah a awm thin...

Damchhung hi, midangte huat nan te, ropui tuma intlansiak nan te, lansarh thlakhlelh avanga buai ruai mai nan te, duhzawng tihhlawhtlin tuma lemchan nan te, chapo nan te, midang rahbeh tum nan te leh mihringpuite harsatna siam tuma phêt ruai nan te a tawi lutuk!

Ral leh mai tur rilru zawng zawnga buaipui ai chuan; chatuan daih thil buaipui a hun ta niin a lang e. Damchhung a rei si lo..

Nilen nuam le...

Dated Aibawk

14th May, 2023

 

Sinai tlangah khan Pathianin Mosia hnenah, a ngaihpawimawh zual Thu 10 a pe a. Thu 10 pek zinga 4 (40%) kha Pathian leh mihring inkar thil a ni. A dang 6 (60%) kha mihring leh mihring inkar thil a ni. Kan Pathian hian khawvela kan nunhona hi a ngaipawimawh tih a chiang hle.

Pathian thu sang pui pui buaipui tho chunga, nunhona peng tinrenga kan Pathian thu hi a taka kan chantir ngam ṭheuh hunah kan ram hi a dam ang a, RAM LEH HNAM HUMHALHNA kawng dik kan zawh thei ang...🤔

Khawlum tawrh nuam u...🤭

Dated Aibawk, The 9th May, 2023

HRISELNA

 

HRISELNA

Thingtuah lak, insuk, tui chawi, chawhmeh zawn, buh den leh ram lam hna chi tinreng, Mizoten thlan tlaa kan thawh hrawih hrawih ṭhin te kha khawl thil leh remchang dangin a thlak zo duak tawh. Hmasawnna avang te pawh a ni, a lawmawm.

Chutihrualin, zunthlum, thisen sang, stroke leh natna chi hrang hrangin min tlakbuak nasa thung ta hle. Internet speed chakin ṭhalai hrisel lo leh zawi tak tak a hring chhuak ta nual a nih hmel bawk. HIV tamna ram kan ni an ti bawk a. RAM LEH HNAM HUMHALH tur hian hnam hrisel kan nih a ngai a nia.

World Health Day chibai u le..

Aibawk

7.4.2023

RAM HMANGAIH

RAM HMANGAIH

India PM ngaihsanawm, PV Narasimha Rao khan AP CM a nih laiin ram siamṭhat nan Land Reform Act a kalpui a, amah ngei pawhin ama dan siam hmangin ram acre 1000 a chân, an ti.

Ram hruaitu apiangin kan ram hmangaih dan kan ennawn ngam zel a hun ta hle. Ram hmasawnna tur mimalin kan hausakpui tlat emaw, thil kalphung tur a ni lo lam zawng deuh veka a kal a, Zoram hmabak aia vawiin nawmchenna kan thlir a nih chuan RAM LEH HNAM HUMHALH hi a har tawlh tawlh ang a, hmabak nei lovin ral lam kan pan zel ang. RAM LEH HNAM HUMHALH nan ram hruaitu, dik taka Zoram hmangaihtu kan mamawhna a sang zel dawn.

Nilen nuam le..

Aibawk, 6.4.2023

HNAM THIL NGAIHSAN

Sawrkar laipui, hnam thil, sakhua leh politik hrual belhbawm tum tlat, chumi hmanga mipui thinlung hneh tum pawl kan hrawn mek. India mipui nawlpui mar deh an thiam takzet. UCC hmangin min veh dèn dèn ngam ṭan.

Hnam thil kan lak vung ve a ṭul tawlh tawlh dawn. Chutihlaia kan hnam thil chawisan a hneka kan hmuhsit a, khaw dang sial hmuha kan hmuh tlat chuan changkang takin kan la ral ang. Mizovin Mizo hnam leh ziarang a ngaihsan hi RAM LEH HNAM HUMHALHNA pawimawh a ni.

Nilen nuam le..

Aibawk, 5.3.2023

NANCY

Tukin zing dar 4:15 a.m khan kan khaw nu, la naupang tak, Nancy a boral a, a fate pathum a kalsan. Ani hi pasal sûn tawh a ni a, ei dap chawpa a fate chawm ve ṭauh ṭauh a ni. A fa upa ber hi kum 13 chauh a la ni a, nu ngai rual leh mamawh ngawih ngawih rual an la ni. An pa tellova nitin awmtlei ṭhintu, an neihchhun, an nu chu vawiinah vui liam a ni ta mai si a..! An va lainatawm em aw! Engtin nge ni ta ang le? Rilru an tikal thui mange...!

Kum 28 kalta, July ni 16 khan Serchhip veng pakhatah khian pa pakhat a boral a, a fate 4 a kalsan. Ani pawh hi nupui sûn tawh a ni a, a fapa upa ber chu kum 13 mi ve bawk a ni. A fa u ber leh a dawttu hi chuan thil an hrethiam ve hle tawh a, an mangang hle reng a; an naute pahnih erawh an la hawi mawl vel mai mai a ni. A hunlai mite khan an lainat ve hian ka ring mange!

Chumite unau hun hman chhoh dan leh an paltlang thil tam tak te chu thawnthu sei tak a ni a, ṭahna, hlimna, lunglenna te leh lawmna te a inpawlh chiat a ni. Mahse, kan Pathian hian ruahmanna fel tak zelin thil hi a thlentir a lo ni a, hemite unau 4 pawh hi vawiin thlengin a la enkawl a, kawng bumboh tak tak kaltlangtirin, rilru hliampui tawrh chang te nei ṭhin mahse, an hmaah ni eng mawi tak a chhawpchhuahsak leh ṭhin a, A rinawmzia vawiin thlengin a thar zelin a la hmuhtir a ni. Heng unau pali zinga upa ber hi he thu ziaktu hi a ni.

Nancy, thlamuang takin chawl ang che. I fate tan hian kan Pathianin kawng a buatsaih ve ang tih hi ka ringhlel love. 

Lalpa, hemite unau hi enkawl ang che aw...🙏🙏🙏

4.4.2023

Aibawk

PIAN PUN

Nikum khan kum 60 hnua a ṭum khat nan China ram mihring zat 85000 in an tlahniam. Hei hi hun engemaw chen, 'fa pakhat neih thupui' an hman vang a ni. An tlakhniamna hi a nasa chho dawna an hriat leh si avangin ṭan an la thar leh mek a ni.

Mizo hnam hi kan ral dawn a nih chuan kan piang pung lo lutuk hi a chhan pakhat a ni ngei ang. Hriselna lama harsatna chu thuhran nise, RAM LEH HNAM HUMHALH nan kan tam ve a ngai. Inneih uar leh fa neih tam kan ngai e..

Ni hman nuam le..

Dated Aibawk, The 3rd April, 2023.

23.3.2023

Kan ram chhan tum hian mahni huam chin leh phak tawk zelah ro te pawh kan han rêl ve ṭhin tak na a, hman ata tawh kan ram kalsiam mumal lo leh inrelbawlna hnawk chingchivet lutuk hi hriat tam poh leh thaw a ipik tam mai ni te hian a hriat ṭhin.

A chang chuan Mizote hian kan ralna tur kawng lam hi kan pan lui ngat ngat ni hial te hian a lang thei nia..

 Zoram, tho la, ding ta che..

2.4.2023

A kuta thiltihtheihna awm, damlo tihdam, mitthi kaihthawh leh eitur tihpun theihna te kha ama tan remchangah hmang duh sela, mi hipna ṭha lutuk, lârna, thuneihna chan theihna leh khawvela lal ram ropui dinna khawp a ni. 

Mahse, a pa duhzawng tih chauh kha a thupui ber a ni a, chu chu khawvelin a dampui ta thung a..

Pathian duhzawng tih mai hi ram, khawtlang, Kohhran leh mimal damna tur a ni ang. A ni lo lam, thuneihna, chawimawina, larna leh nihna te kan buaipui hmasa ṭhin hian damna aiin natna a thlen zawk fo ang a..

Tumkau ni chibai ule..

Hepa hian a rimawi hi tuktin, Queen Elizabeth-i mut pindan hnuai tukverh zawnah minute 15 tumin, Lalnu chu a kaitho ṭhin a. Chu chu a alarm clock atan an hmang ṭhin a ni awm e.  A vuinaah khan amah thlah nan tum leh a ni a, a lunglenthlak ngawtin a rinawm.

Lalte an thi a, lal lem lo pawh an thi reng bawk a, kan hun hi a la thleng ve rih lo mai chauh a ni si a...🤔