2822021

Josepha, a unauten hralh lai leh a hnua rip chhunga khung a nih lai te khan, Pathianin a ṭhatna tura a rorêl a nihna hmuh thiam kha a har ve awm ngawt mai. Vanduai bika inngaihna hlir a rilruah a lan ve tho a rinawm.

Kan duh loh zawng tak kan chunga lo thleng ṭhin zawng zawng hi kan vanduai vâng a ni vek bik lovang; eng thil emaw atana buatsaih kan nihna hmanrua a ni ve thei ang.

Ruahmanna siamtu duh dân lo zâwnga kan ben per fo erawh chuan, Josepha tâwpna nen erawh a dang thei fû si ang..

Pathianni hman nuam u le...

2722021

Hlâwkna beisei vang ni lo, a ṭulna-in a phût avanga din, sorkar laka hrang, a chhunga mi leh sâte leh midangte ṭhatna tura pawl din hi NGO kan tihin a kawh ber pakhat a ni awm e. Amnesty, Greenpeace, Doctors without border etc. te hi khawvel huap NGO lian te zinga mi an ni ang.

Mizorama NGO hlutna hi sawifiah zawh a har ngawt ang. Hnam thil, ramri, sorkar khawih, ruihhlo, chhawmdâwlna lam, inpumkhatna etc. ah te hmalakna remchang lo a awm ve lo te hi a ṭha ngawt mai.

A bikin keini ram angah te hi chuan NGO tel lo hian awm ngaihna a vâng  khawp ang.

World NGO Day chibai ule..🤝🏻

2622021

He thlalâk hi a hmuhnawm reuh riau...

Eirawngbawlna gas heti taka kan hman tlânglâwn hma kha chuan thingtuah lâk hi hnapui pakhat a tling ṭhin. Tun ang ṭhâl chho-ah hian fûr tla tur lâk ngah tumin ṭan an la a, thingkhawn sâng pui pui siamin an rem ér ùr ṭhin.

Nula thingphur haw lamin, thing eh felfai tak a phurh chuan, "Eh-saktu i nei ṭha a ni maw?" an lo ti a, thingfak phuailuai deuh tak a rawn phurh haw chuan, " Ek ṭha hman mang lo a ni maw" tiin an lo fiam ṭhin.

Thingphurh dan, phurhna hmanrua leh a chhehvel chanchin te pawh hi zirlaia zir ngai khawpin kan la kal hlatsan awm si a..

Pic : Francis Rosangliana

 

2522021

Nimin khan ZMC-a MBBS zirlai pakhat chu a exam result-in a duhthu a sâm loh avangin a inawkhlum. A zialo hle mai.

Tun thla tir lam khan Japan PM, Yoshihide Suga chuan, lockdown chhoh lai vel aṭanga an ram mahni intihlum an pun nasat avangin, hemi buaipuitu tur bik, Minister of Loneliness a ruat thar ringawt mai bawk.

Dam hrim hrim hi vanneihnaa chhiar tlâk a nih tehlul nen, dam hlut tawh miah lo rilru natna hi a rapthlak ngawt ang. 

Keiniho chu Pathianin rem a tih chhung chu dam tlân hrâm hrâm i tum zêl teh ang u..🤔

2422021

Eleanor Roosevelt chuan, "Nitin i hlauh zawng tak thil pakhat tal ti ṭhin rawh" a ti teh tlat a.

A har fû naa, hmasawn tur chuan kan huphurh zawng tak thil te hi tihluih a ṭul ve fo a nia. "Comfort Zone aṭangin History ropui siam a ni ngai lo" te pawh an lo tih kha a..

Fiamthu-ah, "Nula pakhat pawh hi a tum loh deuhin khawlaiah a luak chiam mai a, a zak bawk si, tihngaihna hre lovin, 'ka ei loh hlir ka luak' a ti e," an ti.. 😃

Ka ei loh hlir ka'n luak chhuah lehpek chu a..😃

 

2322021

Aristotle khan, "Sawisêl pumpelh dan kawng khat chiah a awm; engmah sawi lo la, engmah ti lo la, engmah ni lo bawk la, sawisêl i hlawh lo mai ang" a ti a.

Kan pu thusawi pawh hi a la dik famkim bik ta chuang lovin a lang. A sawi ang khian awm ta ila, mi chut, lâktlâk loh, ṭangkaina nei lo, ngaihdan pawh nei chuang lo nih kan la hlawh tho hmel.

"US president zingah pawh president hmasa sawisêl lo awm chhun chu George Washington chauh kha a ni e," an ti.😃

Sawisêlbo nih tuma ṭan lâk ai chuan mahni tâwka hmasawn tum zêl mai hi a hahdam ang..

2222021

Indiatimes-in a tarlan danin, tun hnai lawk khan tuemaw chuan Pakistan khawpui 'Islamabad' chu 'Islamagood' ti-a thlak tumin online petition a kalpui a, signature 300 vèl a hmu tawh a ni awm e..😃 Official taka ngaih tur chi phei chu niin a rinawm lem lovang. 'Islamabest' pawh nise, engmah a danglam phah vak na tur a awm chuang lo..😃

Thil nihna dik tak hi chu a hming leh landan piah hretah a awm fova, lehkhabu chu a kâwm aṭanga teh tur a ni lo ang bawkin, a tak hi chu a tuamtu kâwr chhûng lamah a ni a awm fo ni..

Kar thar chibai u le..🤝🏻

 

2122021

Result chhuah niin zirlai naupang pakhat chu sikul sirah a lo ṭap a. Zirtirtu chuan a khawngaih ta tlat mai a, a report card-ah chuan 'Pass' tih a ziahsak a, naupang chu lâwm takin a haw ta a.

Khawngaihna avanga chhandam, khawngaih mark hmanga tih pass chawp, khawngaihna avang chauha rawngbawl hna vuan thei, khawngaihna avang bawka a hnen thleng thei tur te hian, khawngaihtu lo hi thildang chhuan tur kan va nei awm lo em..!

Hei vang hi a ni ang Isaac Watts khan, "Isua Kraws mak tak chungah khan, Ropuina Lal thi ka hmuhin, Ka hlâwkna ber ka ngainêp a, Chapo, uanna ka ngaitlâwm a" a lo tih ni..

Pathianni hman nuam le..

2022021

Kum 20 (1966-1986) chhung zet mai rambuai rapthlak takin kan ram a sawisa a, a tuartute tawrh natzia chu sawiin a siak lo hial ang.

Chumi hnuah, inremna a zawnga inremna hlawhtling ber pawl kan nei a, State nihna pêk kan nih zui bakah, State ralmuang ber pakhatah kan chhuak zui ta bawk. A lawmawm hle.

State puitling, muang leia inenkawl, kumtin sum tam tham taka vùr, ram leilung ṭha, sik leh sa nuam leh ṭha, Kristian ram ni bawk si hian hma kan sâwn leh sâwn loh chu a chhunga chêng, a ram neitu leh enkawltute mawh a ni ve tawh ang chu...

State Day chibai ule..🤝🏻

1922021

Hei hi i hnena ka ṭawngṭaina a ni - Ka Lalpa, ka thinlunga retheihna zungzâm hi min chhah sak ang che.

Hlimna leh lungngaihna zangkhai taka phur thei turin chakna min pe ang che.

Ka hmangaihna ṭangkaia hmang thei turin chakna min pe ang che.

Retheite hransan lo tur leh miliante hmaa ṭhingṭhi ngai lo turin chakna min pe ang che.

Hringnun ze nawi chunga ka rilru chawisâng thei turin chakna min pe ang che.

Ka chakna leh hmangaihna te i duhdân hnuaia intulût turin chakna min pe ang che.

- Tagore's 36th Verse from Gitanjali

(Tagore-a verse, ka ngainat leh ropui tih êm êm a ni. Thiamlo chung chungin tihian ka'n keuh fiam ve a nih hi..)

1822021

Kawng engkima famkim i tum emaw mi famkim i zawn chuan lungawilohna i chhar tel ang.

Chakloh riauna kan neih te, kan zuau rûk tlatna te, midang theih ang kan thei ve tlat lo ṭhin te, mi hriatpui mang lohva kan nèp ruk riauna te hi mihring kan ni tih lantirtu a ni. Pawm thlap mai tur a lo ni.

Mi ropui tak tak, kan ngaihsan tâwp theih loh te pawh hi hnai takah hrawn chiah ila chuan, mihring ve mai an nihzia tho kan hmu ang.

Awm ṭhat duh loh hrim hrim hi chu thuhran daih a ni a, mihring kan nih avanga kan famkimlohna kan inkhuhmawisak tawn a ṭul ṭhin te hian hringnun a tihlu. Famkim ṭhup mai ila enge hringnun hlutna hi ni ta ang le?

 

1722021

Nizan kan mutthilh aṭanga tûkin kan harh hlawl inkârah hian thil thleng thei a tam âwm mange..Zing khaw êng hmuh leh ngei beiseina nen nizân khan i khumah i mu a, ngaihṭhatlohna neih hauh lovin i maimitchhing vang vang a, mumang ramah i chêng zui ta a nih kha..

Kha darkar 6-8 nikhaw hre lova i leh dêr chhung khan vanduaina rapthlak thleng lovin hei, zing ni chhuak êng iârah i tho chhuak leh a nih hi..

A tùr réng emaw kan tih thil tam tak hi hlimpui tham vanneihna a ni. Lungawilohna chhan tur pakhat kan hmuhna hmunah lâwmna chhan tur pahnih a hmuh zêl theih ang, kan thlîr dan a zir zêlin...

Nilen nuam le...

1622021

Vawiin hi AMC inthlan ni a lo ni leh ta reng mai. India danpui, 74th Amendment-in thuneihna semzâina tura a ruahman, khawpui inenkawlna tura thlan tlin roreltu kan han nei thei ta hrim hrim pawh hi a lawmawm ngawt mai.

Khawpui lian pangngai chin hi chuan inenkawlna hran hi a lo mamawh khawp a, bawlhhlawh sawngbàwl ringawt pawh hnapuia neih tham a nih hi..

Dan hnuaia a theih chin chinah thuneihna pawh pek belh zel nise, rorel tura thlan tlin te pawhin khawpui hmangaihna rilru nena thawh tak tak a hun..Kan khawpui hi plan mumal awm lovin kan luah rei tawh a, kan sawp chhiat belh zêl phei chuan a manganthlak lutuk dawn e...🤔

1522021

UN Secy. General term kal lai mek hi kumin hian a tawp dawn a, SG thar thlan turah India chhûlchhuak, kum 34 mi, Arora Akanksha chuan a chuh ve dawn a ni awm e. A tlin chuan UN SG hmeichhe hmasa ber a ni ang. 

Tunlai chu hetiang lamah hian nuho an lang tam riau. Kamala Harris te, New Zealand ram hneh taka kaihruai mêktu Jacinda Ardern te, nu huvâng ngah tak tak, Christine Legarde, Ursula van der Leyen te leh kawmchhak nu, Pi Aung san-i te.. 

Hei kan AMC inthlan turah pawh chuti tho chu an nih hi. Hmeichhe fin hian tuikhur râl a kai ta fû a ni awm e a..😄 

Nuho Bial inkhawmpui zawh hlim a nih vang nge, heti lam hi rilruah a lang tlat..😃

Nilen nuam u le..

1422021

Valentine's Day leh Pathianni a inrual kum tak a ni a, a danglam hranpa ve reng reng e.

Kan sawi phâk a awm lo naa, hetiang ang hun kan hman danah hian, ṭhalai rilrua sakhua a tlâk nat lem lohna ram leh, Kohhran leh vantlang hmai zah a ṭul lem lohna hmuna an hlimpui ang chen zeta hlimpui ve loh chuan hlawhtling lo riauin kan lo inhre palh ang tih hi a hlauhawm deuh ṭhin. I thu ni teh se..

Engpawhnise, a thleng rual ta sa sa, V day hlim taka hmang chungin Pathianni hmang tel tho ila a inchhirawm loh nge nge maithei e.

Pathianni leh Valentine's day hman nuam u le..

1322021

Lui hnâr lam aṭangin Chinghnia hian lui mawng lama Beramno ding chu, "ka tui in tur i dâi nut vek le" tiin a zuk âu a..

Beramno : Lui mawng lamah ka awm a, engtin nge i tui in tur ka dâi nut theih ang?

Chinghnia : Nikum lama ka chanchin a chhe zawnga lo sawi vak tu kha i ni tho tho.

Beramno:  Kuminah alawm ka pian.

Chinghnia: I pa tal a ni ang, engpawhnise ka ei dawn hrim hrim che.

Kan huat duhzawng haw tur hian chhuanlam ṭha leh lian kan lo mamawh hran lo, tin, mamawhin kan inhre lem lo thei fu bawk ang. Chutihlaia, midang rem tum tlat mi hi mi bîk an ni chiang khawp bawk.

1122021

India Times in a tarlan danin, Supreme Court chuan, Jan., 2020 khan, thingkung puitling pakhat zêl kum khata an hlut zawng chhût chhuaktu tur, member 5 awmna Committee a din a.

Thingkung hlutna hi oxygen a pêk chhuah te, thil ṭha a pai te leh leilung a tihṭhat dan te aṭanga teh a ni. He committee-in a chhût dan chuan, thingkung pakhat kum khat hlutna hi ₹74,500 hù a ni.

Buh bâl chînna atana lo vah bansan thei kan la nih loh pawhin, vah bâk ram kâng chiam mai ṭhin te, kuthlei leh fimkhur loh avanga kâng ṭhin te hi chu pumpelh tum tlat a ṭha khawp mai.

Ram tihkan loh hi ram leh hnam humhalhna pawimawh a ni..🔥

1022021

Social media vela mi 50 velin an ngaihdan an put darh chiam hi thil nihna tak teh nan a tlak loh, hrethiam lo tan chuan stadium chhunga fans 60,000 ngaihdan aia dah sán palh theih a ni. tiin Arsenal manager hlui, Arsene Wenger khan a lo sawi a. A dik hmel khawp mai.

Ram pum huap Group lian pangngai taka mi 20/30 velin an duh dan hi mipui aw emaw tih mai te hi awl tak tur a ni. He hmanrua, a remchâng apiang kan tel mai theihna hi lâk urhsùn dan tawk te, ngaihdan lâk dan chin leh rin dan tawk thiam zêl a ṭha khawpin a rinawm e.

Ni hman nuam u le..

922021

Chânna (loss) hi thil hlut zawng min zirtirtu a ni, tiin Arthur Schopenhauer chuan a sawi a.

Kan thil neih leh chan mek tam tak hi chu kan hloh hma chuan a hlutzia kan hriat loh tur a awm nual maithei. Pum nâ avanga tlaivar ṭhak tûkah pum ṭhat hlutzia hi kan chiang deuh chauh zel.

Vawiin pawh hi kan kuta a la awm lai hian a hlutzia vawiinah ngei zir thiam hman zêl ila kan hun hman dàn a dang deuh ang.

Kan neih ve loh lam ngawt thlir lova, kan neih mêk thil hlutna hriat fiah thiam hi lungawina kawng pakhat a ni si a.

822021

Sava, báwma khawi chího hi chuan thlawh theih hi natna chi khatah an ngai mai, an ti.

Taksa hi rilrua suangtuah lanchhuahna hmanrua mai a ni a, kan ngaihtuah dan angin kan che a, kan inhmuh dan chin zel hi kan nihna a ni mai.

Taksa zalên mah se rilru a beh tlat chuan kan theihna lang chhuak tur hi kan ta a ni tih kan hre thei ngai lo. Sai lianpui hi hruizen te tak tè-in a thlun beh reng theih a, Keite zèn zît zèt hian ngam zetin Ramsial lian pui pui a um darh chum chum thei lawi bawk.

Nun kawng hriltu pawimawh ber chu rilru puthmang hi a ni.

722021

Thla 10 chuang hnuah Pathian biak inkhawm dâr pangngai a'n ri leh chuah chuah ang a, tukṭhuan eikhamah naupangte nen Biak in lam kan han pan leh sung sung mai dawn a nia, a mak lek lek zawk mai.

Hetiang hun hi a la thleng leh ang tih beisei mahila, nikum March thla tawp lam te kha chuan rilru a mang mup mai chu a nih kha a..

Theih nise, "Ka chhandamtu min vengin a hnai reng, Thil eng pawh lo thleng se ka him a ni" ti-a zai tuar tuar mai a chakawm. Kan la tih theih ngei pawh beisei zêl ang.

Pathianni hman nuam u le..🌼

622021

Mihring hian nuam, hrehawm, thlakhlelhawm, ninawm, harsa, awlsam kan tih zawng zawng hi, a tam ber chu kan dinhmun aṭangin kan teh fo lo thei lova. A châng chuan ka harsatnate hi khirh bik riau hian ka hre fova, ka phurrit hi midang phur aia khîn fê-ah ka ngai fo bawk.

Mahse, mitin hian kan hma ṭheuhah kan buan tâwk buaina, lungngaihna leh harsatna chinfel tur enge maw kan lo nei ṭheuh a lo ni. 

Chutihlaia mahni phurrit phur chunga midang chhâwk zangkhai thei mite hi mi ropui zinga chhiar tlâk an lo ni.

522021

Thawnthu pakhatah chuan, Bawngpa hian tawlailir phur rit tak hi kawng chhe takah a hnuk kal ṭual ṭual a, tawlailir ke chu a chîk tuar tuar a. A khalhtupa chuan a ning ta deuh a, "A rit phur dik tak bawngpa pawhin ngawi rengin a hnûk che a, ngah nge nang i lo bengchhen viau le" tiin tawlailir chu a hau ta a, tih hi a awm a.

A tuar nêp hlei hlei hi a phun chiar chiar kan ni fovin a rinawm a, tha thawh tlem tlem hi vuivaina ngah kan nih chang te, thil ṭha ti-a pên chhuah nei mumal mang lo te hi a sawisêl peih peih nih châng a awm thei ang.

Kan thil duhkhawp loh tam tak hi chu a chhunga kan luhchilh lem loh a awm ve bawkin a rinawm..🤔

422021

Naupang, Silipar dik lo zawnga bun tlat chi in kawl ve em? A dik zâwng han hrilh ila, a diklo zâwng chu a dik zâwng niin an hre tlat zel..😃 

Thil kal dan tur ni chiah lo, mahse kan tihṭhan avanga a dik zawka kan  ngaih tlat hi kan ram hian kan ngah viau mai angem aw? Mi rama thil nihphung pangngai, helaia hahípa fak hlawh theihna a awm nual lo maw? Kalphung dik tak ni zawk si, mak letling hú-a hriat kan nei nual em?

Kawng hrang hrangah chutiang chi a awm thluah a nih chuan thil ṭha leh ṭha lo, mihring ṭhat dan, kalphung fel leh fello, sorkar ṭha leh ṭha lo etc. kan tehna sán zawng hi ram dang aiin a hniam sa thluah thei mai ang a.. 🤔

322021

Mark Twain khan, "Thu dik chauh i sawi a nih chuan engmah i hriatreng a ṭul hran hleinem" a lo ti a.

Dik famkim chiah lo deuh sawi pawi lo riaua hriat tlatna hmun neih mai te, la tlip mâm leh theih tho dân a awm ṭuma thu belhchiandâwl fumfê vak lo tarlan hreh loh mai te, hlauh zâwng tak te bula thudik han hêl zauh mai te hi a awl ngawt mai. Dik lo hret sawi a remchan zawk riau ṭum te hi a awm thei mai awm mange...

Eng dinhmunah pawh thudik sawi mai zel mi chuan a thusawi hriat reng a mamawh lo, dâwt a sawi ngai miau lova..🤔

Nilên nuam u le..

222021

Burma ram chu nimin khan sipai rorelna hnuaiah bawk a tlu lût leh ta. Kum khat chhung atan state of emergency an puang zui leh ta bawk. Mipui Sorkar din tura insingsa chho ṭan meka ngaih an nih laiin hetiang thil a'n thleng leh hi chu a ram mipuite an lainatawm khawp mai.

Leilung hausakna ngah êm êm mai ram, inawpna fello avanga Asia chhimchhak ram rethei ber an han ni reng ringawt mai te, mipui vantlang himna derthawng kumhlun te leh kawng engkima hnufual lutuka an awm reng mai hi a mak letling zawk ngawt a ni.

Ram rorel dan kalphungin a ṭha lam leh chhe lama ram leh mipui a nghawng dan hi nasa tak a ni..🤔

122021

Lalmânga nu lâwm rawih hunlai ata tawh, vawiin thlengin ram kan la tuk tlauh tlauh a, kan phoro ṭhep ṭhawpa, kan hal dur dur kumtin zel a la ni. Mahse a aia ṭha thlâkna kan la nei rih lova, kan pawm zel phawt a ngai.

Engpawhnise, ram tuk rau rau-ah, hlâwk zawk, kumhlun zâwk, hmanraw changkang zâwk, hahdam deuh zâwka kalpui theih dan awm tawh se a duhawm ngawt mai. 

Duhthusam berah chuan ram hi a tukin tuk tawh lo ila, humhalh hring dep dup mai ila..🤔

Ramtuk thla ni hmasa ber chibai u le..🤝🏻