3112021

Khawvel tâwp, mithianghlim lâwr han tih hluai hluai mai te hi chu, lo la thleng ngei tur pawh nise, kan rilruah (tunlai ṭawng takin) a relevant lutuk tawh lo deuh a ni maithei..🙂

Mahse, relevant thar ta êm êm mai chu, "Tukin pawh khan a la lêng a la lêng si a, a va mak teh thut ve!" tih ang chi hi a ni. Tunlai hian, (a bikin kan ramah) mihring hi kan tlo lo zual ta riau em ni chu aw, tih theih te hian a awm rum rum ṭhin.

Engpawhnise, kan dam chhung ṭheuh hi inbuatsaih nana kan hun neih a ni mai a, kan inbuatsaih dân tur pawh kan kutah dah pumhlum a ni. Keimahni chung ngeia kan mawhphurhna hi sâng angreng tak a ni..🤔

Pathianni hman nuam u le..

3012021

US President term 2 aia tam chelh awm chhun, President 32-na, pa rorum leh huaisen, Franklin D Roosevelt khan, " Hlauhna tih loh chu engmah hlauh tur a awm lo" a lo ti a.

Hlauh/vênthâwn kan ngah lutuk avangin kan nih tur ang kan nih loh fo a rinawm a, ṭul lovah kan intihah fovin a rinawm. Sakawlh, râl lian, lung lum, UID leh thil dang dang, hlauh namen lova hlauh ang chi te hian hmasawnna aiin hnufualna min thlen tam zawk maithei. 

Amaherawhchu, hlauh tur dik hlauh hi dawihzepna a ni lo tih erawh kan hriat tel a ngai. Chawngbawla pawhin 'bawl' theih loh ṭum a neih chuan, hlauh tur leh huai taka hmachhawn tur chi thliar thiam hi keimahni mawh a ni ang. Kan pu pawh hian a thusawiah hian ât huai a huam telin a rinawm love. 

Happy Birthday, Mr. President..🎂

2912021

Mihring thununtu lian ber pakhat chu vantlâng (Society) hi a ni. Kan chêtvelna tehfung bera kan hman pakhat pawh, 'Miin engtin nge an ngaih ang', tih a ni fo. Kan ṭhanlenna society a zirin mihring hi a danglam theih viau mai.

Chuti taka pawimawh vantlâng sûkthlêk chu a chhunga chengte siam a ni. Inteh ringawt mai vantlâng (judgemental society) ni lo, midang ngaihdan zah chunga fuih kaltu, ṭhalai leh naupangte seilenna atana îtawm leh rualelna dik chi tuhtu society kan siam a ṭul ta hle.

Inelna khawvela dâk chhuak ve ngam turin Vantlâng sûkthlek dik siamtu, a chhunga chêngten rilru zau leh ṭhalaite rualelna khawvela hruai lut thei rilru kan put ṭan a ngai e..🤔

 2812021

Chi (salt) hi thil mak tak a ni. Chawhmeh zingah a langsâr lo êm êm a, a awm ve tih kan hre ngai meuh lo. Mahse, a awm loh erawh a langsâr hle thung a, a tello chuan chaw a ei hleihtheih miah loh. A awm aiin a awm lohvin a langsâr zawk a ni ber ang chu...

Hruaitu ropui phênah te, pâwl chak tak chhungah te, thil ropui tak hlawhtlinna kalkawngah te hian, mi langsâr lo, biru taka ṭangkai tlat hi an awm ve fo mai.

Khawvelah hian an awm aia an awm loh langsâr, mi hlu biru te hi mi ropui langsârte tluk thova a rûka mi ropui an ni. 

Nilen nuam u le..

 

2712021

Ram inrelbawlna, khawtlang, chhungkua leh mimal nunah, kan kal chak zâwng (speed) aiin khawilam nge kan pan, tih hi a pawimawh fovang.

Kan pan lam leh chumiin a rah chhuah tur ngaihtuah lem lo hian kan hun ṭha hi a hman liam ve zêl theih ang a... Kan kalphung, kan chetvelna leh kan hmathlirte hian hmasawnna dik a hawi em, tih hi zawhna pawimawh tak a ni reng. Hmasawnna lian tham awm lem lo, kalphung pangngai zâwm ve zêl tho si hian ram pawh hi tluang takin a kal ve mawp mawp ringawt thei ang.

A ṭha zâwnga danglamna thlentir tur chuan pan lam dik a ngai. Kan kawng zawh mêk hi a dik em le..?🤔

Nilen nuam ule..

2612021

Hmanni lawk khan Thailand nu pakhat, kum 63 mi chu, an ram lal chhungkaw sawiselna lam hawi video clip, social media-a a suan kual avangin kum 43 tâng tura hrem a ni. Hun rei deuh aṭang tawh khan Thailand ramah hian lal neih duh lohna movement a awm fo tawh.

Keimahni thlan lal ngei ten ro min rêlsak hlutzia te, kan duhzawng kan sawichhuak mai thei te, mipui te lamṭang tak Constitution kan han nei te hi hlu tak a ni. Hetiang neih ve chak hian mi tam tak thlantui leh thisen a luang mek asin..🤔

Republic Day chibai u le..

2512021

Tunlai India ram chanchinthar langsâr ber pakhat chu Sorkar laipuiin Farm Bill pathum a pass duh lova loneituho rei tak an nawrh tawh thu leh, R-Day-a tractor Rally huaihawt an tum chungchang hi a ni.

India rama thingtlang khawsakna 70%, India GDP pumpui 17% leh India mipui 60% eizawnna te hi loneiha innghat a ni.

Ram changkangah chuan a thawkrim apiang an hlâwk. Ram hnukpui pakhat, lo lama rim taka hnathawkte an beh reng a, an hnathawh dan tihchangtlun zel a nih lohna leh an thawhrim ang hû-a hlawkna an hmuh lohna ram chu a la kal fuh chiah lo deuh a ni maithei...🤔

2412021

Naupang takngial pawh a thiltihin a intilang ṭhin,

A thiltih chu a thianghlim leh a dik emawin.

- Thufingte 21:11

Keimahni lam kan insawifiah dan emaw, thlarau lama kan thûkzia te, kan zai tui dan te, a thu lam ringawt aṭang chuan tunge kan nih a fiah tak tak ngai lo.

Naupang, a thiltih hmanga a inthup thei lo ang hian, kan thiltih duh dan, thianghlim leh thianghlim lo kan nunpui dan te, dik taka kan tih leh tih loh te, enge kan tih ṭhin, tihte hian kan nihna a tarlang zâwk zel, tih hi BIBLE min hrilh dan chu a nih si hi...📖

Pathianni hman nuam u le..

2312021

Nizan khan sports channel-a programme pakhatah Arsenal striker, Aubameyang hi zawhna chi 4/5 vel an zawhna an rawn tilang a. "Pakhat zawk chauh thlan awih nise, Ferrari nge i thlan ang Lamborghini?". "Thlan a har viau naa, Lamborghini ka thlang ang", tiin a chhang a.

Hmanah Ferrari car Company neitu, Enzo Ferrari khan Tractor company neitupa, Lamborghini hnenah, " Tractor driver i ni a, loneitu i ni, khawvela car ṭha ber (Ferrari) ang te chu i khalh thei ve lovang" tiin a nuihzat fu a ni awm e. Lamborghini chuan, " Ni e, loneitu mai ka ni" a tih hnuah, Lamborghini car a lo piang ta a ni awm e...

Nilen nuam u le..

2212021

Kum 22 zet a liam ta...

"Khawvela hlauhawm ber chu, miin rintlakah min ngai lovang tih hi a ni" tih thu hi thlalaka HS lo langa kan kal laia kan Headmaster thusawi, vawiin thlenga rilrua la tâng reng ṭhin a ni.

Treaty of Versailles ka hriatna hmasa ber chu he school chhunga Pu Dinga min hrilh a ni. Pu Lawma zârah Longfellow, Wordsworth leh Leo Tolstoy te kan ngainat ve phah a, Pu Jacob-a (RIP) Atom ti ri kha bengah a la châm fo mai. Trigonometry te kha Pu Chhandama'n min barh hawng hawng a, utility tih thumal hmuh rual hian Pu Hmuna Economics period kha mitthlaah a la lang fo.

Khatihlaia zirtirtute leh zirlai zawng zawng kha kan ṭîlṭîak zo tawh, mahse, kan nun thawnthu tam tak erawh he hmunah hian a la awm reng..😢

2112021

Mouawiya Syasneh, kum 14 mi lekin, kum 2011, Feb. thlaa, ngaihtuah chiang lem lova an school hungna bang pawnlama an ram Sorkar duhlohna thu a ziah satliah khan, buaina inmung sa chhêm alh zualin tualchhung indo rapthlak a chawkchhuak ang a, Syrian maktaduai chanve an thi ang, tih a ring pha lo tawp ang. 

Tun ang, Pâwlkût thla ruah tlemte sur mai pawhin nasa taka khaw vawt a belhchhah thei a nih chuan, siamṭhat hna a ni emaw, chhiatna rapthlak thlentirtu hi thil lianpui aṭanga inṭan tur a ni vek bik lovang..🤔

Ni hman nuam u le..

2012021

Vawiin hi US President lakluh ni a lo ni ta maw? Tun ṭum US inthlang chu eng kan ti teh lêk nge ni, Mizoten kan ngaihven nasa mai a, kan buaipui dan zawk hi ninawm lamah a kal lek lek a ni.

Kristian leh tian lo inbeihna ang zawngten kan chhuah thul, ṭhenkhat phei hi chu kan ṭan zawk a chak loh chuan kan chhe vek dawn ni ten kan ngai hialin a lang a, a zialo angreng ngawt mai.

Hun lokal zel turah pawh, hetiang boruak a lo thlena mahni ngaihruatna nena thil zeldin chiam mai te, chutiang lo awih a, lo manganpui hluai aiin, khawvel politik inlumleh kual dan te, ram inlaichin dan chanchin te, ram inrelbawl dan bulthûm te uluk takin kan phak tawkin zir peih ila kan ziaawm deuh ang.

1912021

DIARY

Kumin chu eng ka ti nge mawni, ka diary lei tum ka tlawlh laklawh a, a ṭha lo angreng khawp mai. Diary hi kum engemaw zat ka ziak ve tawh a, thil chhinchiahna atan ka hmang ṭangkai fu mai. 

Keini ang, hriatrengna ṭha vak lo tan hian a ṭangkai zual a. Kum li kum nga a liam chuan, midang tana ho te te tur thil te hi ngainawm ti tak hian kan chhiar kan chhiar mai a ni, a ṭha ve angreng ngawt mai. 

Hei, nimin mai khan Tv.Angie-a'n Diary min rawn present nawlh mai a, a chungah ka lawm kher mai..

Nazi hovin Juda-te an suat hunlai boruak hnuaia Anne Frank-i'n a hun tawn leh chetvelna, kum 13 a nih kuma a diary-a a ziah, The diary of a young girl tih lehkhabu chuan a ziaktu thih hnu daihah khawvel a dengchhuak thar leh a nih hi.. Keini mihringte ai chuan nangni lehkhapuante hian dawhtheihna in ngah zawk a.. tiin a thil tawn leh suangtuahna te chu a diary-ah a phawrh mawlh mawlh mai a nih kha..

Ziaka thil dah ṭhat chín hi a lo ṭha ngawt mai. Kâa inhlanchhawn ringawt hi chu chiang lo a tam duh a, a rei tak tak hnuah phei chuan a sawi huai huai kan rin a ṭul châng a awm fova, thu inchuh tam tak hi a hunlaia ziaka an lo dah loh vang a ni fo mai.

 1912021

Queen Victoria khan, "William Gladstone-a bula ka awm hi chuan khawvela hruaitu ropui ber bula awm angah ka inngai a, Benjamin Disraeli bula ka awm chuan khawvela hruaitu ropui ber niin ka inhre ṭhin" a ti a. Nia, zaihonaah pawh zaithiam bula ṭhut hian kan zaithiam ve riaua inhriat mai hi awl tak a ni..😊

Khaw khata chengte kan incheibawl dan leh inchhawnchhaih kual vel dan hian khawzia hi a lo siam mai a lo ni a. Entirnan, rilru lama rualbanlo te hi an tlâkna leilung azirin engemaw chen chu an danglam thei khawp mai. Kan mihringpuiten min cheibawl dan aiin midang kan cheibawl dan leh chhawnchhaih dan hian kan nihna a tarlang chiang zawk, tih hi a dik thui ngawt ang. 🤔

1812021

Titi-a an sawi dan chuan, "Russian ho vansangah an lawn a, 'Pathian a lo awm lo reng reng' an ti a, American ho an lawn ve thung a, Pathian ropuizia an hmuh belh nasa" an ti thung a. Tak tak ni maw..?

Engpawhnise, thil tawn leh hmuh inang rengah Pathian hmel hmu chi leh hmuh phah lem chuang lo, chuti lam hawia ngaihtuahna pawh seng ngai chuang lem lo hi a awm theih khawp ang.

An chunga thil thleng apiang Siamtu hmuh fiah phah nana hmang thei te hi mi vannei ber an ni ngei ang...🤔

Pathianni hman nuam ule...

 1612021

Hnam upa leh fing apiangin inpuan chhuahna hmanrua an ngah. Mihring rilru chhungrila lungngaihna, hlimna, lunglenna, nun siamṭhat duhna lam hawi leh thil dang dangte hi fine arts chi hrang hrang, Lemziak, thu leh hla, rimawi, milim, insak, film leh hmanraw hrang hrang hmangin an tarlang ṭhin. Painting ho hmel te te, to tak taka an hralh fo chhan pawh hi a phena a ziaktu inpuanna/thawnthu zawk hi an hlut vang a ni tlangpui.

Keini hian kan ngah lem lova, thusawi leh thu leh hla (literature) bak kan nei meuh lo. Fine arts hmanga mi a inpuan chhuah hian midang hneh hrim hrim emaw, fak hlawh beisei ngawr ngawr lam aimahin, a tuimi tan chuan nawmchenna chikhat a tlin vang mai zawk a ni..🤔

1512021

Covid - 19 hripuiin kum khat dâwn min chenchilh hnuah, nimin khan Mizoram hman tur vaccine a lo thleng ve ta hlawl mai. Engzat nge, engtianga sem tur nge tih te chiang lo mahila, a hma ngawt ai chuan boruak a zangkhai ṭan a, Pathian zârah nunphung pangngaiah kan lêt leh thuai beisei zêl phawt ang.

Rilrua riak reng chu, hripui lêng hnuaia kan nun dan tam tak hi chhunzawm zui duhawm tak tak a tam mange, tih hi a ni. Nunphung pangngaia rawtna mawlmang leh tih âwm pawha ngaih loh tur kha, loh theih lovin kan han hmang a, thil ṭha a lo lang nual mai.

Tih ngei ngei tura kan ngaih thil ṭhenkhat, tih lem loh pawha kan lo chhiatpui lem loh te, kan tih ngai loh tih thar atana ṭha tur âwm te pawh a awm nual mai. Lo chhui zui ve teh u..🤔

 1412021

Tunlaia ṭawngkam lâr tak pakhat chu 'new normal' tih hi a ni. 'Pangngai thar' tihnaah ngai mai ila.

Tunhma deuh kha chuan phone nei te kha mi nâwlpui aia neinunga ngaih an ni a, tunah chuan thil pangngai thar a lo ni ta. Covid-19 denchhena nunphung fimkhurna te hi new normal-ah neih zui a ngai a ni, te an ti a, a ṭha fu mai.

New normal tam ber hi chu hmasawnna leh hun her zelin min pek a ni a, dan theih pawh a ni lo, tin, khawsak awlsamna min petu an ni hlawm a, a ṭhatlohna aiin kan ṭangkaipuina a khîn zawk fu hlawm ang.

Chutihrualin, new normal ṭhenkhat hi chu abnormal-a lehlin leh daih chakawm tak tak hi a va tam e aw...Han ngaihtuah zui ve teh..🤔

131202

Lawng hi tuipuiah kal kal lovin vaukamah ding ṭha hle hle se lawngchhiat a awm lovang a, thlawhtheihna pawh ṭumhmunah ding reng mai se, thlawhna tla avanga mi tam takin nunna an chân ṭhinna kan pumpelh a ni leh mai. Mahse, chu chu siam an nih chhan a ni si lo.

Thufing pakhat chuan, "Thil ṭha, tih i hlauh/huphurh zawng tak i tih luih ngam apiangin i puitling sauh zel ang" a lo ti bawk a.

A him chin, a nuam tawk vel leh a hlimawm lai kal pêla chona hmachhawn fo, hmasawnna kawng dapa hma thar zuan zel mai rilru pu mi khua leh tui tamna ram apiang an changkang niin a lang tlat...🤔

 1212021

Edenthar-a ruang chhar chungchangah boruak lian tak a awm a. Mithi awmna vengin chhiatni fund a pek loh avang leh pem lehkha a neih loh avanga ruang an lak duh loh thu a darh chiam a, chumi chungchang demna thu kan rikpui leh ta hlut mai.

A awmna vengten an tihsual leh sual loh te, an demawm leh demawm loh te chu thudangah dah ila. Chulam aimaha rilrua lo lian ta zawk chu kan thinrim inhrikthlakna ṭawngkam kan duhtui lo lutuk ṭhin hi a ni.

Lo tidiklo palh pawh nise, YMA pumpui han dem buaih buaih mai te, Mizo tlawmngaihna thleng thlenga vaihma hmiah hmiah mai pawl kan han awm mai te hi a mak angreng ṭhin ngawt mai. Helaia Branch YMA pakhat dema YMA hrim hrim tizawnga kan sâwt luih luih lai hian khaw pakhat Br.YMA chuan thawkmawh chhungkaw lo an vahsak ve mek bawk tih hriat tel a duhawm hle.

He thil thleng chungchangah kher lo pawh, tuin emaw thil a tisual a, thlahtute thleng thlenga vai hmer te, khaw pum dema han dem mai ang chi te hi thil ṭul lem lo a ni.

Thinrim hi khap reh ngawt theih a ni lova, thinrim thei lo mihring kan awm hek lo. Mahse thinrim laia kan mizia leh ṭawng chhuah duh dan erawh kan thunun theih a ni. Mihring mize hriat awlsamna tak pawh a ni awm e.

1112021

Thu leh hla thlirna tlâng chauh aṭanga thlir pawhin Bible hi lehkhabu ropui ber pakhat a tling. Bible avanga khawvel thu leh hla phuisui nasatzia hi sawiin a siak lo hial ang. Kristiante thlirna tlâng aṭang phei chuan lehkhabu nung, thiltithei leh innghahna bulpui a ni.

Chutihrualin, a inrinṭawmtute hi ngaihdan hrang hrang nei kan ni a, a thu in min pâwl dan hi a inanglo nasa êm êm a, kan pawhfân duh dân a dang thei viau mai bawk. Chu chuan Kristian sakhaw vuantu ṭheuh ṭheuh, Kohhran hrang hranga min ṭhen darh hi a mak lova, a âwm ngawih ngawih zawk.

Engpawhnise, zirtirna dik lo hulhual te chu a awm thei ang a, chulam chu thuhran nise, Kohhran hrang hrang te hian thlen tum inang kan nei a, kan hmanrua erawh a dang deuhah ngai mai ila, fiamthu piah lama Kohhran rin dan inhmusit emaw, rin dan inpaihthlaksak tuma intai lovin, lungrual takin rawng kan bawl tlâng zel thei tho ang tih ring ila a fuh zêl rinawm.

Vawiin hi Mizorama Kohhran lian ber, Presbyterian Kohhran din ṭan ni champha a ni a, hemi pual hian chibai vek ule..🤝🏻

1012021

Hripui lêngin khawvel a tuam a, ram lian lutuk bik lem lovah pawh rapthlak tham an boral tawh a, an boral mek. Ram dang dinhmun thlir chuan kan la ziaawm viau mai.

Lirnghing na fe fe in khawvel ram hrang hrang a nuai fova, mi tam tak an thih bakah in leh lo a tlu chhe rem rum a. Chutihlaiin lirnghing na tak thleng thei reng leh a kalkawng kan ni chungin chhiatna rapthlak kan la tawng lo.

"Kan ram dinhmun a ṭha lo, inenfiah kan ngai, Pathian thu kan awih lo" te han ti ṭhin bawk mahila, mifel tak tak, Pathian thu pawisa tlat mai mi te, Kohhranhote ṭawngṭaina leh Pathian beisei tlatna te hian kawng tam takah awmzia a nei tih a lang nawn fo mai.

Ram dang him zawh lohnaah pawh Pathian thuawih tlat te zârah he ram hi chhanhimin a awm ṭhin a ni tih hi rinhlelh rual a ni love..🤔

Pathianni hman nuam u le..

 912021

Aesopa thawnthu pakhatah khan, 'Sakei hian a hun tawp a hnaih tawh thu leh, a thurochhiah ngaithla tura ramsa zawng zawng a sâwm thu a thantir vel a. Ramsa te chu thurochhiah ngaithla tur chuan Sakei pukah chuan an lut zut zut a. Sihal hi a lut ve duh hauh lo mai a, puk kotlanga a awm chu Sakei chuan a luh duh ve loh chhan a zawt a. "Ramsa lut lam hniak tam tak ka hmu a, a chhuak lam hniak ka hmu tlat lo mai, ka lo lut lo mai ange" a ti a, a kalsawn ta daih a.' tih hi a awm a 

Thu thang engemaw a lo awm a, kan han lem nghal duak duak mai a, ngaihtuah chiang lem lovin kan han pu darh nghal hluai zel mai bawk a, inbelhchianna mumal pawh awm chuang lem lova tute emaw sawi aṭanga  midang han râl rin chhiat nghal ngawt mai te, thu inchuh engemaw a lo awm a, lehlam lehlam thu ngaihtuah chiang hmasa mang lova ngaihdan pik chhuah nghal puat puat mai te hi a zia lovin, a him lo fovin a rinawm.

A nghing apiang bawh ngawt zel lovin, ngaihtuahna sêng hmasa hret ṭhin ila, mualphona tur tam tak kan pumpelh theiin a rinawm..🤔

Nilen nuam u le...

812021

THUNEIHNA LEH BUAINA

Khawvel ram ropui ber, USA chuan a ram chanchina inthlan hmingchhiatthlak ber ni-a mi tam takin an sawi, inthlan vuakvet buaina an tawng mek. Tling lo zawkten a tling zawkte tlin dan a fello ni-a ngaiin tling zawkah an inngai thung a, an buai ta a ni ber. Nimin khan lungawilo ṭangrualin US Capitol an bei a, hei hi kum 1814-a British hovin an beih hnua Capitol-in beih a tawh lehna hmasa ber a ni. 

Bashar Al Assad-a'n a thuneihna a bansan duh loh avangin Syria ramah 2011 atang khan mi maktaduai chanve zet an thi tawh. Harsatna namen lo an tuar mek zel.

Khawvel ram hrang hrang buaina hi thuneihna kaihhnawih buaina deuh vek a ni ti ila a sual tam lovin a rinawm.

Mawlmang taka ngaihtuah chuan, a ruata ruat ni lo, a thlana thlan thuneihna ang chi hi chu a thlangtute duh ber ṭha takin an dingchang mai tura ngaih a ni a (Inthlan tihchingpen leh dik lo tak tih chu thuhran nise..).  Mahse, he thuneihna hian mi tam tak a ti pangngai lo fova, a thlangtuten an hnawl tawh hnuah pawh thuneihna la seh tlat emaw, thlangtuten an duh ngawih ngawih chung pawha thuneihna hlan phal lo tlat ang chi an awm ta ṭhin hian buaina a hring chhuak ṭhin a ni.

Hetiang hi ramin a tuar a, hmasawnna a tiṭhuanawp a, tawrhna leh thihna a thlen a, ram nuam tak ni tur ram hrehawm theihtawpah a chhuak fo ṭhin a nih hi maw...🤔

 612021

Thlalak pangpar hi en teh, enge maw a hrilh lo che maw..?

Geneva Bishop, St.Francis de Sales khan thu ropui tak mai, "Phun i nihna hmunah pâr rawh (Bloom where you are planted)" tih thu hi a lo sawi a.

Tlâkna leilung, rinawm taka kan hna kan hlenna tur hmun, mawhphurhna hlan kan nihna huang, tute emaw kan kut liau liaua an inghahna khawvel hi kan nei vek ang.

Kan pârpui tur kan vuaisan daih a awm thei angem? Phun kan nihna hmun kan hmusit ṭhin em? Kan pârna hmun tur dik tak kan hai palh fo lo maw? Pâr kan chhuanna tur kuhmum dang kan zawng fo em? Pâr dan dik lovin kan lo pâr reng em?

Phun kan nihna hmun ṭheuhah, dik takin pâr thei ila, pangpar huan mawi tak kan siam thei tur...Chu chuan pârzu tlàn khuai tam tak a hip ang a, khawizu min pe lêt ve thung mai ang a...🤔

 512021

Enge i ngaihdan?

Mihringin nuam kan tih berna hmun chu ngaihpawimawh kan hlawhna, ngaihsak kan nihna leh neitu ni ve a kan inhriatna hmun hi a ni ang. Inlaichinna kawng hrang hrang hi inngaihpawimawhna hian a tiṭha a, a tinghet ṭhin. 

Inngaihpawimaawhna lantirna ṭawngkam pawimawh tak pakhat chu, Enge i ngaihdan? tih hi a ni ang. He zawhna inzawh hi tlâwmah kan lak fo avang te, ṭul kher lem lo ni-a kan hriat fo avang te hian inlaichinna leh thawhhona tam tak a ṭhuanawp ve thei fovang a...🤔

Enge i ngaih ve dan?

 412021

If I can stop one heart from breaking,

I shall not live in vain ;

If I can ease one life the aching,

Or cool one pain,

Or help one fainting robin

Unto his nest again,

I shall not live in vain.

- Emily Dickinson

Thinlung beidawng let dèr tur pakhat chauh pawh ka tihtawp theih chuan,

Ka nung thlâwn love.

Na tuar pakhat pawh ka lo chhâwk zangkhai theih a, 

Hrehawm tuar pakhat chauh tal ka lo tihziaawm ve theih mial a,

Tual thi mai tur vate pakhat chauh pawh him dama a buzâwl ka luahtir leh thei a nih hlauh chuan..

Ka nung thlâwn love..

Vawiin chu American poet, Emily Dickinson poem ropui hmang hian chibai u le..

Midang tana malsawmna ni tur hian miropui nih a, thil ropui tak tih kher a ṭul love..Thil ṭha duhna thinlung nen chuan thil tê tham te pawh hi a hlu zel mai.

 312021

Kristian hla phuahtu ropui, Fanny J Crosby kha mitdel a ni a. Ṭum khat chu mi pakhat hian "Pathianin talent a pek ṭhat tehreng che nen, hmuh theihna a pe tel lo che hi chu a va pawi em!" a ti a. Crosby chuan, "Ka pian hlim khan Pathian hnenah dil thei ni ila mitdel ka dil tho ang, a chhan chu vanram ka thlen hunah ka mit a var ve ang a, ka hmuh hmasak ber tur chu Isua Krista a ni dawn a, a ropui danglam dawn em asin!" a ti daih mai.

Rev. Vanlalbela kha Pathian thu a zirlaiin hmuhsitna nasa tak a tawk a. Khami chungchang an zawh khan, "Min hmusitute kha ka dem hauh lo, hmuhsit awm reng ka nia lawm.  Ka rethei a, engmah neih ka nei bawk si lo, ka hmuhsitawm em a ni, ka vui lo reng reng" a ti mai bawk a..

Pathian mite thil thlir dan hi chu a dikin a va hahdamthlak ṭhin tak! Eng dinhmun hnuaiah pawh Pathian vanga mi an lungawi miau tawh chuan sual tân han hneh ngaihna hi a vang tawh bawk a ni.

Kumthar Pathianni hmasa ber chibai u le...🤝🏻🤝🏻

212020

DAM MAN

He thu i chhiar paha thâwk i lak rual zel hian khawvel pumah mi 2 thi zat zat ang an ni tih i ngaihtuah ngai em?

Mithiamte chhut dan chuan puitlingin dam khawchhuah nan nitin oxygen fir 550 ltrs. kan mamawh a, oxygen cylinder, 2.75 ltrs. dawng hi ₹6,500 man a ni. Nitina kan oxygen mamawh chu cheng nuai 13 hu vel a ni tih i chhût chhuak thei ang.

Thil dang chhût tel miah lo pawhin dam man hi Jeff Bezos te, Ambani te tan pawh rei tak han tlin chi ziazâng a ni lo.

Kumthar min petu hian kan dam khawchhuah nana thil ṭul zawng zawng, sumin a lei zawh rual loh thil te hi a thlawnin min pe tel vek. Kan va hausa-in, chapo ngawt tur hi kan va ni lo lawi si em!!🤔

 112021

Zaithiam, Brad Paisley chuan, "Naktuk hi lehkhabu, phek 365-a chhah, phek hmasa ber ziah ṭan ni a ni a, lehkhabu ṭha tak ziak ang che" tiin, kumhlui thlah niin a lo sawi a.

Hun kal tawh, siam ṭhat theih tawh loh chu liam sela. Kan nuna tihfuh loh, hmalam panna kawnga min uairittu chu thlauhthlaa, zangkhai zawka ke pen ṭanna hun ṭha a lo her chhuak e. Kumthar min petu hian bul ṭan tharna hun kan la nei a ni tih min hriattir a tum a ni ngei ang. 

Vawiin aṭang hian thawnthu ngaihnawm bul chu i ṭan ang hmiang..🤔

Kumthar chibai le..🤝🏻