1942021

Midangte hian kan harsatna te min chinfel pui a, puih kan ngaiha min puih te hi an duh lo a ni ngawt lo maithei, keimahni zawk hian kan zir lo a ni ve thei  ang..😇

1742021

Han ti ve khanglang ila, kan naupan laia sikula min hrilh ṭhin pakhat chu, 'mi pakhat hian mihring taksa awm dan a hre chiang lutuk a, tiang hawl lo chuan a kal ngam lo' tih hi a ni.

Nia, kan thil hlauh tam ber hi a hlauhawmzia kan hriatchian vang a ni deuh ber zel. Kan hriatchianna hian hlauh leh hlauh loh tur min thliar thiamtir ṭhin a ni. Chutihrual chuan, tam tak hi chu kan hriatchian loh vanga hlauh tlat a awm ve thei tho bawk ang.

Thil kan hrechiang vek lem lo te hi hlimna chhan pakhat a lo ni thei khawp mai. Kan tawp hun tur hre miah lova hmabak leh hmalam hun atana hmachhawp kan han nei nitin thei te hi malsawmna chikhat chu a ni hrim mai..

Zan hun hman nuam u le..

1642021

Conference pakhatah mipui an pungkhawm hut hut a, nu pakhat hian naupang pahnih kaiin mipui a rawn tâwn tlang pawp pawp a. Miin an lo bâwr lût lût pa pakhat hnenah chuan, "Ka pu, heng naupang te hian i lakah bâ an ngah takzet a ni, an nunna i chhanhim si a" a ti a. Lawmthu a hrilhna pa hi Alexander Fleming, damdawi ṭangkai êm êm mai, penicillin hmuchhuaktu chu a ni. 

Kan mamawh mila damdawi ṭangkai an han hmuchhuak leh mai ṭhin te, hrilêng danna damdawi kan kawtkaia kan han dawng thei mai te hi a lawmawm mange. A nâwlpuia kan dawn kim theih hunah phei chuan a lawmawm zual ang. A rintlak turah ngai ila. 

Nimin khan hotute duhsakna a zârah Covid Vaccine ka la ve a, vawiin nilengin ka tho hleithei lo. Taksa na lo lai a awm zeuh zeuh a ni ber e. A sawp a na zêk a nih hi a...🙂

1542021

Mihring rilrua thil awm, awmze nei leh mawina neia puanchhuahna/ lantirna hi Art hrihfiahna chikhat a ni thei ang. Rimawi, thu leh hla, lemziak etc. te hi Art lanchhuahna hmanrua an ni.

Lunngaihna, lungphûrna, hlimna, ipikna leh vei zawng puanchhuah theihna hian rilru a tithawveng a, inupbehna hian rilru hrisel lohna, ipikna leh beidawnna a thlen fo. Zalên hek hawka inpuanchhuah hi mihring rilru hriselna atana pawimawh tawpkhawk a ni ang.

Art hian hringnun leh kan chenna khawvel hi a cheimawi a, puar leh fânna ni si lovah chuan hringnun kalchâwi tikimtu leh a tellova kan awm hleihtheih loh a ni.

World Art Day chibai u le...

1452021

Covid thawhhnihna-in khawvel a nuai mek laiin khawvela sakhaw puipun lian ber pakhat, Kumb Mela an huaihawt mup mup mai si a, darkar 48 chhungin mi 1000 positive an hmuchhuak a, an la pun belh nasa dawnin a lang.

Sakhaw inpuhmawh hrim hrim lam ni lovin, a nihna takah chuan a thawhkhatnaah khan Muslim inkhawmpui kha kan darh zual nachhan pakhat a ni tawh bawk a.

Sakhaw kalpui dan pawh hi a theih chin chinah ram dan nen a inmil fo a ngai. Sakhaw tin inzirtirna hian thihnu khawvel chauh ni lo, dam nawm tlânna thuchah a keng tel si a..

Zân hun hman nuam phawt u le..

1342021

Nizan lawka politician hlun tak pakhat thusawi, 'ṭhat loh theih lohna bâwm' a tih kha rilrua lo awm ve reng ṭhin a ni. Political platform aṭanga sawi a ni a, politics erawh ka sawi tum a ni hran lo.

Inenkawlna dikah chuan dik lohna a chêp a, inrelbawlna a ṭhat miau chuan ṭhat loh a zahthlak mai. Ram ṭhenkhat inenkawl danah te hi chuan thatchhiat hleihtheih a ni lova, PM meuh pawh dân tenau bawhchhiat avanga an chawitir chat chatna hmunah chuan tu tan mah dân palzût ngam chi a ni lo. A dik lo chu an per nalh mai zel.

"Mi ṭha pawh an lût a, engmah an ang zui lo," kan tih fo nachhan hi chu kalphung a fello a ni mai. Hei hi chhungkua leh khawtlang inenkawlnaah pawh a ni vek ang.

1242021

Tun hnaia researcher ten an chhut danin, puitling pangngaiin nitin social media khawih nan darkar 2 vel hun hmang ziah ang an ni a, tleirawlho hian chawhrualin darkar 9 thleng vel khawih ang an ni. Tin, khawvel pumah mi maktaduai chanve velin social media atchilh angin an chhut bawk a ni awm e. Dik tak maw?

Hun pe rau rauah kan hun pek nachhan erawh a inang lo viau chuan a rinawm. A tangkaipuite hi chuan an chhawr khawp chuan a lang a, a chhawr ṭangkai ve lem lo lah dem ngawt theih an ni hauh chuang lovang.

Engpawhnise, chhiatpui tham khawpa kan buaipui thil engkim mai hi a ṭha lo vek a ni zawk ang.

1142021

Farisaihovin Isua hêk an duh avanga, "Chawlhniin tihdam a thiang em?" ti-a an zawh ṭum khan, "Chawlhniah tihṭhat a thiang e" tiin kutzeng a tidam hmak mai a nih kha.

Benjamin Franklin kha a ni lawmni, "Tuktin vawiinah eng thil ṭha nge ka tih ang tih ka ngaihtuah ṭhin" titu kha?

Ni e, eng ni mai pawh hi thil ṭha tih nana hun ṭha a ni. Chutihrualin, nitina thil ṭha tih te chu a awlsam lo maithei, tin, thil ṭha ni-a kan hriat zawng zawng kan ti sêng hauh lo bawk ang. 

Engpawhnise, a hranpa taka thil ṭha kan tih theih loh ní-ah pawh thil ṭha lo tih loh tal tum ta ila, a ziaawm deuh ang..

Good Deeds Day leh Pathianni hman nuam u le...

1042021

Norway PM, Erna Solberg chu, a piancham vawi 60-na lawmna chhungkaw inhmuhkhawm a siamah sorkar dan dinglai, mi 10 aia tam punkhawm phallohna dân bawhchhia-in, mi 13 an kalkhawm a. Hemi avang hian nimin khan India pawisaa, nuai 1.76 hù chawitir a ni.Ram changkang te hi chuan dân hi an va dah lal ṭhin tak em aw..!

'Singapore te khian dan leh dùn an ngah tehchiam lo, an neih ang erawh chu khauh takin an kengkawh a, hotu lian an ni emaw, milâr leh hùhâng ngah an nih avanga inhriatthiamna an nei lem lo' an ti.

Dân chipchiar leh thui tak neih aimahin a awmchhun zawm ṭhat leh mumal taka kenkawh hi hmasawnna a ni.

942021

Tukin hrilêng kai dan tarlan aṭang chuan a lawmawm lo lam a ni ta zêl mai. Hrileng thawhkhatnaah kan state kan che ṭha êm êm a, Pathian awmpuina, Sorkar, task force leh tlawmngaia mi inpe te zâr kan zo a nih kha. 

Ṭawng khawlo ni lo sela, thawhkhatnaa che ṭha tak hi, thawhhnihnaa tuar na ber pawl kan la ni thei tih a chiang a, tunah hian a inmun ṭan mek pawh a nih hmel khawp mai.

Sorkar, VLTF leh chhungtinte kan intuaithar leh ṭan a hun e. A hmasa pawhin kan che chhuak hma kha kan vanneihpui pakhat a nih kha.

Nilen nuam leh phawt u..

842021

Hrileng thawhhnihna-in India ram a nuai leh mek a, sakhaw kaihhnawih kalkhawm lian tak huaihawt a ni bawk a, a darh zual chhoh zêl pawh a rinawm khawp mai. Kan State ṭhenawm, Assam Health Minister chuan, "Mask vuah a ṭul tawh lo, kan him rih, a ṭul hunah chuan kan inhrilh mai ang" te kha a ti a. 

Keini lam pawh tlem tlemin kan pung leh ta hret hret a, kâina chin hriat loh an awm ve zêl bawk a. Fimkhur hrim hrim hi a hahthlak a, inthlahdah hi a nawm tlangpui avangin hrilêng a han deuh duak rualin kan inthlahdah zui leh angreng fu tawh mai, fimkhur lehzual tura ṭan lâk a hun leh ta a ang khawp mai..

Engpawhnise, nilên nuam leh phawt mai u..

742021

Tunlai chu 'Pathian pâwl leh setana pâwl' tih ṭawngkam a lar angreng viau. Hmanni West Bengal inthlan hma deuh pawh khan a sâri kaih kâra Mamata-i ke lo lang te kha inbeih nan teh an hmang a. Uttarakhand CM thar lah chuan ṭhalaiho kekawr ṭet (ripped jeans) chungchang a khel rei fu bawk a..

A châng hi chuan politik khelmuala kan inbeih dan ṭawngkam tam tak hi chu a nawi ve ṭhin ngawt mai. Naupang chhe inhau te hi an ang rum rum ṭhin mai. (Tumah ṭan lam ka nei miah lo a nia...😃)

Engpawhnise, politik a ni emaw, tualzal nunah pawh kan ṭawngkam vawrh chhuah duh dan leh kalhmang hian mihring nihphung tlangpui hi a lantir fiah angreng ṭhin ngawt mai.

642021

Ni sensa hnuaia, thlantui luang zawih zawiha thawktu tan thing hlim leh thlifim a hlu bik ṭhin ang hian, in thawhrim poh leh in lawmna a sâng ang.

Hlawhchham ṭhinte leh hlawhtlinna tem ngailo te tan hlawhtlinna a hlu zual bik ang hian, in hmaa lawmna tur thlirin tunah hrehawm tawrh hreh suh ang che u. Ṭan lâk nan a la tlai lo ve..

Aibawk HSS aṭanga HSSLC exam tur zawng zawng te duhsakna sang ber ka hlan a che u...

542021

Tukin zingthawh hlima kan thu hriat hmasak chu a ngaihnawm loh hle mai. Kan khaw tlangval ṭhalai tak mai, Vena a'n boral ringawt mai a. Zirna Sikula rei tak lo inhrual tawh kan ni a, heti ringawta a liam hi a uiawm ngawt mai.

Hetiang hun a lo thlen hian, H.W. Longfellow poem, Psalm of life-a,

Art is long, and Time is fleeting,

And our hearts, though stout and brave,

Still like muffled drums are beating,

Funeral marches to the grave.

ti-a hringnun hi a hohna zâwn thlira a lo hohzia min hriat nawntir leh fo ṭhin.. Vawiin chu nilên a tinuam lo hle mai.

442021

Thihhnu khawvel beiseina hi nei ta miah lo ila, a beidawnthlak ngawt ang. Chatuan ram beiseina hian awmze neiin min damtir a, chatuan nunna chan inbeiseina hi thil nung dangte aia kan danglamna a ni.

Thihna hnehtu neih hi thihna kan hneh ve theihna awm chhun a ni a, vanneihna ropui ber a ni bawk ang.

Easter Sunday chibai u le..

342021

Rangkachak khawpui, Eldorado te, Zawlaidi te, Maurawkêla zâwng khuang te, duh duh herchhuahna khâwl te leh duhthusâm, awlsam taka neih mai theihna thil te hi thawnthu mai mai mah nise, mihring rilrua awm ve reng thil a ni. Hnam tin hian hetiang lam hawi thawnthu leh zêldinna hi kan nei fur ang.

Mahse, rah chhuah siamtu chu thiltih chauh a ni zel. Thing leh thei, awmhmun ngaia ding mai mai pawh hian rah chhuah tur chuan leilung aṭanga an chaw mamawh an lâk a, sik leh sa inthlak an hman ṭangkai ve tho a ngai.

Awlsam taka rah/hlawh chhuah theih thil chu a suák a nih loh vèk pawhin a hlutna a hniam ṭhin.

Nilen nuam u le..

242021

Kraws-a khenbeh meuh tlaka thiamloh chantir tur khan an puhna kha a ningnêl angreng ngawt mai. Pilat-a pawh khan a sualna a hmu zo ngang lo kha a ni rêng a...

Ama sualna lam kha dap chhuak zo ngang lo mah se, sual a phurhsak te sualna hi a sâng êm mai a, khenbeh loh chi ziazâng a ni lo zawk a ni.

'Ka sual lutuk, ngaihdam tlâk ka ni tawh lo, Hmangaihtu ka nei ve lo', tih te hi ṭawng chùang a ni. Khenbeh meuh tuara sual min phurhsaktu leh hmangaihtu ngaihnêpna a ni hial ang. 

Rev.Thansiama khan, 'Ran thlêng leh krsws aia hnaiah min pan dawn lo', a ti a. Ni e, a tih theih tâwk a ti tawh a, a bâk chu kan mawhphurhna a ni ve tawh ang chu..

Good Friday chibai u le..

142021

Hrilêng vangin duh angin kan inhrawn tam hman lova, kan duhkhawp inbuatsaihna kan nei hman ta bawk si lo.

Engpawhnise, keimahni chauhin hrilêng kan tuar bik lova, kan hun remchang neih pawh midang aiin a tlêm bik chuang lo a nia. Inrintawkna nen theihtawp chhuah ula, in bul vela thil thleng leh che vel ngaihthahin zirlaiah chauh rilru sawrbing tlat tum ang che u.

Vawiin 'intihder ni' aṭang hian a tak tak chauh buaipui lehzual a hun rih e. Aibawk HS, HSLC Candidate zawng zawng te, duhsakna sâng ber ka hlan a che u..

3132021

Greek thawnthu pakhatah chuan Lal pakhat, duhâm leh mâwl angreng tak mai, Midas-a a awm a. A khawih apiang rangkachaka chan zêl dilin a ṭawngṭai a, chhânin a awm a, a khawih apiang chu rangkachakah a chang ta tak tak a, rilṭamin a thi ṭep ta mai a, a tihsual a hre chhuak ta a ni awm e.

Kan duhthusam ang diak diak leh malsawmna dawn ka duh ang zawng zawng hi pekin awm ta ila, kan dam zo dawn hauh lo a lo ni. Mihring hi chhang chauhin kan nung si lova.

Vau thla ni hnuhnung ber kan han thleng leh ngawt mai te hi, rangkachak tam tak ai chuan a hlu zawk lo maw?

3032021

Khawchin thlir thiamten an sawi angin tukin chu ruah a lo thleng ta nge nge e. Ruah sur hma deuha thlí, khawpui ri leh kâwlphe han inṭhoh vel kha chu a râpawm lek lek zawk a ni.

Hnathawh tur ngah leh laklawh êm êm te tan chuan sur rih lo sela, zài taka hna thawh chhunzawm bawrh bawrh theih chu duhthusam a ni khawp mai. Chutihrualin, thlai chi thlak fel tawh te, tui harsa êm êm te tan chuan a lawmawm ve thung ngawt ang.

Ruahsur leh khaw ṭha te hi a thlâwna kan dawn ve ve a ni a, duhthlang thei pawh kan nih chuán loh hi maw...

Engpawhnise, ṭhal ruah sur kárah hian nilen nuam leh phawt u le..

2932021

Indona zawng zawng hi beih tlâka hlu a ni vek chuang lova,

Harsatna zawng zawng hi mut theih loh phahna tur khawpa tihhluhlân tur a ni vek hek lo.

Chhe nazawng hian siamṭhat a mamawh vek tihna a ni lova,

Thil khirh zawng zawng hi chinfel tur a ni vek kher lovang.

Tihdik loh zawng zawng siamṭhat tum vek a ṭul chuang lova, 

Thudik zawng zawng sawichhhuah kher tur a ni lo bawk ang..

Nilen nuam u le...

2832021

A damlaia mipui nâwlpuiin an chawimawi chhun chu Jerusalema lal anga a luh kha a ni deuh mai ang. 

He ni-a naupangten tûmkau kenga Isua Lalzia an puang chhuak ṭhin hi a hmuhnawm a, a ngaihnawm hle ṭhin mai.

Hei erawh ngaihtuahnaah a awm ṭhin, Jerusalem mipuite ang khan vawiina lal anga kan cheibâwl hi khenbeh tlâk lekah a ngaih zui theih khawp ang a, kawng ṭhenkhata kan auh láwm lâwm leh hlimpui êm êm hi, khawi hmunah emaw chuan kut silsan ét mai a remchan riau châng a awm thei maithei..

Engpawhnise, tûmkâu ni chibai u le...

 

2732021

African thufing pakhat chuan, "Sakei hian ama chanchin a ziah thiam ve hma chuan, thawnthuah sapêltute hi a chan ṭha an ni zêl ang" a ti a.

Thiamthu sawi lem lote hian kawng tam takah sual, fello, dik lo zawk chan an chan châng a awm fo thei ang. Mi, a insawifiah chiam duh lem loh avangin thudik hi a zawna zawn chhuah phawt a ṭul chang a tam mai.

A ṭawng chak leh insawifiah thiam apiang hi a dik zawk leh chungnung zawk an ni vek kher lo thei ang. 

Nilen nuam vek u le..

2632021

Kan nuna harsatna ṭhenkhat hi chu chinfel mai theih a ni a, chinfel theih loh harsatna lo thleng ṭhenkhat hi chu pawm mai chi a ni ang.

Harsatna lian tak ni-a kan hriat hi, ṭhenkhat tan chuan kalpah mai mai tâwk leka tê a ni thei a, engvaka kan ngaih loh buaina hi mi tam tak tan chuan dam thlakhlelh loh phahna tham a ni thei bawk ang.

Engpawhnise, kan chinfel theih loh harsatna chunga lungngaih chiam te, vanduai bik ngawih ngawiha inhriata beidawn mai te hian hlâwkna a nei lovang. Hahdam taka pawm mai ṭul chi tam tak hi a awm thei bawk ang.

Harsatna leh hringnun buaina kârah hian ni hman nuam phawt le..

2532021

Mimal inhuatna tel miah lo hian, thupek zawm a ṭul vang maiin mihringpuite chunga hléilen a ṭul châng hi a awm thei angem?

Kan ṭhenawmte buainaah pawh hian, sipai zawng zawng hi an sual vek a rinawm bik lo viau mai. Sipai leh a dodaltu mipui te zingah pawh inlaina hnai te, inṭhian ṭha te pawh an awm ve hian a rinawm khawp mai. Mahse thupek a awm a, an che a ni phawt mai. 

Thomas Hardy poem hi lo enchiang mah teh, a phuahna a rei tawh viau naa, a rilru natthlakin, a dik angreng a nia aw..

Indo thuthang leh buaina a lo awm hian rilruah a lo lang leh ṭhin..

2432021

He ni ah hian...

Nungdama ka la awm hi ka vanneih vang a ni satliah ngawt lovang, mawhphurhna hlan chhunzawm ka ni tihna a ni tel ang.

Ka dam kum a pun tam poh leh ka thih kum a hnai tihna a ni a, inbuatsaihna hun ka nei tlêm hrét hrét tihna a ni tel ang.

Kum a pun rualin sûn ka ngah tial tial a, hringnun awmphung min zirtirtu ka ngah deuh deuh tihna a ni tel ang.

Dam hlutna zir chhuak tur leh dam rualpuite nena hriatreng tur thil hlu siamho thei turin vawiin hi pêk ka la ni, tihna a ni tel ang.

2332021

Burma buaina zual lam pan zêl leh mipui tawrhna nasa tak hi hmuh leh hriat a hrehawm lehzual ta hle mai. 

Heti taka mipuiin an tuar chung hian khawvel ram liante hi duh aiin an thawm a na lo riau ni te hian a lang a, kan sorkar laipui lah chuan râltlân lo mikhual lo tur zâwngin thu te a la chhuah tak deuh deuh a..

Engpawhnise, keini state hi chuan hlau baklênga himna rawn zawngte hi chu lo hum theih dan zawn tlat zêl a ṭha mange aw...Kan hruaitute han ṭang zêl teh u..

Kan unaute tawrhna hian nilên a tihnawm loh châng a tam riau mai...

2232021

Covid-19 avanga India ram puma Janta Curfew puan a nih kum khatna chiah a ni. India ramah ngawt pawh hri kai, enkawl dam leh boral ta tamzia chu kan hriat vek hi. Vaccine a lo chhuak a, March ni 20 thleng khan mi maktaduai 40 chuangin an dawng tawh a ni awm e. Hei tunah hrilêng thawhhnihna kan buaipui ṭan leh dawn pawh a ni maithei. Enge kan an zel dawn ni? Mipui nâwlpuiin inven dan leh hrilêng nihphung kan hrethiam thawkhat deuh tawh a, Pathian zârah kan zia chho zêl turah ngai ila. 

Tunlaia lâr thar ta riau, kutsil hi uar zui zêl tlak a ni. Tui hi chhungtinin kan neih tlân leh ban phak mai a ni hlawm a, kutsil nan baka mihringin kan mamawhna sânzia pawh sawiin a siak lovang. Tui hlutna hre chungin kutsil leh in tam uar tial tial ila a ṭhat zêl mai âwm hi maw...

World Water Day chibai ule...

2132021

Kan damchhung ni te chhiar dan tur min zirtir ang che,

Finna thinlung kan neih phah hialna turin.

-Psalm 90:12

Seneca chuan, ,"Kan dam chhung ngei hian nun dan kan zir a ngai" a lo ti bawk. 

Nun dan tur hi zir tham a lo awm a, nitina nun kawng chhiar dik thlap thlap tur phei chuan fimkhur a ngai viau ang. Innghahna bulpui (principle) neih loh phei chuan nun hi a mumal mawh khawp ang a, a tâl mai mai theih hle ang. Dam chhung a rei si lova, a chhiar dik dan tal hi chu mahni ṭheuhin kan zir thiam a ngai a ni.

Pathianni hman nuam u le..

2032021

Lungpho pa pakhat pawh a feh hlanin ṭhelh rual lovin a in a lo kâng hluah mai a, a thlir vung vung a, "Ar hrik leh khumfá an va thi duh dawn em..!" a ti e, an ti. "Chawhmeh neih loh te chu chaw ei chhung chauh alawm" ti mai chi pawh ka hria..😃 

Nitin hian lungawilohna tur hi zawng ta ila, kan duh aia tam kan hmu ang.

Midangah ni lo, keimahniah hian hlimna chhan tur zawng ila, a hahdamthlak mai. Mahni ngaihdan aṭanga midang ngaihdan tur thlenga rin zâwn a, mi chetvel dan lo lawm loh pui chiam te hi ṭul lova intihhahna mai a ni ang. Keimah hi ka hlimna siamtu tur chu ka ni ang.

International day of happiness chibai u le..

1932021

India ram PM hmasa ber, Nehru-a poem ngainat ber, Robert Frost-a poem ropui hmang hian nilên nuam u le..

Ni e, kan mut hahchawlh der der hma hian mêl dang han kal belh leh hrâm tur kan la nei hlawm ang a..

Mi ropui leh hlawhtlinga khawvelin a ngaih te hi mi bâka pèn thui hret peih te an ni fo mai..

1832021

Thil reng reng, a pawimawh dan indawt thliar thiam hi mihring quality enna ṭha tak pakhat a ni ang.

Ngaihpawimawh ngawih ngawih tur chi te, pal liam deuh mai fuh zawk thil te tam tak a awm ang. Buaipui loh tur zawk thila inhambuai chiam a, a pawimawh zawk thlauhthlak leh hnî hnè lawi si ang chi te hian tlâkbalna a thlen fo mai.

Ram leh khawtlang inrêlbáwlnaah pawh hian pawimawh hmasa, a hnuhnung lama kan dah avanga sum leh tha luang ral hi retheihpui tham a ni tawh awm mange...

Nilen nuam ule..

1732021

Mihring nuna pawimawh ber pakhat chu rilru muanna (peace of mind) a ni. 

Mi, inhnialnaa a ngawih hmasak zawk avangin a tlâwm zawk tihna a ni ngawt lo maithei a, ṭawng ve lem lo te hian ngaihdan an nei lo tihna a ni vek lovang. Diriamna chhang let lova nui liam mai te hi an chak loh vang a ni ngawt lo thei a, a ṭulna hmuna ngaihdam dil hi tlâwmna entirna a ni lo bawk ang. Inlaichinna a chhiat ai chuan derdèp zawk anga lan mai hreh hauh lo khawpa rilru puitling leh rilru muanna thlang zawk an awm ṭhin.

Dik ber, chak ber, fing ber, midangte ngaihsan nih tuma hmanhlelh ai chuan nun tlâwm leh rilru muang nunah ropuina hian zung a kaih zawk fo a nia..

1632021

Mi pakhatah famkimna hmuh tum lo ila, ṭum khat  tihsual palh hi thil tih ṭhat tawh zawng zawng in theihnghilhsak nan hmang lo bawk ila nunho a nuam hret zawk angem?

Tihsual luih nawn fo erawh 'palh' a ni lova, duhthlanna a ni zawk thung ang.

Nilen nuam u le...

1532021

AD 1260 bawr vel khan zin mi hmingthang, Marco Polo pa, Niccolo leh a patea, Matteo te chuan an zin-vahna lamah khatihlaia lal ropui, Kublai Khan, Mongolian lal ram zaupui mai baka China ram pum awptu hnen an thleng a. Ani chuan duhsak takin a lo mikhual a. An haw dawn chuan a lal rama Kristian sakhua leh thiamna hrang hrang zirtir tur mi 100 tír tura Pope a ngenna lehkha a hawntir a.

Pope inthlak kual mumal loh avangin an tihlawhtling thei mai lova, a hnua Pope ruat a nih hnuah pawh missionary 100 tir lovin 2 an tir a. Anni lah chu harsatna hmachhawn ngam lovin an kir leh ta zawk a. Ruahman angin thil kal fuh sela, khawchhak lam ram sakhaw hmelhmang leh Buddist kulhpui pawh khi engemaw chen chu a danglam deuh ngeiin a rinawm.

Ram biru leh leilung chhengchhe bawk si paltlang a, missionary ṭha tak tak te hnathawh zâra chanchinṭhain kan ram hmelhmang leh nunphunga hmasawnna a thlen zozai hi a ropui takzet a ni.

Chanchinṭha thlenni chibai ule..🤝🏻

1432021

A uire lai tak an man, uirenu kha thiam thu sawi tur nei lovin a ngawi reng ringawt a, mahni inten ngawih ngawihin Joba kha vaivutah a ṭhu hnawk a, sual a intih êm avangin Peter-a'n amah kalsan turin Isua a ngên ruai bawk a.

Hengho tan hian Pathian hmangaihna hlutna a sâng zual bik ngawt ang a, haider a har ngawt bawk ang. 

Thil hlu hlutna chu mamawhna sân danah a innghat miau si a...

Pathianni hman nuam u le...

1332021

Douglas Mulloch poem ropui danglam hmang hian nilen nuam u le..

1132021

Kan chunga thil thleng te aiin engtinnge kan chhân lêt (react), tih hi a pawimawh zawk thei angem?

Vanduaina leh malsawmna ka chhân lêt dan te, thinurthlak leh lawmawmin min chêt chhuahtir dan te, chânna leh hlâwkna hmuna ka nungchang te, khawhârna leh zâuthâuna ka lantir dan te, thuneihna ka chan sân ber lai leh hnungzuitu mai ka nih laia midang ka chhawnchaih dan te, manganlai leh ka arpa chan laia ka ṭawngkam hman duh dan te zawk hi a pawimawh lai chu a ni ang.

Nilen nuam u le..

1032021

Mark Twain khan, "Mihring dam chhunga hun pawimawh ber pahnih chu, kan pian ni leh kan pian chhan kan hriat chhuah ni hi a ni" a ti roh a...

Nia, kan pian dan leh pian hun te hi chu kan duhthlanna a ni lo ṭheuh mai a, sawi tur tehchiam pawh kan nei lo. Mahse, pian chhan hriat chhuah erawh kan mawh a ni thung ang.

Dam chhan hranpa nei pawha inhre lem lo, tum pawh nei lem chuang lo leh dam ve mana mawhphurhna lâk ve tur ngawih ngawih pawh hre chhuak zo lo hian a tâl pàwl ve mai mai theih khawp ang. Mi ropui nih leh nih loh lam aimahin, keimahni tâwk ṭheuhah pian chhan zir chhuah tur hi kan nei ṭheuh hlawm ang a...

Nilen nuam u le..

932021

Kan chunga thil thleng te hi kan dawnsawnna dinhmun a zir zêlin a lawmawmin a lungchhiatthlak thei a, a ngainatawmin, a ngeiawm thei bawk ang. Sikul naupang tan chuan ṭan dâr ri hi a ngeiawm thei hle ang a, chu dar tho chu bân huna a lo rik chuan dâr rimawi ah a chang leh daih thung ang.

Kan ngaihhlut êm êm, sum leh pâi meuh pawh hi, tihdam theih loh natna tuar chung chuan eng teh ual a ni lovanga, thlalêra tuihâl dang châra chau tan chuan rangkachak tlâwn aiin tuisik no khat pawh a hlu zawk ang.

Mihring nuna thil kan tehna tam ber hi chu a tehtu dinhmun aṭangin a ni fovang. 

Nilen nuam u le..

 

832021

Hmanah, loneitu fanu, tleirawlte khan France sipai rual khup zawi tawh leh phurna reng reng nei tawh lo te a cho thova, indonaah hnehna ropui tak a chanpui. Joan of Arc kha France ram tan Hero pakhat a ni. Mi thianghlim nihna an pe pawh kha a hunlai ngaihtuah chuan a âwm viau.

Burmese tleirawl, Kyal Sin thihna-in khawvel a deng chhuak a, a hnathawh ropui leh ropui loh chu thuhran nise, he tleirawl ram hmangaihna rilru hian khawvel a hneh a ni.

Engtikah emaw chuan Burma ram pawh mipui zalênna ram a la ni ve ang a, he tleirawl, ram hmangaihtu hming hi lam rik nawn fo a la ni ang. Chutih hunah chuan, Everything will be OK, tiraw Angel?

732021

A hunlaia Nehemia nihna kha tun ang lai ni ta se, Security Adviser chi khat ang chi tur a ni. Ram khat lalberin a rin êm êm mai a ni.

Ramdangah hna pawimawh tak thawkin a awm a, mahse, Jerusalem tlâkbal thu an hrilh rualin thildang a ngaihtuah thei tawh lo. Khawdang hawi hman lêk lovin kulh thawm ṭhat hna a thawk ta miah miah mai a, thil dangah koh pên zawh a ni tawh lo..

Israel ram te chu dingchhhuak lo zià an ni hleinem, tunhma aṭangin an ram leh hnam hmangaih an tina em!!!

Pathianni hman nuam u le..

632021

Hringnuna hmalam pan zel tumna rilru hrisel tak tarlanna Poem ropui hmang hian nilên nuam u le..

532021

'Chapchàr Kut' hi Mizo hnamzia lantir thartu kût pawimawh tak, chhawm nun zêl a, ṭhangthar lo awm zêl turten Mizo eizawnna hnukpui an theihnghilh mai loh nana inzirtirna hmanraw pawimawha chantir zêl chi a ni.

Chutihrual chuan, Chap tih-Chàr tawh loh dan mai ni lo, a khaw nâwt nâwta 'chap' siam tihbo dan hi a titheitu lam hi chuan zawn ngat ngat erawh a ṭul ta takzet a ni.

Chap zau pui pui siam hi thawnthu hlui chang tawh se, kût hmang te, zirlai leh lehkhabu hmang chauh te hian inzirtir tawh nise hmasawnna ropui tak a tling ang a, sik leh sa nuam zawk neiin, nungcha leh tuihnà a pung bawk ang. Chu chu sum tam takin a lei zawh loh kan ram rohlu tur a ni ang.

Chapchar Kût chibai u le..🤝🏻

432021

Tunlai khawvela pa hausa ber, Elon Musk chuan, " Ka naupanlai chuan thim hi ka hlau thei êm êm a. Mahse thim hi êng hmuh theih chin sei zawng tehnaa, 400-700 nanometers inkâra êng zùng (photon) a awm loh vang mai mai a ni tih ka hriatthiam tâk hnu chuan, photon awm lo, lo hlauh ngawt chu ho ka ti ta riau mai a, thim ka hlau ngai ta lo" a ti..

Nia, thil hi a nihna tak zirchian hma chuan, hlauhawm hmel tak te, harsa hmel êm êm mai te, huphurhawm tak anga lang te, tih theih rual loh ang hian te'n a lang fo thei ang.

Thil kan chîk peih loh avanga ṭul lem lova mangan chiam te pawh a awm theiin a rinawm. Entirnan, "China leh India an indo dawn", han tih hluai mai te hi manganpui hmaa han zirchian hlek ṭhin ni sela chuan a dân a dang deuh maithei..

332021

Pathian hian kawng engkima inang chiah thil hi a siam lo a ni maithei. Mihring ze inang chiah chiah te hi an awm lo tawp ang.

Kawng lehlamah chuan, mimal inanlohna hian nun a tiphuisui a, mamawh inphuhruksak theia min siamtu pakhat a ni. 

Dan, inkaihhruaina leh nunphung dik pangngai zawm tlân tur hi chu a awm mai a, chutihrualin, he inanlohna hrethiam lova inhrutrual luih tamna hmun apiang hi zalênlohna, inpumkhatlohna leh inlungruallohna hmun a ni fo thei ang.

Kan inanlohna kan cheibâwl dan a zirin hmasawn nan leh invuakchhiat nan a hman theih khawp thung ang.

232021

A hla leh kan tleirawl chhuah _(han ti ve khanglang ila)_ nun inkungkaih kual vel dân te chu thui tak sawi tur a awm ve ang. A hla phuah thiamzia leh zaithiamzia te chu kan hriat vek kha.. Sawi chiam lo teh ang..🙂

Hriat pawh min hre lo mai ni lovin, kan ram awmna pawh hi a hre kher ange maw? Mahse 80's chhova piang Mizo zingah a hla, 'Bed of Roses' hre lo chu rimawi ngaina lutuk an ni lo maithei...😃 Hepa leh a hla hi kan intineitu ve hle reng ringawt ṭhin a nih kha..

A lâi-ah hming, John Francis Bongiovi Jr., 'Bon jovi' ti-a kan hriat lar tâk hi a kalna lamah chuan mi ropui a tling ve ngawt mai. Khawvel huap milâr ni chunga nunphung nghet nei mi a nihna te hi entawntlak ve tak a ni.

Happy Birthday Jon...🎂

132021

Khua a'n ro vawng vawng mai a, hawina lam apiangah romei a zâm chîk chêk a. Khâm bakbahâi leh khawkrawk tak tak panga Vaube leh Farṭuah, theihtawpa an han vul chêk chûk mai chu Romani te ang tan chuan tawrh a har a ni ang chu, 

Tlang tin ṭuahpui leh vau vul lai khua ṭhal, 

Ka hawi ngam lo raltiang romei zing riai karah..

a ti vawng vawng mai nia..

Keini chauh kan ni lo, William Blake te pawh an insum thei bik chuang lo,

The Sun does arise, 

And make happy the skies. 

The merry bells ring

To welcome the Spring..

 a ti phûr ve súrh  tho a nia..🙂

Kan rilrua a thawh dân chu eng pawh nise, he hunin thu leh hla a tihhausakna hi a khìn ngawt ta ve ang..

Vau thla ni hmasa ber chibai u le..🤝🏻

2822021

Josepha, a unauten hralh lai leh a hnua rip chhunga khung a nih lai te khan, Pathianin a ṭhatna tura a rorêl a nihna hmuh thiam kha a har ve awm ngawt mai. Vanduai bika inngaihna hlir a rilruah a lan ve tho a rinawm.

Kan duh loh zawng tak kan chunga lo thleng ṭhin zawng zawng hi kan vanduai vâng a ni vek bik lovang; eng thil emaw atana buatsaih kan nihna hmanrua a ni ve thei ang.

Ruahmanna siamtu duh dân lo zâwnga kan ben per fo erawh chuan, Josepha tâwpna nen erawh a dang thei fû si ang..

Pathianni hman nuam u le...

2722021

Hlâwkna beisei vang ni lo, a ṭulna-in a phût avanga din, sorkar laka hrang, a chhunga mi leh sâte leh midangte ṭhatna tura pawl din hi NGO kan tihin a kawh ber pakhat a ni awm e. Amnesty, Greenpeace, Doctors without border etc. te hi khawvel huap NGO lian te zinga mi an ni ang.

Mizorama NGO hlutna hi sawifiah zawh a har ngawt ang. Hnam thil, ramri, sorkar khawih, ruihhlo, chhawmdâwlna lam, inpumkhatna etc. ah te hmalakna remchang lo a awm ve lo te hi a ṭha ngawt mai.

A bikin keini ram angah te hi chuan NGO tel lo hian awm ngaihna a vâng  khawp ang.

World NGO Day chibai ule..🤝🏻