Tun ṭum hrilêng hian nunphung pangngaia nungchate kan lo nêk chêpzia a lantir nasa mange aw..

Hrilên nachhana an puh len ber te chu nungcha man khawmsa hralh vêlna aṭangin a ni. Tun hnaia an zirchiannaah Pongolin, China rama an tawlh luh ṭhin te chuan Corona virus kaihnawih an lo pai ṭeuh tih an hmuchhuak tlat a ni.

Khuarel kan suamsam dan hian leilung dan a kalh a ni..

*Rom 8:19 hi kan harhpui a hun e..*

27.3

PATHIAN KO RAWH LE

Kan bul velah sing tam an thi tawh a, nuai telin an kai tawh. Nitin a punna a sang zel..

Him hrâm theih kan inbeiseina chauh hian hlimna min la pe mai chauh ni te hian a hriat theih rum rum mai.

A hming chauh hria, a hlauhawmna tak tak hre si lo, naupang pawi sawi lo, hlim taka an la nui iar iar te hian ngaihtuahna a tithui ru ta riau mai...

Kawtthler reh ruih hian tirilah min fan a, chanchin lêng vel hian a ṭha lam thlir thiam a tihar mange...

"Zoram i tawn tur i hre si lo" ti-a, patling ṭhankin ṭap rawi rawi khan hmulthi a tiding thar leh a, Syrian naupang, indona bomb puakin a per avanga thi turin, "Vanram ka thlen hunah Pathian ka hrilh vek ang" ti-a a ṭap zawih zawih khan lung a tichhe thar leh mange..! Kha naupang pawisawilo khan a han hrilh ta tak tak em ni, tih thlengin ngaihtuah a awl ṭan ta!

Ram hruaitu rorum ber ber ten ṭawng nat har an ti hmel riauin a hriat ṭan a, beidawng lovin la bei fan fan mah sela, an mite laka an ṭawngkam hman duhzawng ṭhenkhat aṭang hian an ṭang ulh ve fe ni te hian a hriat theih nia....

Thla khat dang râl leh se khawvel leh kan ram hi enge a dinhmun ni ang, tih hi rinlawk thiam a har takzet ta e...

Mahse, hman aṭang tawhin keini chuan CHHANTU kan nei. Kan mamawh min pe a, kan natna min tidam ṭhin a, thim hnuaia beidawnna mittui kan hruk laiin thil ropui leh inthup min hmuhtir ṭhin tu kha....

Invenna thil dang zawng zawng uluk theihtawpa kalpui chungin ṭawngtai nasat lehzual a hun e..Rawngbawltu, thlarau mi leh enge maw nih kher a ngai lo. He natna laka kan him theih nan ṭawngṭai sup sup ila, min hêl a nih chuan kan vaiin ṭawngṭai chhânna testimony thar kan dawng ang. Kan pumpelh zo  lo a nih pawhin ṭawngṭai chungin kan hmachhawn mai ang chu...

Insawiṭhaihna lam a ni lova, a ṭha lam pawh a her chhuak thei tho, chu chu kan beisei reng tur pawh a ni ang, mahse, engtiklai pawhin Pathian koh hi a sual ngai lo zawk a ni..

23.03.2020

INKHAWM/INKHAWM LOH

Khati zât kan inkhawma kan thil zir, hriat leh chan te kha inkhawm loh huna hman tur a ni ang chu...

Mimal hian natna leh chhan hrang hrang avangin inkhawm theih loh hun pawh ka la nei dawn. Chutih hun chu ka inkhawm rah lanna hun tur a ni leh mai.

Pathian ringtu mai ni lo,  Pathian tana rintlak ni ve tur hian engtikah nge kan puitlin dawn?

Mithiamten Social distancing a ṭul an tih chuan zawm a ngai a ni mai ang chu mawle.

19.03.2020

FIAHNA

Rangkachak hlutna leh nihphung dik tak lantirtu chu mei sa tak a ni. Chu chu atan chuan fiahna a ni.

Tuialhthei kan tih te pawh hi, lei hnuaia dil ang mai a lí lung a ni lo, lei inthuahthip kara bet ṭhet ṭhet ang chauh hi a ni a, thlifimna leh a pawlh tur thildang a paltlang hnuah a ṭangkai chauh an ti.

Sikul kai ṭan tirh lamah te hi chuan zirlai zawng zawng hi an la inang pût mai a, kan la phek en ṭhup ṭhup a, engmah a la chiang tak tak lem lo. Mahse test hmasa ber kan han nei a, a lang nghal deuh ruak mai a, exam leh test a zing tual tual a, a hranpaa ṭhen hrang lem si lo hian, rilru hian pâwl khata awm ṭheuh ṭheuh hi felfai tak hian a ṭhen fel thlap mai a ni. An hming kan sawi lan rual hian an nihna kan chiang thei fu zel..😃

Khawchhak lamah natna chi khat (Covid - 19) a lo chhuak a, a hluar chho zel a, ram dang a pakai tam tial tial a, a thlen chin apiang te tan fiahna a ni chawpchilh nghal zel ni te hian a lang thei a. Hri (virus) inang reng kan dawnsawn dan te, kan beihlet dan leh kan chiai dan a inang lo viau mai.

He natna hian ram ṭhenkhat mumal zia leh mipuite tana inghahna tlak an nih zia a tarlan laiin, ṭhenkhat nêp leh nawi ve zia te pawh a tarlang tho mai. Buhfai inchuh tih te, thil man tito thut tih angrengah hian tumah han dem chiam a ṭulna pawh ka hre lem lo, mahse kawng engkimah kan la derthawnzia leh fiahna hnuaia kan mize dik tak lo lang ni maiah ka ngai.

Khaw ṭhat lai chuan lungpui leh ṭiau dup chunga in sak danglamna a lang lem lo. Lawng kar thiam leh thiam lo pawh hi tuifawnah a chiang ber zel.

Kan bul vela thil thleng, hlimawm, thinrimthlak, manganthlak, lawmawm harsa leh nuam te hian kan nihna dik tak lang thei turin min kângfai ṭhin a ni zawk ang. A ṭhenin an hmingthanpui thil, kan mualphopui bik tlat zel a nih chuan a inenlêt tur chu kan ni zel mai ang chu.

Johny Depp chuan, " Harsatna hi i chhan lêt hma chuan harsatna a la ni lo, i chhan lêt dan a zir a ni mai" a ti a.

Kan thinrim inhrikthlak duh dan te, kan huat zawng kan thungrulh duh dan leh kan duh dan lo tawpa thil a lo thlena kan chhan lêt dan lai tak te hi kan nihna dik tak zawk a ni mai angem?🤔🤔🤔

11th March 2020
Aibawk

PATHIAN HMÊL

Hmanni lawk khan Dehradun nu pakhat, a taksa zeng inenkawlna hautak si, PM Modi Scheme pakhat hnuaia inenkawlna senso phuhrukna a hmuh avanga Pu Modi hnena lawmthu a sawinaah, " Pathian chu ka la hmu lo na a, nangmahah Pathian hmel chu ka hmu a ni" a ti a. He thu a hriat hian Pu Modi pawh a no deuh nghulh niawm tak a ni..🤭

Pu Modi hian Pathian thu a awih vanga hetiang fakna ṭawngkam hi dawng a ni lovang, ringtu pawh a ni lo. Mahse thil ṭha a ti a ni mai zawk! Chu chu a ni...Pathian hmêl lanna chu..!

Isua an man lai boruak rit leh zâmawm tak hnuaiah khan Peter-a pui roh khan Isua phat kha a tum nasa khawp a. Isua a hriat ngai loh thu te a'n ṭanchhan ngial pawh khan, "A zuitu i nia lawm, i ṭawng danah pawh a hriat reng alawm" te kha an tia, an awih mang tlat lo..Phat chu a phat ngei a, mahse a phatna te khan an awih chiah lo zawk tlat mai..🤔 A chetvel dan hi Isua zuitu a ang hle chu a ni phawt mai..Pathian hmêl...!

Tsunami rapthlak takin Japan a nuai ṭum khan, mi tam tak, in tlusawp leh kawtthler hnawk nuai karah rilṭam manganga an awm lai khan, dawr pakhat, a bang darthlalang keh vek chhunga eitur te kha pakhatmah a bo lo a ni awm e..Pathian hmêl...!

Lamherh nufaho, Aizawla Masi bazar tur, an pawisa neihchhun an ruksak vek mai. An va mangang dawn tak em! Mi ṭhahnemngaite'n an thawhkhawm a, an tihbo aia tam an hmuh lêt sak....Pathian hmêl..


Lee Kuan Yew chuan ama mimal leh chhungkaw insiamlen ai chuan a ram a dah hmasa a, tunlai Singapore dinchhuaktu, tih hial a lo ni ta. A ram mipui te chuan amahah Pathian hmêl an hmu ang...

Pathian hmêl hmuh kan tum dan, kan zawnna hmun leh kan zawn dan a dik hunah Zoram hi a dam ang a, Pathian hmel hi kan hmu fiah ang...

9.3.2020

Kan ngaihtuahna hi a tê tham fo ṭhin. Tuichhunchhuah mawnga uṭawkin van lam a thlir chuan van zau zawng chu tuichhunchhuah kotlang bial tiat lek emaw a ti mai. Zuang chhuak sela chuan a thil thlir dan a dang ngei ang, tiin Mao Tse-Tung chuan a lo sawi tawh a.

Mahni ngaihdan zimte aṭangin midang suangtuahna tur âwm ka rin zâwn fo em? Ka thil thlirna tlang hi tizau hret thei ṭhin ila, ka ngaihdan ṭhenkhat hi chu midang tana pawm nuam leh sâwt zawka ka pawhfân theih châng a awm ṭhin hian a rinawm mange.. 🤔

9.3.2020

THUT NUN

Tun thla ni 24 hian India ramah US President a lo zin dawn a ni awm e. A lo thlen huna a tlawh turte zingah Ahmedabad pawh a tel a, thlalaka kan hmuh hi US President in a paltlang tur, kawngpui sira Slum Area thup nan bang rem an tum niin sawi a ni. Ahmedabad Municipal hotu lam chu an pha nasa viau a ni awm e...😁

A dik leh dik loh chu thuhran nise, hetiang ang chi, kalphung ngheta kan neih ni lo, engemaw denchhena chêt chiam, a hma lama kan tih ngai lem loh leh a hnulam thleng pawha ngaih thupui zui tâk chuan loh, kalphung ngheta neih atana thil ṭha tak tak ni si hi a va tam tak e aw...

India ram President-in kan state a rawn tlawh dawn a, chawp leh chilhin  a kawng zawh tur chin a'n ṭha thut mai a, traffic jam a reh nghal duak bawk a. Hengte hi President puala chawpchilh taka kan ruahman a ṭul tih te chu kan hre ṭheuh tho naa, ngaihpawimawh chuan a lo theih reng tih tilangtu te pawh a ni awm e..

Strict taka lirthei document check (eg. No tolerence Week) lai chuan document fel lo man tur sang tel tel an awm a, lirthei a hân deuh duak zêl bawk a, hengte hi ti thut lo hian kalphung nghetah a neih theih law mawni aw...Mi ram nunphung pangngai kha a ni tho si a..

Rawngbawltute pawh hi Pathian hman an awm tehmeuh rualin, hmelhriat ngai lem loh thusawi kar hnih khat ngaihthlakah kan han piangthar thut mai a, a hmaa hre ngai lo ni awm takin kan ngaihdan hlui kan han hnualsuat nghal rum rum a, a ṭha tho mai. Mahse, chanchinṭha kum za têl chenchilh tawh ram hian Pathian ṭih hi nunphung nghet atan engikah nge kan neih ang aw..? Thut ni lova, a ngheta neih atan a itawm ṭhin mange..

Eng hun emaw denchhena khawtlang leh mimal in leh lo han tuai fai thut mai te hi a lawmawm tho mai. Chutihrual chuan fai reng hi nunphunga neih atan a itawm a, englai pawha ngaihpawimawh chi a ni ang.

Hengte hi Sorkar emaw, Dept. lam emaw, Kohhran thiam loh pawh a ni bik chuang lo maithei. Awm dan dik leh nunphung dik nunpui a, chumi mila inkaihhruaina nghet neih mai hi a ṭha a, chutiang ti ṭhin te chu ram changkang, kan ti leh mai niin ka hria...

Ram, khawtlang, chhungkua leh mimal nunah pawh chin ṭhan nghet invawnna neih tlat hi a ṭha.

Tute nawrna emaw, hlauh zawngte sawi a nih vang emaw, bula awmte a zira ngaihdan let thut thut, kalphung ṭha vawn mumal nei lova tal mai mai hi a awm theih ngawt ang. Chutiang mi chu 'Principle' nei lo, an tih ang kha a ni mai lawm ni..?

Sawi tur tam tak a awm ang...in hre ve ṭeuh pawhin ka ring..😂😂

Hei, thlalaka ka rawn dah tel, ka fapa naupang zawk, Liansangpuia Pachuau hi vawiin aṭangin Sikul a kai ve ṭan dawn a nih hi..😂

Ani pawh hi, ABC te,123 te ziah chhin tir kan han tum a, a peih meuh lo. Zirlaibu thar kan han lei chu, a phur thut a, zir a tum nghal rum rum a, mahse a zirlaibu thar zual chhung chauh a phur ang tih kan hlau khawp mai...😁 Phûr chhunzawm zel se kan ti ngawt mai.. 😁😁😁

A thlalak dahṭhat pahin ka'n tlak ve leh ta duah a nih hi..😁

Dated Aibawk
18th Feb.2020

TEHNA

Hmanni deuh lawk khan khawvel mipa hmelṭha ber thlanah, Twilight star, Robert Pattinson chu thlan a ni a. Mumal takin tehfung an siam a, "The golden ratio of beauty phi" an tih, Greek ten 'perfection' an tehna formula an hmang a ni awm e.

Engpawh chu nise, hmelṭha ber te hi intihsiak anga a thlana thlan chi em ni dawn aw, te ka ti mai mai a. Kan hmelṭha tih zawng te, kan ngainat zawng te hi a lo inang lo khawp a, kan thlang duh ṭâlh a nih chuan le, thlan theih loh phei chu a ni hauh lo ang a, mahse, a ho angreng ngawt chuan ka hre mai..😁 A aia hmelṭha tih ka ngah e mai...😁

Delhi inthlan vuakvêtah Kejriwal-a car a lar phian mai. "Wagon R mai mai a khalh a", tih vel aṭangin kan ṭan a, "Wagon R kha chu an party car a nia, car ṭha tak tak a nei alawm", tih velin an rawn thual leh a. A ho angreng mange aw.. 😂😂😂 Ani lah khan, "Kan hnathawh en ula, in duhkhawp loh chuan min thlang lo mai ula" tiin Delhi mipui kha a cho mai a. A car khalh ṭhat leh ṭhat loh lam ni lo, a hnathawha teh an lo tam a niang chu, a tling hneh leh ta khawp chu a nih hi.

Thil reng reng hi a tehfung lek dan leh tehfung atana kan hman hian kan tehchhuah tur hlutzawng a keng tel viau mai âwm mange aw, tih te rilruah a awm ṭhin a. Tin, a tehtu a zir te pawh a la ni thei tho bawk ang. "Mitdel ramah chuan mit lehlam var chu lal a ni mai" te pawh an tih kha maw..Ṭha kan tih ṭhat dan hi a inchen lo khawpin a rinawm a, buai inti ṭheuh ṭheuh buai dan hi a inanglo fe thei ang.

Ram thim, ringlo mi hlang awmnaah chuan tualchhhunga a rau lo pawl pawh hi min hmu rau ve viau mai ang a...😁😁

Thawhlawm thawh tam lam pawh, a hunlaia mite teh dan leh Isua teh dan kha a inanglo ngawt mai. Thawh tlem êm êm, hmeithai kha thawh tam berah a puang mai a. A thawh bâng lam aṭanga a teh vang a nih hmel.

Ram hruaitu a ni emaw,  khawtlang hruaitu leh sorkar hnathawk te thawh ṭhat leh ṭhat loh te, an ropui leh faktlak an nih leh nih loh dan te chu kan tehfung hman leh a tehtute rilru changkan leh kan loh a zir te pawh hi a ni ta mai mai ang a....

Dated Aibawk
The 12th Feb.2020

U CHUAILOVI T.V

Kum 1998 laihâwl vel a ni ang, zirna avanga Aizawl ka awm ṭan ve kum kha..Lehkhazir bawka lo awm hmasa ka û te finin, Dam Veng Presbyterian Biak in bul kawngkam in pakhat hnuaiah khan bul kan ṭan chho ve kha a ni a. Hetah hian a ni, thlalaka T.V lo lang hi ka hmelhriat ṭan tâk ni..

Tunlai ang hian Internet chu sawi loh mobile phone te hi a la awm lova, TV a la hlut em em lai kha a ni. Ṭhenrual hnukkhawmtu ber a ni a, awmkhawmnaah hmun laili ber a chang zêl a, nitin zantin kan en rawn tlut tlut mai ṭhin a nih kha.

Khatihlaia kan venga inluaha khawsa ho kha zirlai deuh vek kan ni a, kan inpawhin kan inkawmngeih hlawm khawp a, tin, a veng pumpui  kha a len lem loh bawk avangin kan innêl tlangpui deuh vek mai.

Keini bawr kha tuna TV kan sawi mek neitute, U Chuailovi te inah khan kan chuangkai deuh ber ṭhin a, dawrtê  an nei a, kuhva kheh tur a awm deuh reng bawk a, kuva rah chehna hman thiam pawh kan nei hrang deuh far hlawm nghe nghe...😁😁

He TV hi a hunlai pawhin a lian lo chi tak a ni a, mahse a fiah ṭha ṭhin khawp mai. Ka awm ve kum pawh khan rei tak an lo nei tawh a, a chhawm tel remote control kha chu a neitunu khan a siamṭha zing ṭhin khawp mai. A TV tak kha chu siam pawh a ngai ngài meuh lo niin ka hria.


Kawngpui lam dep 'Dengtea Book Shelf' tih intârna bang phei kilah khan a inhûng ṭhin a, ṭhutthleng sei pathum leh thingrem lian ang chi, a chunga eng puan emaw phaha ṭhutna atana hman nghal mai theih te khan a hual vel a, chung ṭhutthlengah te chuan keiniho kha kan tâl kual vel ta ṭhin a nih kha...

Euro, World cup, EPL leh lemchan chitin kan en fova, kan titi luai luai ṭhin.

U Mapianga leh U Tlani te nen kan innel tak tak ṭanna hmun, Tlanmawia te nena mittui tlaphunga kan nuih ṭhinna chu he TV hmaah hian a ni. U Rawna, kan football dictionary te, ka u Zaitea kam nam phêt velna leh mi tuihnai, Cza te tualchaina hmun a ni bawk. Thimhlimah, kan u Roneiha, inthlahrung taka a rawn luh chaih chaih kha chuan ṭhenkhat chuan kuhva kan lo thel nual tawh hman ṭhin a, kan nau Zotea te pawhin zozial tlawn hnih an lo zu zo hman tawh ṭhin a nih kha...U Thawma (L) te zan lêng haw lamin an rawn thlir ṭhin chu he TV hi a ni a, kan u Mawitei ten Kluivert an star ṭanna chu he TV kaltlang hian a ni bawk asin..

Hengho bakah hian, U Huna te ṭhiandun te, Pa Dailova, Lal nu Ṭhiangi, Pi Thangpuii, kan u Manuni, Engzama te unau leh keini ṭhianho kha he TV leh a chhehvela khawsa nasa tak vek kan ni. A nuam ṭhin asin aw...😁

Kum a lo liam hnem ve ta deuh a ni ang, heng hunlaia he TV in a kohkhawm ṭhin te kha kan inhmu ngai tawh mang hlawm lo. Hmanni deuh khan TV neitunu hian bawlhhlawh paiha paih mai turin ti hian a rawn hung chhuak a, group kaltlangin ka lo hmu a, ka lung a tilêng ta riau mai a nih hi.

Ni e, engmah hi hlun tur a awm silova, he TV ang hian a en ṭhintu keiniho pawh hi hun hian min la hluihlâwn ve ang a, hnawksak chan changin phumbo kan la ni ve ang. Chutih hunah chuan U Chuailovi TV leh a chhehvela chetla ṭhin te pawh hi tu khaw kha hriat lohvin kan la reh hlen ve dawn chu a ni awm si a...🤔

Dated Aibawk
The 9th Feb.2020

KAM TAM

Rilru lam zirmite chuan, "Mihring rilru ropui nei te chuan ngaihdan an sawiho ṭhin a, a laihâwl chuan thil thleng chanchin, mi rilru hniam chuan midang chanchin an sawi ṭhin" tiin an lo sawi a.

Mizo nawlpui kan chaklohna nia ka hriat ve mai mai ṭhin chu midang chanchin a chhuanchhe zawnga sawi chungchang hi a ni. Kan hlawkpui leh ṭhatpui tur ni lem lo hi kan sawi nasa ve ṭhin khawp hian ka hria. Kan awmkhawm titi tlangpui hian kan chim chin leh sûm tiat tlangpui hi a tarlang ve hian a hriat khawp mai bawk.

Nutling patling, fel awm pui pui awmkhawm te hi han belchiang ila, tute emaw kawr thar neih theih zia te, tu fate emaw zing mut rei chungchang te leh tute emaw chhungkaw inrelbawl fuh loh zia, tih angreng, kan kuang lo pui pui hi ti tak hmai pu meuh hian kan nawr luai luai fo chang hi a tam khawpin ka hre ve ṭhin. Bula awm te a zira ngaihdan siam danglam mai mai leh tute emaw laka tlaktlum nana midang rêl chiam mai te pawh hi a awm thei ange maw? Tu zaithiamzia emaw sawi laia, a inbual khâtzia lo sawi ve sek ching te, a taihmakna fak tum mêk laia a thinchhiatzia lo rawlh ve sek ching te hi a awm ve theih khawp âwm a nia...

Mihring hi ngaihtuah leh hriat a tlem miau chuan midang chanchin sawi hi a awlsam deuh em ni aw, ti te pawhin a ngaihtuah theih. Thil hria leh ngaihtuahna sêng nasa ho hian a tlangpuiin midang chanchin sawi nan hun an hmang tlem deuh te hian ka hria, dik tak maw...? Mi buai leh thawkrim te hian midang chanchin an buaipui hman lo duh khawp mai bawk. Hman bawk si, thil sawi ve hrim hrim ṭul ti tlat te tan hi chuan midang chanchin sawi fo mai hi awlsam viau pawh nise, a âwm lo hran lovin ka hria..Thufing pakhatin, " Bel ruak apiang a ri ring" a tih te pawh hi a dik thui fu maithei. Rilru lam kawrawng apiang kâ a kal tlangpui, a ni thei mai angem? Chutihrual chuan a ṭha lam leh chhe lam hi  zir chawp theih vek phei chu a ni teh meuh mai.

Thil hriat zawng zawng sawichhuak mai, thuruk takngial pawh pai hleithei lo leh ka thil sawichhuah hian midangte tan harsatna a siam thei em, tih pawh ngaihtuah lova pik chhuak zung zung mai nih hi thil ṭha lo tak a ni thei ang. Chutiang mi, engmah hrilh ngam mang loh, "ani hi chu copy 500 a nia" an tih fiamthu ang chi hi khawtin leh veng tin hian kan kawl ṭhum mai âwm mange aw, tih palh mai awl tak a ni.

Japan ho finna inzirtirna thu pakhat, ṭha ka tih deuh mai chu, " i ta a nih loh chuan, la suh...a dik loh chuan, ti suh..thudik a nih loh chuan, sawi suh...i hriatchian loh chuan..ngawi hmak rawh" tih hi a ni.

Kan thil sawi ṭhenkhatte hi chu kan zeldin, keimahni ngei pawhin kan awih chawp zui tak te pawh hi a tam ve ang. Midang chungchanga ngaihdan siam ran lutuk te pawh hi a fuh loh chang a awmin a rinawm a, an thil paltlang leh harsatna tawh theih awm te chhutpui hmasa lova sêl leh rêl chiam theih a ni viau bawk ang. Engpawhnise, midang nun chu anmahni thu a ni a, zalênna an nei ve bawk alawm, an duh angin (khawtlang leh ram dan an zah lova, midang tan harsatna an siam a nih hran loh chuan) hmang ve sela , an chhungkaw ro pawh anmahni'n rêl se, kan ngaihdan nen a inmil loh pawhin râwn kan nih hran loh chuan ngawih thiam mai te pawh hi a zir ve theih tho ang a...Chutihrualin anmahni siamṭhat kan duh a nih chuan fel takin thurawn pe mai ila, midang dik lohna kan hriat ruala kan hmuh hmasak apiang kan han hrilh a, kan han titi punlunpui chiam mai ṭhin te hi chu a ho angreng ngawt mai.

Chutihrual chuan, thil kalphung han sawi tlân ṭum te, kan sâwt tlan zawkna tura insiamṭhat kan ngaihna lai ang chi leh a hlâwk zawnga han inhnial fiam ang chi te hi chu thudang a ni thung ang.

Heng ang chi, thil tê tham nia kan hriatte hian kan khawtlang nun, inṭhenawm khawvênna leh Kohhran nun thleng hian a pawt hniam khawlo nasa hian ka hre ve ṭhin. Speaker hmingthang tak ruai kher lo pawh hian KAM TAM lutuk ang chi te hi insum mai ila, thlarau pawlna sâng tak kan chang chiah lo a nih pawhin heng thil te hi bansan ngam mai ṭhin ila chuan, engemaw ti zawng tak hi chuan kan kân ve zawt te hi ka ring mai mai ṭhin.

Dated Aibawk
The 5th Feb.2020

HUN HMAN THIAM

Nimin, Pathianni tlai, Australian Open Final khelh zawha lawmman sem hun an hman kha a felfai angreng mange aw...

Khatia final match an khel zo kha, rei vak lovah dawhsân an han rem fel zung zung a, ṭhutna rem khep khup pawh awm lem lo khan court chhungah khan a tel tur awm kha an ding vek mai a.

Hun kaihruaitu khan thuhma tlem neiin, Chief Operating Officer a kova, anni'n minute 2 vel chiah felfai takin hun a hmang a, chumi zawhah Australian Tennis lama an hotunu kha a sawm chhunzawm a, ani khan minute 5 chhungin a sawi duh a sawi zo leh mai bawk a. A bak zawng kha chu finalist pahnih te thusawi nan an dah mai a, fel takin an zo mai. Mi pawimawh dang inrawlh zui an awm lem lo.

Keini'n loh theih loh angreng deuha kan ngaih, Technical Report sei fe mai te, Khuallian parṭhi hlan hnua sorkar hmalakna zawng zawng ngaihthlak chhunzawm te, a duh apiang thusawi, tih angreng kha ṭul an ti ve lem lo ni awm tak a ni.

Keini ram te chu nise, Scott Morrison a hovin a ṭhuihruai engemaw zat an lo kal ang a, an ram kan dan te, an hmalak nasatzia leh hmalak zel an tum dan te kha sawi tur a tam hian ka ring khawp a. Political platform duhthusam a ni hawt mai dawn a, opposition han vuak let vel nan pawh a ṭhat dawn nen..🙊🙊

Hun hruaituin' " tunah khuallian thusawi turin kan sawm ang a, hun ren lo se.." te hi kan han ti ta mai ṭhin a nia..😁 Nia, kan hun ngaihhlut dan hi a inchen lo khawp a, a hlutna hre lem lo tan chuan ren a ngai lem lo ve thei viau bawk ang.

Keini chu tlachawp angreng deuha programme karlaka rawlh tur te hi kan ngah em em mai ṭhin a, phuailuai zet hian kan ti deuh rem rum a, ṭan hun te hian awmzia hi a nei lo fo bawk a, a manganthlak angreng ngawt ṭhin mai.

Zir tur leh hmasawnna tur hi chu kan la ngah awm khawp mai.

Engpawhnise, Gland Slam ṭum 17 champion thei Djokovic a lawmpuiawm e....🏆🏆

Dated Aibawk
The 3rd Feb.2020

FACEBOOK

Kum 15 kalta, vawiin ni angah khan tuna i bih mêk, facebook service hi hman theihin tihchhuah a ni a. An siam dan te, a siamtute leh a hnathawh kual vel dan te phei chu kei aia hre hlir in ni ang. A hmangtu pawh kan tam thawkhat ta fu mai a nih hi, hei, tluklehdingawn kan chuang fe tawh a ni awm e...

BPO aṭanga km fe, kawng peng tê zawk zel zawh a, nitla van vuaia kal ngat ngat hnua beidawn tawp lama thlen thut ṭhinna khua aṭanga zi chhuak, keini ang tan te hi chuan tuna kan thil sawi lai mek hnathawh vel dan hi tun thleng hian thilmak chhuisen loh a la ni reng a. Puarak hmang ṭangkaia pentui rimtui ngata ziah lehkhathawn tlanpui vau vau ṭhin leh envelope pangpar chuang la mitthla zut zut thei te tan hian a mak zual bik asin aw...Mak ti ang hian kan lang duh lo lui mai mai ve bawk alawm...😁😁😁

Khati taka inbiakpawhna a chhiat avanga tlângkam (rumor) leh inchhaih fiamna (humor) tawn fuh loh palhin kan nun a vuak zawi ve theih si zia te kha...😁

Khang hunlai khan tuna kan inbiakpawhna hman mek hnathawh dan hi lo sawi lawk thei awm ta sela, kan awih lo nasa ngawt ang....Mahse hei, ṭawngkama inbiak chu sawi loh, hmel inhmu chung ten kan han inbia a, nula tlangval inngaizawng tan te hian a  manhla ṭhin hian ka va ring e aw...🙊

Facebook te hi a ṭha khawp hian ka hria a, ṭhian kan insiam a, kan duh duh ti hian kan sawi a, mahni inlum aṭangin rual a pâwl theih fe ta mai.

Kan hmabaka lo awm leh tur hi engtiang tak ni ang maw..?

Engpawhnise, Facebook Day chibai vek ule, ṭhiante u....🤝

Dated Aibawk
The 4th Feb. 2020

Tun ṭum hrilêng (Covid-19) hian nunphung pangngaia nungchate kan lo nêk chêpzia a lantir nasa mange aw..

Hrilên nachhana an puh len ber te chu nungcha man khawmsa hralh vêlna aṭangin a ni. Tun hnaia an zirchiannaah Pongolin, China rama an tawlh luh ṭhin te chuan Corona virus an lo pai ṭeuh tih an hmuchhuak tlat a ni.

Khuarel kan suamsam dan hian leilung dan a kalh a ni..

Rom 8:19 hi kan harhpui a hun e..

Dated Aibawk
The 27th March 2020

BATI CHHIT

Nikum 2019-a chhinchhiah danin India ramah mihring 1,350,379,487 vel kan awm a, chung zinga 1,082,415,914 chu Hindu an ni. A percentage chuan 80% vel an ni.

Nak zan dar 9 hian PM Modi chuan, chhungtin te, light off vek a, bati/flashlight minute 9 chhung chhi turin min ngên a. Hei hian tuna kan hripui lêng mêk Covid-19 tihrêmna kawngah awmzia a neih a rinawm lem lo maithei a, tin, PM meuh thusawiah chuan a ho angreng fu ti zawng pawhin a thlir theih bawk ang.

Engpawhnise, keini chu Kristian kan ni a, kan thil thlir dan pawh Kristian thlir dan zel a ni lo thei lo a, kan sakhua chu engkim tehna sahal atan kan hmang.

A tlem berah India rama mi 80% chuan kan thlir dan ang hian an thlir ve lem lo tih hi hriat reng a ṭha.

An duhzawng, sâwt thei tura an ngaih, an puithuna sahal khaiin thil an thlir ve te pawh a ni ang chu mawle.

Kristian thlirna ni lo, thlirna tlang dang hi a awm ve tho tih te pawh hi hriatthiampui ila..Sakhaw puithuna lam thil a lo ni a nih chuan, Hindu pa in kan ramah ro a rêl a, a mangangin an puithuna behchhanin a pathian a ko ve-ah ngai mai ila...

Tihluihna a awm lêm lo bawk a, phili buai chiamna tur a awm lem em ni?

Dated Aibawk
The 4th April 2020