ZIRNA UAR

Mizote inhlawm khawmna pawl lian ber YMA chuan hun rei tak chhung 'Ram leh hnam humhalh' kumpuan a kalpui tawh hnuah nikum 2019 General Conference ah khan kumpuan thupui thar 'Zirna uar kum' a puang ta.

He zirna uar kumpuan hi kumpuan hmasa, ram leh hnam humhalh tihhlawhtlina atana pawimawh tak leh a kipui ber pakhatah ngaiin, chumi rilru pu chunga he kumpuan hi thlang an nih pawh a rinawm hle.

Zirna chu enge...

Zirna, han tih hian, "thil eng pawh chik tak, taima leh uluk taka thiam tuma bei hi a ni" kan ti thei ang. Khawvelah hian thil zir sên loh a awm a, a zir sang apiangin hriat tur tamzia an hre chhuak a ni ber mai. Mithiamte chuan, "Zirna hian pian hlim aṭanga thih thleng (From cradle to the grave) a huam" an lo ti. Tun ṭuma kan luhchilh tur bik hi chu lehkha thiam tura zirna hi a ni dawn a ni. Chu chu CYMA pawhin kumin kumpuan atana a tinzawn ber pakhatah kan ngai bawk ang.

Zirna Vrs Zir

Ram len zawng, mipui tam lam leh hnam upat zawng aṭanga teh chuan Mizote tluka Zirna in ngah leh zirna uar hi khawvelah an tam lo maithei. Nu leh paten kan fate kan duhsakna sang ber chu zirna ṭha dawntir a ni. "Lehkha i zir ṭhat loh chuan hah takin hna i thawk ang" tih hi kan invauna kumhlun pakhat a ni. Zirna in kan ngah em em a, a hman apiangin kan din emaw tihpalh awl khawpin helamah chuan kan intodelh. Heng zawng zawng thlir chuan Zirna hi chu kan uar thawkhat ni te pawhin a lang.

Zirlai nih mai hi a hrehawm lem lo a, mi anna chikhat a ni zawk mah. A peihawm loh leh hrehawm lai tak chu zir hi a ni ang. Heti taka zirna uar Zoram hian lehkhathiam chhawrtlak leh mi ropui kan ngah lohna chhan chu a zir lai tak hi kan uar lo a ni thei em?

Zofate zinga IFS hmasa ber, KC Lalvunga kha hlawhtling tura thil pawimawh pathum an zawt a. A ni chuan, " Pakhatnaah chuan taimakna, pahnihnaah chuan taimakna, pathumnaah chuan taimakna" tiin a chhang an ti. Taimakna leh thawhrimna telin zirna uar ila, kan ram hian hmuh theihin hma kan sawn ang. Zirlaite kan va pawimawh em!

Officer lian kan mamawh...

Zofa, UPSC regular recruitment paltlanga IAS inziak tling hnuhnung ber chu Pu Vanhela Pachuau fanu, Grace Lalrindiki Pachuau a ni a, kum 2013 khan a inziak tling. Hemi hnuah IAS chhuak thar kan nei leh ta lo. A nihna takah chuan direct-a inziak tling IAS hi tun dinhmunah 10 vel chauh Mizoramin kan nei.

Kan senior te an pension ve zel a, hetiang reng a nih chuan Central Service hrang hrangah officer lian kan nei lo thuai dawn niin a lang. Synod meuh pawhin hei hi a vei a, 2018 Synod-ah khan an ngaihtuah hial a nih kha.

Hetihlai hian Chakmate leh hnam dangte a khât tawkin an tling ve reng a, an tlin miau chuan department hrang hrangah hotu an ni lo thei si lova, an hnuaiah kan kûn tho tho a ngai si, ngaihtuah chian a ngai hle a ni. Department hotu lu, Mizo zingah kan nei lo thei mai ang tih a hlauhawm. Hei hi hriain CYMA hian a vei em em a, kumpuanah a puang ta hial pawh kan ti thei ang.

Mizo, lehkhathiam, officer lian, National level-ah pawh zahkai pha kan neih tam deuh deuh a ṭul a,  Central sawrkarah aw nei thei leh sawrkar kalphung (policy) ruahmantuah Mizo kan pun zel a ṭul. Chu chu ram leh hnam humhalhna kawng pawimawh tak a ni.

Caste Vrs Class

Mithiamte chuan, " I pianpui hnam/chi (Caste) i thlak thei lova, i dinhmun (Class) erawh chu zirna hmangin i thlak thei" an lo ti a. Mizote hi India rama kan awm chhung chuan hnam tlem zawk, hnam tenau leh cheknawk (tribal) kan ni reng dawn. Hei hi thlak theih mai pawh a ni lova, duhthlang thei pawh kan ni chuang lo. Kan nihna a nih avangin kan damchhungin kan hnam hi kan thlak thei lo.

Hetiang hi kan dinhmun a nih avangin a hnam ang pawhin zah kan kai lo a ni ve pakhat bawk. A nihna takah phei chuan hriatthiamna te nen a hmingin MP pakhat ve ve (RS & LS) ah kan nei ṭawk ṭawk a ni ber.

Dr.BR Ambedkar chu hnam hnuaihnung, Dalit hnam a ni a, kan president ṭanglai, Ram Nath Kovind pawh hi Dalit hnam tho. Siamchhuah, tharchhuah leh leilung hausakna nei lo state, tribal ni bawk si tana dinchhuahna kawng hnaivai ber chu lehkha thiam a ni. Tarlan tawh angin lehkhathiam, Officer lian, Central sawrkarah pawh mi pawimawh tling phak kan ngah chuan ngaihthah kan harsa ang a, hnam zahawm kan ni mai ang.

India ram a ni emaw, khawvel pumpuiah pawh mithiam, rintlak leh chhawrtlak chuan zah an kai a, hmuhsit an ni ngai lo. Hei hi leilung dan a ni. Zirna uar ila, tumruhna leh taimakna nen ṭan la ila, hnam zahawm leh ropuiah kan dingchhuak ang. India rama ziak leh chhiar thiam tam berna state te pawh lo ni zak zak tawh kan ni a, ṭan kan lak leh chuan kan hmabak a êng thei ang.

Generation vanduai Vrs Vannei..

Mi tam takin, "Tunlai ṭhalaite tan IT hmasawnna avang hian lehkha zir a har a, an vanduai ngawt mai" an ti fo mai. A dik thui khawp ang. Lehkha zir leh chhiar aia nuam thil a tam ta a, lehkhabu ṭha chu smartphone in a luahlân zo ta ni te hian a lang. Hemi kawngah hian tunlai chhuan (generation), a bikin zirlaite te hi an vanduaina chen a awm khawp mai. Thlemna a hautak bik a, nuam a tam a, mit tlaina tur thil a chhuak thar nasa bawk si, lehkha zir aia nuam hlir mai hmanrua kan kawl fer fur tawh a, a buaithlak leh vanduaithlak zawnga thlir chuan vanduaithlak tih tur pawh a ni e.

Mahse, kawng lehlamah chuan, eng hmanrua pawh hi kan hman dan a zira ṭangkai leh ṭangkai lo a ni thei ang. Chempui hriam tak hi lo vah nan chuan a ṭangkai viau a, insualna hmanrua atana lek erawh chuan chhiatna thlentu a ni thei tho mai.    Anudeep Durishetty, IAS Topper chuan," IAS topper nih theihna hi Google leh Youtube ah hian a awm" a ti. Kan hman ṭangkai dan a inang lo a nih hmel hle mai.

Tunlai hmanraw changkang, smartphone chhunga awm te hi zirna kalpui nan hmang ila, kan duh apiang hmuh theiha dahin a awm a, zir ila, luhchilh ila, kan thiam ang. Zirna hmanrua leh hnathawhna tura siam lo chhiatpui tawk vel kan nih chuan hma kan sawn har ang.

Khawtlangah zirna boruak siam a ṭul...

Chhungkaw awmkhawmin khawtlang a siam a, khawtlang awmkhawmin ram a siam a, ram infinkhawmin khawvel a siam. Hmasawnna kawng dik zawh a, zirna uar turin heng zawhnate hi ngaihtuah a ṭul khawp mai. Kan khawtlangin enge kan buaipui ber? Enge kan ngaihhlut ber? Eng ang chenin nge lehkha thiam kan ngaihhlut? Zirna boruak siam turin engtin nge hma kan lak?

A dik tak chuan khawtlanga kan thil buaipui ṭhenkhatte, ngaihhlut bera kan neih thil ṭhenkhatte hi chu a ho angreng ṭhin ngawt mai. Kan titi ber leh kan vei zawngte hi hmasawnpui loh tur hi a tam ve hian a rinawm.

Khawvel a changkang tial tial a, kutkawih leh tharum hmanna aiin thluak sênna tur thil a tam deuh deuh dawn. Mithiam an hlu deuh deuh zel ang a, khawtlang leh ram tan an chhenfakawm tawlh tawlh dawn tih hi hriat a ṭha. Kan thupui bera zirna hmasawnna tur kan buaipui chuan lehkha thiam khua kan ni thei. Lehkha thiam tamna khawtlang apiang a changkang a, chu chuan ram a tingelnghet ṭhin. Kan khawtlang ṭheuhah ṭan kan lak chuan lehkha thiam, chhawrtlak tamna ram kan ni ang a, hnam zahawm kan ni bawk ang.

Tarlan tawh angin, mihring nunah zirna hian tawp chin a nei lova, tupawh hi inzir zel kan ni. Chutihrualin, tam tak hi chu mihring kumah khua kan tlai tawh. A chhia emaw, a ṭha emaw kan nih tur ang ang kan ni tawh hlawm ang. Tuna zirlai ni mek te hian, kan khawtlang, ram leh hnam tan in zirlai zir teh u. Chhan tlak kan la awm lai hian kan puanven sawi chhing ila, zir mek ten thiam tumin bei ila, khawtlang leh ram  hruaituten a theih dan apiangin zirlaite pui bawk ila, ram leh hnam rilru tak tak pu chungin zirna kalpui a hun. Chuti lo chuan kan ram leh hnam hi chhan tlâk awm lovin a la ral thei takngial dawn e.

Ngentiang Vangkhua Chanchinbu
Dt.26.1.2020 Issue.

LAKHUIHTHEI SERMON

Pu Lianhrima, Serchhip khua chuan a lakhuihthei thar hmin ṭha tak tak, thlalaka a lan dan chuan, pum 30 dawn lai ni awm chu khualzin, a duh apiangin an lak mai turin kawngsirah a'n chhawp chhuak tawp mai a. A man a chhiar lova, a vil zui lem lo bawk a. A duh dan a tarlan chhun chu, pum khat tê tê a lak nise, tih zawng a ni mai. He thil hi a mak angreng hle.

Thlai thar vanglaiin Nghah loh dawr a awm thluah ṭhin a, a hming ang chiah hian nghaktu an awm lova, a dawrtute anmahni an inbuaipui mai a, sum pawh a remchan dan angin an chalâi nghal mai. He thil pawh hi mahni mihringpuite rin ngamna ropui tak tih lo rual a ni lo. A nihna takah chuan hetia tih ngam hi a huaisenthlak fu a ni. Neih chuangliam aṭang pawhin a thlawn liau liau chuan midang thil pek mai hi a awlsam lo viau, ₹10 tihbo rêng a uiawm thei mai. Nghah loh dawr hian a neitu lam rilru zauzia a  tarlang a, an thil zawrh kha tuten emaw la vekin sum pakhat mah, an bâwm chhawpah khan awm lo thung mah se, lungawi tho turin an rilru a inpuahchah fel vek tihna a ni bawk. Ropui vîng vêng tak chu a ni.

Nghah loh dawr pawh a ropui tawh tehreng nen, Pu Lianhrima thil tih phei hi chu a la sang hle zawk lehnghal, kristian rama thil thleng tur awm tak a ni a, a inhmeh ngawt mai.

Thawkkhat lai khan, Aizawl veng ṭhenkhata step chho thui takah, a zawhtute chhawl hâl in turin, mi ṭhenkhatin tuisik an chhawp ṭhin bawk a nih kha...

Tun hnai khan, Liverpool Striker, Sadio Mane phone hman lai, a hmai keh nuai mai thlalak a darh chiam mai a. Zawhna a dawng nual a ni awm e? Ani hian kumtin $mtd 8.7 a hlawh. A duh chuan kartin phone leh car thar a lei thei ziah. Zawhna a chhannaah chuan, a tawi zawngin, "Ferrari car 10, lunghlu sana 20 neih hi ka tan enge a ṭulna? Chu ai chuan thawmhnaw nei lote pêk te, sikul din te, eitur nei lo eitur pek te hian awmzia a nei zawk. Football aṭanga midang puih theihna ka hlawhchhuak thei hi ka lawm a ni", a ti mai. Pu Lianhrima te nen rank khat an ni chiang mai.....

Hetia mi thiltih ṭhat han sawi hian tam tak chuan, "a thinchhe ve e mai", emaw, "Kohhran a bêl lo an ti", "an nu kuhva heh heh nen.." "lakhuihthei te chu an phur sêng lo a niang chu mawle..." tih ang chi, thil ṭha kara a chhe lam thlir hrâm hi khawte run tham zet kan awm ve zel tho nia...Thil chhiaah pawh a ṭha lai hmuh hi mi dik nunphung tur a ni ang..

Khawvel leh kan Zoram hi a chhe tawh hle te hian sawi ṭhin bawk mahila, mihring rilru ropui nei hi an va la tam em aw..!

Midangte tana malsawmna nih, han tih te pawh hi, hla taka awm a ni chuang lova, a tihhlawhtling turin official taka chêt kher pawh a ngai chuang lo. Project lian thama neih kher emaw, ruahmanna felfai tak hnuaiah kher lo pawh hian, tuisik leh lakhuihthei te hmang mai pawhin a lo hlawhtling thei tho a nih hi...

Heng thil te hi, i ti ve ang u, tiin ka rawt pawh a ni lem lo...Mahse he lakhuihthei leh tuisik sermon hian min hneh a, a titute hi ka ngaisang a ni ve mai....‼

Dt.11.1.2020
Aibawk

SOCIAL MEDIA THUNAWI

Hetia Social Media, kan tâwtawrâwt ber a nih tak hnu hian, tun hmaa thusawina dawhsan chang pha ngai hauh lo te pawh mi za têl têl hmaah, kan duh hun leh ṭha kan tih dan apiangin, khum laizawl aṭangin a ni emaw, puipunna hmun leh êkin aṭang pawhin kan au chiam chiam thei ta vek mai si a...

Inkohkhawm hranpa ngai hauh lovin huang hran hranah kan awmsa ṭhiap ṭhuap a, râwn kan nih lem lohna hmunah pawh kan ngaihdan kan rawlh ve zung zung thei a, hmaichhana sawi âwma kan ngaih lem loh te pawh han sawi ila, a kal zuih mai a,  a chhe lam zawng deuh te pawhin han sawi ta mai mai ila, *mâwl* leh *confi* a inkawp phei chuan rik hat te hi chu awm ve fo âwm tak pawh a ni ang chu..A puanchhuahna hmanrua hi ka ta, ka kuta awm leh ka duh anga ka hman theih a nih miau avangin tu sawi phak ni hek lo le..

Kawng lehlamah, tam tak hi chuan Social Media vantlang nun hi an tinuam takzet thunga, a chêng ve dangte tan chhawrnahawm leh hlimawm takah an chhuah tih hi a lang reng mai.  An thu leh hla chhiar hmaih kan hlauh ngawih ngawih te pawh an kat nuk rêng a ni...Tun hma deuh khan ṭhianpa, @ tlanmawiazaiaputea hian, "Mitin hian mobile phone hi kawl vek ila, kan hmang ṭangkai ngawt ang" a ti a. Tun hnu hian a chiang ta angreng, a ṭangkai dan hi pui tak a nih tak hi.

Eng hmanrua pawh hi a hmangtu a zir hian a hnathawh theih dan hi a inang lo khawp a, patling chem tum hum ṭheuh ṭheuh hi a inthlauh theih viau. Zu in zât inang ṭheuh ṭheuh, a thawh dan rêng a inanglo thei mai.

Tunlaiin Australia ramah kangmei a chhuak nasa mai a, a kan dan hi khaw khat pa ho tlan khawmin dai hnai kang an ṭhelh mit leh mai ṭhin ang hi chu a ni hauh lo tih a chiang a. Mahse thlalak rapthlak leh en hrehawm uchuak khawvel hmuhah an phochhuak lo khawp mai. Duh sela chuan a tam dawn nen..Tin, hetiang kangmei chhuakah te chuan inpuhmawhna tur hi a tam hian ka ring a, chutiang thawm hriat nuam lo lutuk a tam lo khawp mai bawk.

Mi tam tak hi chuan thil hi kan hel nuai ve nasa khawp a,  kan hmanraw hman tur zeizia hriat hmasak te, a nghawng tur lam leh awmdan mawi nena inkawp tur a nihna lam te hi hriat a ṭul tih pawh kan ngaihtuah chuang lo ni te hian a lang.

Engpawhnise, he inbiaktawnna hmanraw samkhai tak hi kan chelek chho nasa tial tial dawn a, inzirtir bawk mahila, kan inhmin kim tak tak thei dawn lo tih hi a chiang bawk a. Chutihrual chuan kan hman dan hian a hnam ang pawha kan chim chin leh mimal nunphung tur âwm tam tak hi chu a pholang ve zêl dawn a ni.

7.1.2020
Aibawk

Ṭawng duh lo leh ngawichawi nia tlâng hriat te hi an bula awm te a zirin an ṭawng duh ve hle thei angem? An mi rin zawng tak leh an inphawrh ngamna te bulah chuan rik bawrh bawrh châng an nei ve tho law'ng maw...?

Kan ṭawng tam vak lohna te hi chu, thil hrilh kan chak vak loh te pawh an ni ve thei tho ang a..Ka bula an ṭawngmawh viau chuan a thil hrilh chak zawng tak ka ni bik lo a ni ve bawk thei a...

Kan hriat zawng zawng puanchhuahna atan mi zawng zawng hi kan duh kher lo thei ve bawk a nia...🤔

7.1.2020
Aibawk

INDO

Bill Clinton-a President lai khan Al-Qaeda ho khan Tanzania leh Kenya rama US Embassy an bei a, US in na fe in a chhanglet zui nghal a, 'Operation Infinite Reach' vuahin US kha mawng vawmba ang mai khan a che ta vut vut kha nia. Mahse Bin Laden-a hote lungawilo er kual vel chuan, a tawi zawngin, 9/11 a hring chhuak chho ta kha a ni ber awm e.

Hei, tunah Iran nen an han buai leh a,  a chunga kan sawi nen khian an buaina inṭan chhoh dan a inang viau mai lehnghal a, enge maw ti tak hian a tuartu lam hian phuba lak an tum viau mai bawk si a. Ṭhenkhat lahin WW III an lo sawi ve reng bawk nen, mahni tapchhak zawlah awm kan ti nuam lo ru ve ṭeuh ta mai a..😁

Indo thuthang lian tham deuh a lo rik hian, tute tih dan takah emaw, rilruah Thomas Hardy- a poem, 'The man he killed kha a lo lang thar ve leh sur sur ṭhin a...

A poem-ah chuan sipai angah a inchan a, hetiang deuh hi a ni ang..

Zu dawr hlui rip repah  intawng ni ta zawk ila, zu no dawm dunin kan titi siam siam awm si a.

Mahse kan intawnna hmunin a zir lova, indona mualah kher kher kan intawng a, ka kâp a, min kâplet bawk a, ka kâp hlum ta nge nge a.

Ka hmelma a nia, ka kaphlum a ni mai. Thil dang han sawi leh chuan tur pawh a awm chuang lo, indonaah chuan hmelma te chu kan kahhlum mai loh nakah.

Ka kahhlum tak a pawh hi, keimah ang tho a hna dang nei bik lo, chhungkaw chawm nana sipaia inziaklut ve mai a ni tho ang, chhan dang vanga lut a ni bik hmel love.

Indo hi chu thilmak leh chimawm dangdai a va ni tehlul em! Hmun danga ṭhian kawma inkawm a, sum leh pai pawh inpûktir hial awma mawi te, mimal inhuatna tel miah lovin kan inkap siah siah mai zawng a nih hi... tih ang vel a ni.

Indo chhuah chhan te, innghinghona lo thlen chhan te hi tam tak a awm ang. Thuneihna duh vang te, duhâmna te leh ngaihdan inhmuh loh vang te pawh a ni ngei ang. Mahse Indo puitlin nan chuan eng thil mah hi a tling tawk lo, tih hi kan ngaihdan ni thei thin sela aw...

Thilsiam dangte hi chuan anmahni chipui tichimit zâwng hi chuan chêt an thawh ngai lo asin mawle...Einstein-a khan, "Sazu in sazu thang an siamchhuak ngai lo, mihringte chuan Atom Bomb te kan hmuchhuak a" tih ang lam hawi khan a sawi tawh. Mihringpuite kan han intihlum hmiah hmiah mai hi chu pawm a har angreng ṭhin mange aw..Mihring chauh hi zirtir kan lo ngai chu a nih ber hi..!

A chang chuan John Lennon-a 'Imagine' khawvel kha a ngaihawm vawng vawng ṭhin.

Tunlai khawvel boruak inmun vel hian rilru a kap deuh a, ka'n tlak ve duah a nih hi....😁

FAHRAHTE NI

Indo rapthlakna leh ngeiawmna tizualtu chu naupang pawisawilote tawrhna hi a ni ngei ang. Naupang tam tak fahrahah a siam a, eitur, tui thinghlim leh chenna mumal nei lovin an thi mek bawk. Himna zawngin mi tam tak an raltlan sung sung a, chu chu tunlai khawvel buaipui a tling a, naupang tam tak tan tawrhna rapthlak a thleng mek bawk. UNICEF in a tarlan danin khawvel pumpuiah fahrah, maktaduai 153 vel an awm a ni awm e. A rapthlak mange aw..

Thihna  hi chu thuhranah lo dah ta ila, chhungkaw inrelbawl fuh loh vang te, nupa inṭhen leh fate tlan bosan avanga naupang kan ti Fahrah ṭhin te hi chu a runthlak mange aw...Fahrah nun hi ngaih mai ai hian a rapthlak a, kan khawvel harsa takah hian nu leh pa enkawlna hnuaiah pawh ṭha taka chawrchhuah a harsat tawh tehlul nen...

Indo tuar, Fahrahte ni a lo thlen hian, thihna leh kan thuneihna piahlam thildang a nih ngawt loh chuan Fahrah siam belh zawnga rilru put loh hi a ṭha mange...

6.1.2020
Aibawk

SUNDAY SCHOOL

Kumin atan Sunday School hmasa ber, hming ziahni kan lo thleng leh ta.
Tihian vawiin aṭang chuan Pathianni tin, a pui a nawiin Pathian thu kan zir mup mup kumtluan leh mai dawn a nia, a ṭha-in a hlu mange...

Kumin hi Mizorama Sunday School kan neih kum 122 na a lo ni daih tawh mai. Kum 1870-a England-a bul an ṭan, mumal zawka Robert Raikes-a hmalaknaa kalpui a nih khan, elsenna  nena beitute ngeiin, "Robert Raikes-a hian Gloucester khuaa Sihal rualte chu Beramnoah a chhuah vek a ni" an ti thlawt kha a nia..

 Dik tak chuan, Sunday School, Beginner aṭanga Senior thleng mumal taka kal tluan chhuak te hi chuan, duhthusam thlap thlap te chu thleng pha lo deuh mah ila, Pathian duh zawng, huat zawng leh Kristian nunphung tur zawng zawng a nih loh deuh pawhin, a tlangpui tal te hi chu hria a, nunpui hneh fe tur hi chu kan ni awm mange aw..Tuna puitlingte pawh hi hmana Sunday School naupang ṭhin tho kha kan ni hlawm bawk si a, tih te rilruah a awm ve ṭhin.

Engpawhnise, naupang rilru ruak leh hruai ngil sam tak tak te Pathian thua an rilru chhun khahna hmun leh tleirawl/rawlthar rual, kawng dik kawhhmuhna sikul kan han nei ngawt mai pawh hi vanneihna ropui tak chu a ni phawt mai.

5.1.2020 (Pathianni)
Aibawk

LUTUK

Ṭum khat chu Persian hla phuah thiam leh miril, Rumi kha ti hian an zawt a, Tûr hi enge a nih han sawifiah teh? tiin. Ani chuan, Tûr chu kan mamawh aia tam thil kan kawl tawh phawt hi a ni mai. Entirnan, thiltihtheihna, hausakna, rilṭamna, chapona, thatchhiatna adt., tiin a chhang e, an ti.

 A lutuk chin chu engmah a ṭha lo tih nen a inhnaih hmel viau mai. Ṭhenkhat chuan meizuk lutuk te kan tuar a, ei lutuk zo lo te, thiltihtheih chak lutuk te pawh kan chhiatpui ta ve ang.

Sakhaw lak run lutuk te hian thisen a va chhuahtir hnem em ve aw..! Iran leh US inbakkaih vel pawh hi sakhua luat leh thuneih duhna thil inchawhpawlh kual velin a lutuk a thleng a nih hmel hi a...

Thil engkimah hian a tawk a fang hriat hi mi pangngai awmdan ni te pawhin a lang.

Hei, kan khawchhia pawh hi a ti lutuk ang tih a hlauhawm...a vawt...😁

4.1.2020
Aibawk

HRINGNUN

Kum 2020 tuk thum tuk...zinglam aṭangin chhum a zing chûk mai, furpui hunlai ang mai alawm le..Khaw awm dan hian nun a tinguai a, a ipik chûn mai.

Ni 363 dang la awm hian eng ang nge kan nunah nghawng a la neih ang? Hriat phak rual loh a ni...Engpawhnise, a thlir tur lai i hriat fuh chuan hringnun hi a mawi a nia..

3.1.2020
Aibawk

KUMTHAR

Bul ṭan thar turin kumthar emaw ni thar emaw hi kan mawmawh ber a ni lo, rilru puthmang thar a pawimawh ber.

Chutiang rilru ka neih ṭan hun apiang chu ka tan ni thar, kum thar, nun thar chu a ni ang.

Kan duhthlanna a ni e...

2.1.2020
Aibawk

KUMTHAR

Ti hian an lo sawi a, rilru sawngnawi tan chuan eng dinhmun pawh hi harsatna a tling a, rilru inbuktawkah chuan chona a ni thung a, rilru paukhauh tan chuan remchâng a chang zel thung, tiin.

Hlawhtlin leh hlawhchham inkar pawh hi he rilru aṭanga inṭan hi a ni ngei ang. Kumthar hi remchânga chantir thei tur khawpin rilru paukhauh neih tum ila, kum duhawm takah kan chantir thei awm mange..🤔

Duhthlanna kan ta a ni si a..

Kumthar chibai le....

1.1.2020
Aibawk

Nunhlui ngaih hi hringnun kalh tikimtu a ni a, Nunhlui ngaih avanga thu leh hla piang tawh zat hi chhiar sên pawh a ni lo hial ang. Nunhlui ngai hian mahni a inawmtlei theih a, ṭahpui theih a ni bawk. Nunhlui ngai thei a kan la dam hi malsawmna a ni lawi si.

Vawiina kumhlui leh nunhlui thlah liam thei a la dam zawng te hian, kumthar leh nun thar nei turin inbuatsaih ila, chu chu kumhlui leh nunhlui thlah dan ṭha ber a ni mai awm mange...🤔

31.12.2019
Aibawk

INENLÊT

Oprah Winfrey chuan, Mahni inenlêt nachang i hriat loh chuan nun awmze nei i nei thei lovang, a lo ti a. Lalsangzuali'n, I thil tih zawng zawng saw thlir teh ti a a sak nen a inhnaih hmel viau.

Kumina ni hnuhnung ber kan hman ni ah hian mahni inenlêt chhin teh. Insiamṭhat huama mahni kan inenlêt zin poh leh nunho a nuam ang a, mahni inenlêt lova midang chauh en kan chin chuan mahni kan inhmu lian zel thung mai awm mange..🤔

31.12.2019
Aibawk

KRISMAS

Van leh khawvel inrem lehna tura Pa chatuan remruat, ran thleng leh Kraws thu hi sakhaw dang thlirna aṭangin a dik thei lo a, khawvel mithiam tam tak tan thu mawlmang mai a ni.

Mi â let dera an ngaih, Pu Chawngkhuba chuan a hmu chiang khawp a, chhandamtu thuruk a ti thung a..

Hei tho hi a ni, Petera'n Vantirhkohten bih an duh ṭhin a tih kha...(I Pet.1:12)

Hei hi a ni, Krismas hlutna chu..🎄🎄

25.12.2019
Aibawk

KRISMAS

Ama thupek, Ama siamten an bawhchhiatsak a, A thinrimin A hnen aṭanga hnawhchhuah mai duh tawk lovin anchhia A lawh zui a...

A ngai ngam ngang lova, ngaihdam A duh leh ta zawk a. An duhtawka an nghaisak atan A fapa neih chhun tlâwm theihtawpin bul A rawn ṭan tir leh...
Hei hi hmangaihna a nih loh chuan, puh tur dang a vang ngawt mai...
Chu chu a ni, *Krismas* chu..🎄🎄
Krismas chibai le...

25.12.2019
Aibawk

TEACHERS' DAY

Shark hi sangha khawina bur(fish bowl) ah khawi ta ila, a bur len dan a zirin, inches 8 vel lek ah a ṭhan a kin thei an ti. Mahse tupuiah chhuah ta ila, feet 8 leh a aia sei te pawhin a ṭhang lian thei. Sangha lian ber pawl a ni thei an ti.

Kan chhehvel thil (Environment) hian kan ṭhanlenna kawngah kawngro a lo va su em! Hmalam thlir thiamna la nei lo, rilru ruak leh no zirlaite ṭhanlenna environment kan siamsak hi eng ang tiat nge ni ve ang le?

An ṭhanlenna boruak leh kanchâwm seilen dan azirin an danglam thei hle ang. Muslim firfiakho chawm seilen naupangte chuan thihchilh bomb tihpuah hi an chak zek zek mai a ni, an ti.

Kan ṭawngkam, kan chetvel danleh an rilrua kan khung tur te hi ngaihtuah chian a lo ngai hle mai.An hmalamhun kan siamsak mek a ni si a..Tuipui zauah chêntirin ṭhanlentir i tum ang u hmiang....

Teacher's Day chibai vek ule....ṭhiante u..

Dt.5.9.2019
Aibawk

KRISMAS

Rev. Thansiama khan, "Ran thlêng leh Kraws aia hnaiah Pathianin min pan dawn lo" a lo ti a.
Ni e, hmanraw dang leh sawi dan hrang hrang te hian han inâwi tlei ṭhin bawk mah ila, Pathian hmangaihna bul leh vawrtawp tarlanna chu "ran thleng leh Kraws" hi a ni reng ang.

Van hmuna chingfel mai lova, min rawn kal chilh dan hi a mak ngawt mai. Hei hi a ni ang Pu Kamlala'n, "Ran thleng leh thing anchhedawng leh, vana lallukhum a inzawm" a tih kha....

Hei hi a ni, Krismas chu..🎄

22-23.12.2019
Aibawk

HAUSA KAN LO NI

Favang ni chhuak hnîm raih hnuaiah pang dam viahin kan han tho chhuak a, mahni hna ṭheuhah kan han ṭul sang sang a, hnathawh awl karah titi phungleng sawia nui ham ham chungin ni kan han vui liam a. Inbual fai veng vawngin zanriah puar takin kan han ei a.Tlai thlifim thaw seng seng dawn paha favang ni tlaksan, kawl sen phût mai thlamuang taka han thlir vang vang mai te hi chu a man a va sang rua em!!

Ngaia kan neih thil tam tak hi mi ṭhenkhatin vanram an suangtuahna ai hian a sâng zawk awm si a.. Kan va hausa si em!! 🤔

19.10.2019
Aibawk

C LALRINMAWIA

"Di cham bawihpui" tih hla sawi tel lo pawhin, "Mithlain ka hmu che Ngaihzuali" tih hla te ngawt pawh hi ka tleipui kumkhua tawh tur hla pakhat niin ka hria.

Zai nalh tum em em lem lovin a zai vel mai mai a, pial deuh piat puatin hla thu a lam a, a kalpah deuh mai mai ni te hian a lang a, mahse a zai thiam  em em ringawt mai a, a "ori" ngawih ngawih mai ni.

"A ṭha apiang an thi hma" an lo tih te pawh hi a dik thui thei viau dawn a lo nih hi. Hriselna ṭha neiin la zai mai mai la ka duh nen aw.....
C Lalrinmawia, ka va ui che em!!!....😢

18.10.2019
Aibawk

FRIDAY THE 13th

Sapho hian vawiin ni ang, Zirtawpni leh ni 13 innang fuh hi an hlau phian a ni awm e. Puithuna thil mai phei zawng a nih a rinawm. Film hlauhawm pui pui an siam phah nual bawk.

Vanduaina chu thuhran nise, ni ṭha leh chhia, hlimawm leh beidawnthlak hi a hmangtu rilruah a awm a, ni khat mai pawh ni lo, kan damchhung hun hman dan hi a hmangtu rilru sukthlek milin a kal vek zawk si a..🤔

Dt.13.9.2019
Aibawk

INPUHMAWH

Brazil president, Bolsonaro chuan Amazon kangmei nasa tak chhuah chhanah NGO a puh a, anni lamin President Anti-environmental Policy an puh thung. Rev.Vanlalbela chuan, "Kan thlahtute khan thei ei loh tur an ei khan inpuh tawn kual lovin, 'kan tisual a ni e, min ngaidam rawh' ti mai se, chatuan khua hi a var leh hial maithei asin" a lo ti bawk a.

Mahni lam inen kân a, inpuhmawh tawn ringawt hi chuan kan ram, khawtlang leh mimal inlaichhina hi a dam zo meuh lo chu a ni e.

Dt.24.8.2019
Aibawk

TLAWMNA

Isaac Watts chuan, " Isua Kraws mak tak chungah khan, ropuina Lal thi ka hmuhin, ka hlawkna ber ka ngainêp a, chapo uanna ka ngaitlawm a.." a lo ti a.

Inngaitlawma, tlâwmna nun nei tur hian *mi fate* nih kher ngai lovin, *ropuina Lal thi* thlir mai zel hi a tâwk ang a....🤔

Pathianni hman nuam u..

Dated Aibawk
The 14th July 2019