IF TOMMOROW........

    Vau thla zan thla eng khawthiang hnim ruih mai chuan ral lehlam tlang chu a chhun paw ruih a, ngaih la tawk leka vabak thirchher ri kauh kauh bak chu thawm dang hriat tur awm lovin a reh vung vung a. Khum laizawlah chuan a hunlai a tlangrel leh sawi pawh dawn lova a lo kurpui vawng vawng thin, a khawvel zawng zawng innghahna ni takmeuh thin, an in kawngte chu sakuh kawng bela a lo bel tlut phahna leh siar meuh lak a lo huam phahna ni thin, tuna a nupui lo ni ta chu tui takin a muhil sek sek a.. A muhil theilo leh kual vel pah chuan he thu hi a han chham chhuak a..
                Sometimes late at night
                I lie awake and watch her sleeping
                She's lost in peaceful dreams
                So I turn out the lights  lay there in the dark
                And the thought crosses my mind
                If I never wake up in the morning
                Would she ever doubt the way I feel
                About her in my heart
    Ni e, tunah hian a hmangaih ber leh a khawvel neihchhun chu a angchhungah thlamuang takin a muhil chiah chiah a, thimthamah chuan ngaituahna kawmin, a rilru in kiltin kiltang a dap a, hlun lo tur mihringte chenna tur atana khuanu’n a lo buatsaih he khawvelah hian a nun chawhnu lam a lo hmang ve ta reng mai, engtikah emaw chuan siamtu ruat tawng dikin lei daiah a la zal ngei mai dawn..Naktuk zing hi ni ta se.. A ngaihtuahna a kal ding zel a, a tuk nichhuak chu hmu dawn tawh lovin, a thlarau chuan he lei hi chhuahsan dawn ta se, a hun kal tawh leh a tun hun hman mekah hian a hmangaih, a nupui duhtak nen chuan inthen lo tul ta se, a hmangaihna hlan sa chu a tawk angem? Awka chhuah thei tawh lovin, thihna in a hringnun thlan a a hnuh liam hunah chuan a hmangaih tana a hmangaihna hlan sa chu a duhkhawp meuh angem..?
                If tomorrow never comes
                Will she know how much I loved her
                Did I try in every way to show her every day
                 She's my only one
                If my time on earth were through
                 She must face the world without me
                Is the love I gave her in the past
                Gonna be enough to last
                If tomorrow never comes

    Nunphung pangngaia hringnun hi a kal zur zur lai leh harsatna ata hla taka awm nia kan in hriat lai hi chuan khawvel hian par a chhuang ur ur a, khawvel hi kan nuih rualin a nui a, hawina lam apiang hi a mawi hliah hliah thin a ni lawm ni? Tu hriatpui loh pawh hian hlimna hi kan pumbilh hliah hliah niin kan hre fo mai..Zing nichhuak sarah han hawi vel ila, tlang tin leh mualtin mai hi a mawi hliah hliah a, siamtu duan khuarel mawina hi kan chen kumhlun dawn ni tlat a hriatna hian min zem chiai chiai thin...

Beisei loh buaina...
    Vanduaina hi midangte tan a ni a, vanneihna leh malsawmna zawng hi kan chanah kan dah rilru fo.Lungngaihna hian mual liam duak duak se, hlimna nen hian in chul heuh heuh reng ila, tichuan hringnun hi a famkim dawn tlat ni te hian a hriat thin. Mahse khuanu hian hringnun ah hian lungngaihna leh rum vawng vawng na te hi a lo bilh tel tun a. Lawmna leh tahna hi a lo inpawlh chiat zawk si.
    Mithi dar a ri vung vung a, zualko pen thawm milin lungphu a in thum rawn tluk tluk a, tu emaw chu hmangaihna hlan leh ngaia auh lawm lawm pawha awmze hre map tawh lo turin marphu piah khawvel panin a liam vawn vawn tih hi hai rual a ni lo. Ngaihtuah a thui a, lung a zing mup mup a.Khawvelah hian dam hlen tur kan awm lo tihte thleng thlengin ngaihtuahna a kal phah  fo mai. Mithi in singsa buai nuaih nuaih karah pachang a rum vawng vawng a, hnem chuan ngaihna awm hauh lo khawpa nuchang kuk rawi rawi rite hian hringnun zepui hi a va han pholang chiang thin em!! Mithi vui tur thlanmual panin an inzui kawi nguai nguai a, kuang zawn ke pen ri thlawk thlawk bak ri dang awm hauh lovin a reh nghuai a, hetih hunah hian alawm H.W.Longfellow a’n..
Art is long and time is fleeting,
And our hearts stout though and brave,
Still like muffled drums are beating,
Funeral marches to the grave
a lo tihna rilru te hi a hriatthiampui awm ve ruau ruau thin ni. Hetiang zawng zawng a ngaihtuah hian alawm he hla phuahtu hian hlauhthawn a neih phah tak ni..

Hlan hman loh hmangaihna...
    Tum lawk hauh loh leh ruahmanna ah pawh fiamthu pawha kan telh duh loh vanduaina tawpkhawk lo thleng thinte hian engemaw chang chuan a chhuanchhe zawngin min kaiharh fova, kan hmangaihte biaktlak tawh ngailo tur leh duhsakna tinreng pawh an tana hlutna awm tawh miah lo tura thihna kut vawtin a hmer ngawt ngawt hunah meuh hi chuan, an tana kan hmangaihna hlan sa leh duhsakna kan khumtir te hi kan sit thar leh hnuhnawh a, rilru natna kan thlensak zawng zawng te nen lam miththlaah a rawn inlar zut zut a. Kan hlan hmanloh hmangaihna leh ze tha tinreng an laka kan chhuah hman lo hian min thing let tlut tlut fo a nih hi. Theih sela chuan kohkir a, keh thei dawm taka dawm hi an chakawm leh hnuhnawh thin..
            'Cause I've lost loved ones in my life
            Who never knew how much I loved them
            Now I live with the regret
            That my true feelings for them never were revealed
    Ni, inchhir in ban a chen a, tihngaihna a awm tawh silo. Nun hi a lo va mak ngai em!!

Hmangaih thutiam...
    Mahse khawvel hi mithite nilovin a la damte hian kan ti hlu a, a hlutna pawh nungdama la awmte tan chauh a ni. Vanduaina tawpkhawk hian hringnun zirlai hi fiah takin min chhawpchhuahsak mai nilovin hmalam hun atana inbuatsaihna tur awmze nei takin min zirtir a tum thin a lo ni. Dam tlan hi chuan ngaiah kan lo in neih mai mai hi a lo ni a, heng harsatna leh manganna hmang hian hmangaihna hlutzia leh thil tak tak a nih zia hre turin min lo beng harh fo thin a ni zawk. Tahna khawvela nui ri kan hriat theihna tur in mitin hi hmangaih ni tur leh hmangaihtu ni tur atan leilung hian min ko a lo ni. Mi zawng zawng in hun khat kan chan tlan vek hi a hmangthiam leh awmze neia chantirtu chu mi vannei kan lo ti mai zawk  a ni.
    Mihringpuite tana hmangaih thutiam hlanna hun khuarelin min pek hi hmang tangkai duh thin ngat ila chuan khawvel hi a va nuam dawn tehlul em!! Duhamna leh in seh tawn reng reng a hun hmang thin mihring nun ah hian hmangaihna hian hmun sang ber han chang ngat thin sela chuan vanram dang hi a ngai chuang dawn em ni?  He hla siamtu erawh chuan intiamkamna thu ti hian a han phuh chhuak leh a..

            So I made a promise to myself
            To say each day how much she means to me
            And avoid that circumstance
            Where there's no second chance to tell her how I feel

Ni e, a a reng duh bik tawh lo. A tihsual tawhna ah tihsual nawn a tum tawh lo. Siamthat theih tawh loh chunga inchhir hrehawmzia a man chhuak tawh a, a beidawnthlakzia a tem tawh.
    Hun hi dan pangngai anga a liam zel a nih chuan hei hi kan kal dan tur a nih reng hmel si a, khuanu hian ro dang a neih hmel silo. Tu te pawh mai hi kan inthlah liam zel dawn a nih si chuan a hlut lai bera hmangaih thu in hlan hi awmzia a neih lai ber a nih hmel. 

AWM KHAWMNA IN

                                                                                                                        Tlanmawia
                                                                                Dated Dam Veng
                                                                                    20th Nov.2000

                                                                                    13:47

    Hrawva ‘Awmkhawmna in hlui’ te, Vanneihtluanga ‘Run mawi’ te leh U Rawna Shillong Hostel awmna te aia nep bik miah lo tur, awmkhawmna in ka nei ve teh mial a, hanghlui kal tate ka an ve na pakhat a ni awm e.Thil dangah han el phakna deuh tur ka neih loh nen. Hei, kan tleirawl ve dawn chauh emaw tih nakalaiin, hetiang thil hlu, hranghlui miril te pawhin thu leh hla tha tak tak leh mawi tak tak an lo phuah phahna thin kan nei nghal mai a. Mi vannei tur hi chu kan hriat mai thin. A la hlui hma hma hian kan sep rawtui ve teh reng ang. Nakin hun  tur kan hriat loh hi, duh aia hma te hian a hlui mai ange.

    Hmun thenkhat, ‘Pathian lo chu a awm vek ang’ an tih thin ang em nilo mahse kan duh leh mamawh tawk tur awm kim vekna a ni reuh a. (Nula telovin). He hmunah zet hi chuan Pa Dailova thlarau nun te, U.P.C. nula te, Electric Veng te, seberamno te, The Rock te, Kuhva hringte, Jet Li te, Brick Games te, Lalnuthiangi sachek leh choka chep te, Football te, in dah nil te leh inhawlh film te leh a bak zawng hi chu a awm kim a ni mai e. A hunte a rah thin tih ang deuhin chung thil chu mamawh dan tawk hian Pathianin min rawn pe thin a ni ber mai e. E, ka sawi hmaih Crore Patti, Bruce Lee, Kajol leh Shahrukh Khan te pawh an la tel tak e.

    ‘Lungrualna tlang’ ni ve mai awm tak hian he hmunah hi chuan hmanlai leh tunlai a luang kawp a, Shah Jehan te unau nunrawnzia te leh America Election te titi tui berah a neih theih a. Sawiho mai bakah comment turu tak tak te lo pe in, Russian Submarine pil te pawh ‘ Khawmualah awmna tur a la tam nen tui chhungah te kal kal tur em ni? Venghnuai kawngah rawn awm ve mai rawh se’ tiin inven dan tur nen kan kawhhmuh thlap thei a ni. Lungpho bial leh Florida bial kan khaikhin lo chauh a ni e.

    Chaw eikham veleha mutchhuak ta viau te, zan dar 11 hma a mut tura ngai miahlo te,Dar 11:00 a Hindi chanchinthar puang nghah rawt tlat te, Crore Patti hma hma a lo thlawk sang ta viaute pawh hi Ka U Ma-a sawi tawh hi chuan kan lungrual leh phian thin.

    Achang hi chuan a buaithlak ve tep thin. Heena leh champions League te a lo awm kawp a, chutih laiin Crore Patti a lo ngai, Wrestling nen, G N’ R an lo zai bawk si, Enter the Dragon an lo play ve chhen nen, sakeiin sazuk a lo um in zawngrual an lo in show bawk si nen. Mahse ‘God must be crazy’ chu hapui lang hungin kan en ho leh tho ang chu.

    Buaithlak ta deuh bera ka hriat chu, thubuai rem tur awm chang leh thil kan hre lutuk hi a ni. Bed Room pakhata mu theuh theuh hi a tu ber nge zanah hnar ring a, a tu hi nge thlawk sang ber tih angrengah hian kan buai thei em a ni. Tunge meizial heh ber, tunge a bung tan ngun ber tih te, tunge nawalh kha lo hmangzo leh ta? Inkawina ah khan tunge nil kha? Laisen lungmawl thluak hi chuan a rem dan tur ka hre ta mai thin lo. A hranpa a Magistrate neih mai tur nge maw ni dawn pawh ka hre love. Kan thil hriat a chiang em em hi erawh chu a lawmawm ngawt mai, thil lah kan hre zau. Kluivert a nula rim polite dan te, Amitabh a coat thui tu te, Sheringham a tukkhum sam duh dan tak te, a..engpawh hi hriatloh tak tak hi kan lo nei love. Chuvang chuan alawm, thutlukna fel tak siamin, khawchhak tlangval chu Jet Li vek, vai nula chu Kajol vek ti a decision kan lo siam tak ni. Vai ho tawng zawng zawng hian enge an sawi tih te pawh kan hre vek asin. Mifing awmkhawm ah chuan a larlo pawl tak kan ni maithei a ni.

    ‘If music be the food of love’ tih hi hrethiam lemlo mahila a tlangpuiin rimawi kan ngaina hlawm ve a. Chu chuan buaina pakhat a rawn siam leh thin. ‘Thapui nangnen’ tih te leh ‘You’re still the one’ tih te ngaihthlak pawlh a ngai tlat thin a, Siampuii ‘Khawtlang lunglen’ hi nge mawi Dreamhunter? CCR leh Abba nge lung ti leng Westlife? Jimmy Hedrix nge ngaihsanawm Ricky Martin? Lungrualna tlang ah hian lung chu a rual mawh deuh a ni awm e a.

    Lungrualna hi ram leh hnam tan kher lo pawh himna kulhpui a lo ni thei ve tho tih ka hre ta. Duhzawng leh ngainat zawng dang viau mahse in lungrual tho tur a lo ni e. Zaitea thutthlengseia a mut chuan mut ve hmiah mai tur. Rina te an zawi viau chuan khawng duh bik loh tur. Thil tam takah kan lungrual tho a, entirnan, lunglenah te, mutchhuahah te, nuih nghek nghekah te leh a dang tam tak ah.

    Hun hian min nghah hman bik loh avangin tun hun te hi engtikah emaw chuan mualah a la liam ve ngei ang le. Chutih hunah zet chuan tunge Fela inkawi pui ang? Zotea’n Rina Lighter a dil leh angem? Zaitea’n khaini bur ala zawng buai tho angem? Hmun dangah ‘Dengtea Book Shelf’ tih intar hi a awm ve angem? Han ngaihtuah teh u, lung a leng lawk ve deuh roh nia. Inkhelh thiam ho leh Film star ho hian kan hlimpui thin zia hi hre ve se rilru a dam deuh tur a nia leh. Theih nise spinach ei tur chu awm se kan han thlawk thla lawk mai tur.

            Aw ka ngai, nunhlui zamual liam hnu,
            hmanlai an chang ta maw..

tih hi rilru tak tak a ngaihthlak hun zawng ala awm dawn khawp mai.

    Chulam zawng sawi sawi tur a ni love. Khi vur vur chung hian ‘A na e mai’ tih hi ngaithla vung vung mai ang. Kan awmkhawmna in a la hlui ve hleinem, tiraw U Mapiang..!!

Comment                   
                                                                                                                       Rintea
                                                                                                                 Dated  Aibawk
                                                                                                                     23.6.2010

    Ni e, a hunlai kha chuan a nuam ve thlawt alawm..Mahse a ziaktu hlauhthawn ang ngei hian kan phirsi zo ta..U Chualovi leh U Dengtea Book Shelf thlazar hnuaia khawvel kan ngam ve lai kha chuan hetiang hun ngaihtuah thleng pha tur hian rilru sen a tulna kha kan hre lo miau a..Hetia U Mapianga te chhangchhe pa an lo nih tak hnuah leh, U Zaitea ten Ka U Maa te aia Kim kimi te unau duhzawng ngaihtuaha Serchhip leh Aizawl an kar tawn zak zak tawh a, U Rawna leh Fela te phei chu a mawngphe takngial pawh hmuh tur a awm tawh loh hnu, a ziaktu pa ngei pawh tawn fuh a harsat em em tawh hnuah hi chuan, buaina khawvel hian awmze neiin min nghawng ve tak tak ta ni te pawh hian a hriat ve rum rum tawh.

    Lalnuthiangi leh U Matlani te chu han hmuh leh hel hawlh chang awm mahse tunhma ang kha chu a ni thei tawh mawlh lo alawm..Ko Nuni phei chu a hunlaia nui ring ring kha ni mahse CM tluk zetin tawnfuh a har ta..Eng kan ti ta nge maw ni..Phur thuta chhang kan hluai a rem teh tuai tawh lova, thla en zana zai leh chiam tur phei chuan tuang tih chhah fe a ngai ta.. Kan hna pui ber pakhat leh min khairualtu ni fo, kuhva kheh tur takngial pawh a neitu nu in a titawp ta lehzel nen..

    Pa Dailova thlarau nun leh chanchinthar chhiar kan ngaihthlak lohna pawh thangkhat lian zet a lo ni ta. Zotea te hmu tur pawhin kumpui linglet nghah a lo tul tawh a, khatih hunlaia kan awmkhawmna in naute ni thin,  Zodini te pawh zaipawl tlar hmasa berah an vei thlek ha tawh chinah chuan hun hian min chaldelh ve ta a ang khawp mai. Nia, hei hi khuarel chu a ni si a, ngaihdan han rawlh ve thei lah kan ni si lo, lung zawng a la leng dawn chauh a nih hi maw, tiraw Tlanmawi.....???